بۇگىن قر ۇكىمەتىنىڭ وتىرىسىندا پرەمەر-مينيستر باقىتجان ساعىنتاەۆتىڭ توراعالىعىمەن كۇن تارتىبىنەن تىس وزەكتى ماسەلە — استانادا بولعان جاۋىن-شاشىن سالدارى قارالدى.
تولاسسىز جاۋعان جاۋىننىڭ كەسىرىنەن استاناداعى بىرقاتار كوشەلەر كولكىگەن سۋدىڭ استىندا قالدى. سونىڭ سالدارىنان كوشەدەگى قوزعالىس قيىنداپ, جاياۋ جۇرگىنشىلەر مەن اۆتوكولىك يەلەرى زارداپ شەكتى, قوعامدىق كولىك قوزعالىسى قيىندادى.
باقىتجان ساعىنتاەۆ وسى ماسەلە جونىندە ەلباسى تاراپىنان دا بىرنەشە رەت ورىندى سىن-ەسكەرتۋلەر ايتىلعانىن اتاپ ءوتتى. قالاداعى كارىز جۇيەسىن تۇپكىلىكتى شەشۋ تۋرالى ءتيىستى تاپسىرمالار دا بەرىلگەن. اكىمدىك قالاداعى جاعدايعا تولىعىمەن جاۋاپ بەرەدى ياعني, تابيعاتتىڭ وسىنداي توسىن مىنەزىنە دايىندىق ءۇشىن جانە قالا قىزمەتتەرى جۇمىستارىنىڭ تيىمدىلىگى ءۇشىن دە اكىمدىك جاۋاپتى.
«قالا تۇرعىندارى قالالىق كوممۋنالدىق قىزمەتتەردىڭ ناشار جۇمىستارىنان زارداپ شەكپەۋى ءتيىس», — دەپ ب. ساعىنتاەۆ, جىلدا سۋ باسىپ كەتۋ جاعدايلارى ءبىر كوشەلەردە: ب. مومىش ۇلى داڭعىلىندا, تۇران داڭعىلى مەن ۇلى دالا كوشەلەرىنىڭ قيلىسىندا, «باراەۆ» جانە «جاستار» شاعىن اۋداندارىندا جانە ت.ب. كوشەلەردە قايتالانىپ ورىن الاتىنىن ايتتى. ايتا كەتۋ كەرەك, مەتەورولوگيالىق قىزمەتتەردىڭ بولجامى بويىنشا جاڭبىر ۇزاققا سوزىلۋى مۇمكىن.
اكىمدىكتىڭ وسىنداي جاعدايلاردىڭ الدىن الۋعا جانە جويۋعا باعىتتالعان شارالارى تۋرالى استانا قالاسىنىڭ اكىمى اسەت يسەكەشەۆ باياندادى. ەلوردا اكىمدىگىنىڭ اقپاراتىنا سايكەس, سوڭعى ەكى جىلدا قالانىڭ جاۋىن-شاشىندىق كارىز جۇيەسىنە قاتىستى اۋقىمدى جۇمىستار اتقارىلعان.
«بىلتىر تۇران – ۇلى دالا, 31 كوشە, كوكتال كەنتى, مىڭجىلدىق ساياجولى, س. سەيفۋللين كوشەلەرىنىڭ تازارتۋ قۇرىلىستارىن اياقتادىق», — دەدى استانا اكىمى.
اكىمدىك ماسەلەنى ەرەكشە باقىلاۋدا ۇستاپ وتىر. ءا. يسەكەشەۆ استانادا بارلىق جۇيەنى تەڭگەرىمدە ۇستاپ, نوسەرلىك اعىن قىزمەتتەرىمەن اينالىساتىن, جاۋىن-شاشىن كارىز جۇيەسىن بۇرۋ جونىندەگى كاسىپورىندى قۇرۋ جوسپاردا بار ەكەنىن ايتتى. كاسىپورىندى «استانا–تازالىق» نەگىزىندە قۇرۋ كوزدەلگەن.
ماسەلەنى قاراۋ قورىتىندىسى بويىنشا پرەمەر-مينيستر باقىتجان ساعىنتاەۆ ۇلتتىق ەكونوميكا مينيسترلىگىنە استانا قالاسىنىڭ اكىمدىگىمەن بىرلەسىپ اتالعان ماسەلەنى پىسىقتاۋدى تاپسىردى. اكىمدىككە جاقىن ارادا وسىنداي جاعدايلاردىڭ الدىن الۋ, كوممۋنالدىق قىزمەتتەردىڭ جۇمىسىن كۇشەيتۋگە قاتىستى قاجەتتى شارالاردى قابىلداۋ تاپسىرىلدى.
ب. ساعىنتاەۆ كارىز جۇيەسىن, سۋ جينالاتىن قۇدىقتاردى دەر كەزىندە تازالاۋ ماسەلەلەرىن ەرەكشە باقىلاۋعا الىپ, ءار جاۋىن جاۋعان سايىن سۋ استىندا قالاتىن اۋماقتاردا ەندى قايتىپ مۇنداي جاعدايدى بولدىرماۋ ءۇشىن كەشەندى ءىس-شارالار دايىنداۋدى تاپسىردى.
ەلوردانى دامىتۋدىڭ بەسجىلدىق جوسپارىندا پرەمەر-مينيستر جاۋىن-شاشىندىق كارىز جۇيەسىنە باسىمدىق بەرۋدى تاپسىردى. پرەمەر-ءمينيستردىڭ ءبىرىنشى ورىنباسارى اسقار مامينگە قر ۇكىمەتىنىڭ قاراۋىنا جىبەرىلگەنگە دەيىن باس جوسپاردىڭ جوباسىن قايتا قاراۋ تاپسىرىلدى.