فۋتزالدان الماتىدا ءوتىپ جاتقان ستۋدەنتتەر اراسىنداعى الەم بىرىنشىلىگىندە قازاقستاننىڭ ەرلەر قۇراماسى تابىستى ونەر كورسەتىپ, ورەلى ونەرىمەن ءوز جانكۇيەرلەرىن قۋانتۋدا.
توپتىق ءتۋرنيردىڭ تۇساۋكەسەر كەزدەسۋىندە 2016 جىلعى الەم بىرىنشىلىگىنىڭ قولا جۇلدەگەرى چەحيا قۇراماسىن 4:3 ەسەبىمەن ۇتقان جەرلەستەرىمىز كەلەسى تۋردا جاڭا زەلانديانىڭ قاقپاسىنا جاۋاپسىز ەكى گول سوقتى – 2:0. ءۇشىنشى باسەكەدە بەلارۋسپەن كەزدەستىك. ولار دا وسال قارسىلاس ەمەس. 2014 جىلى يسپانيادا وتكەن دۇنيەجۇزىلىك دودادا بەلارۋستىكتەر ءۇشىنشى ورىنعا تابان تىرەگەن بولاتىن. بۇل ماتچ 1:1 ەسەبىمەن تەڭ اياقتالدى. وسىلايشا, ءوز توبىندا ءبىرىنشى ورىن العان قازاقستان قۇراماسى پلەي-وفف دوداسىنا جولداما الدى.
جارىس جولىندا ەندى سەگىز مىقتى كوماندا عانا قالدى. شيرەك فينالدا وتانداستارىمىز ارگەنتينا قۇراماسىمەن كۇش سىناسادى. وڭتۇستىك امەريكانىڭ وعلاندارى وسى كۇنگە دەيىنگى ستۋدەنتتەردىڭ ايتۋلى دوپ دوداسىندا جەڭىس تۇعىرىنا كوتەرىلە الماعانىمەن, بۇل ەلدە فۋتزال وتە كەرەمەت قارقىنمەن دامىعانىن جانكۇيەرلەر جاقسى بىلەدى. اتاپ ايتساق, وسىدان ەكى جىل بۇرىن ۇلتتىق قۇراما كوماندالار اراسىندا كولۋمبيادا وتكەن الەم چەمپيوناتى ارگەنتينالىقتاردىڭ جەڭىسىمەن اياقتالعان ەدى. دەسەك تە ءبىزدىڭ جىگىتتەر ءوز جەرىمىزدە ءوتىپ جاتقان جارىستا جانكۇيەرلەردى جەرگە قاراتپايدى دەپ ۇمىتتەنەمىز. بۇل باسەكە 23 تامىزدا وتەدى.
وكىنىشكە قاراي, قازاقستاننىڭ ايەلدەر قۇراماسى بۇل جارىستا ءساتسىز ونەر كورسەتۋدە. العاشقى كەزدەسۋدە 3:5 ەسەبىمەن جاڭا زەلاندياعا ەسە جىبەرگەن ارۋلارىمىز كەلەسى ماتچتا پورتۋگاليادان ويسىراي ۇتىلدى – 1:14. بۇگىن جەرلەستەرىمىز فرانتسياعا قارسى وينايدى.
عالىم سۇلەيمەن,
«ەگەمەن قازاقستان»
الماتى