«قازاقفيلم» كينوستۋدياسى تمد مەن شىعىس ەۋروپاداعى ەڭ ءىرى حالىقارالىق ونلاين-كينوتەاتر MEGOGO ارقىلى وتاندىق كينولاردى ينتەرنەت جەلىسىندە كورۋدىڭ مۇمكىندىگى قاراستىرىلعان كەلىسىمشارت تۋرالى رەسمي حابارلادى. 1 قىركۇيەكتەن باستاپ قازاقستان ستۋدياسىنىڭ جۇزدەن استام ءونىمىن بۇكىل الەمنىڭ عالامتور قولدانۋشىلارى تاماشالاي الادى.
– MEGOGO-نىڭ كونتەنت ساياساتىنداعى نەگىزگى باعىتتارىنىڭ ءبىرى – ءار ەلدىڭ وتاندىق وندىرىسىنەن شىققان فيلمدەردى حالىقارالىق دەڭگەيدە تانىستىرۋ. ياعني الەمنىڭ كەز كەلگەن نۇكتەسىنەن قالاعان ەلدىڭ قىزىقتىرعان تۋىندىسىن تاماشالاۋعا تاپتىرمايتىن مۇمكىندىك تۋدى دەگەن ءسوز. بۇل الەۋمەتتىك سۇراۋ سالۋ نەگىزىندە جۇزەگە اسىرىلادى جانە مادەني كوزقاراس تۇرعىسىنان وتە ماڭىزدى,– دەيدى ورتالىق ازيا بەينەقىزمەت كورسەتۋ كەڭسەلەرىنىڭ باس ديرەكتورى نۇرلان شوقىباەۆ. «سوڭعى جىلدارى قازاقستاندىق كينوونىم الەمنىڭ نازارىن اۋدارا باستادى. ءبىزدىڭ دە ولارعا ۇسىناتىن تۋىندىلارىمىز جەتكىلىكتى. فيلمدەرىمىزدىڭ بارلىعى دۇنيەجۇزىنىڭ كينوتەاترلارىنا شىعا الماسا دا كاتالوگقا ەنگىزىلگەن مول ۇسىنىس ونلاين كورۋگە مۇمكىندىك بەرەدى», – دەپ اتاپ ءوتتى ن.شوقىباەۆ.
«قازاقفيلم» كينوستۋدياسى ۇسىنىپ وتىرعان وتاندىق كينومۇراعات 150 ءفيلمدى قامتىپ وتىر. ونىڭ ىشىندە – 148 كوركەم فيلم, 1 – دەرەكتى فيلم («مادەني مۇرا» اتاۋىمەن 10-سەريالى تسيكل), 1– سەريال («استانا, ماحابباتىم مەنىڭ» 12-سەريالى). كەڭ اۋقىمدى كينو الاڭىنا «مەنىڭ اتىم قوجا», «قىز بەن جىگىت», ء«بىزدىڭ سۇيىكتى دارىگەر», «تاقيالى پەرىشتە», «قىز جىبەك», تاعى باسقا فيلمدەر جيناقتالعان. MEGOGO مەن كينوستۋديا اراسىندا بيىلعى 11 ماۋسىمدا بەكىتىلگەن كەلىسىمشارت تالابىنا سايكەس, كونتەنت تەك اقىلى نەگىزدە عانا قىزمەت كورسەتەدى.
– ءبىز ءوز كونتەنتىمىزدى MEGOGO الاڭىنا شىعارعان سەبەبىمىز, قازاقستان كينوستۋدياسىنىڭ ونىمدەرىنە سۇرانىس جوعارى. فيلمدەر قازاق جانە ورىس تىلدەرىندە كورسەتىلەدى. بۇل جوبا وتاندىق كينونى ناسيحاتتاۋ جولىندا ۇلكەن ءرول اتقارماق,– دەيدى «قازاقفيلم» اق ءباسپاسوز قىزمەتىنىڭ جەتەكشىسى اينۇر يساەۆا.
MEGOGO-نىڭ ءبىر ايداعى اۋديتورياسىن 40 ملن قولدانۋشىنى قۇرايدى. كاتالوگتا 77 مىڭنان اسا بەينەتاسپا بار. ونىڭ 5 مىڭنان ارتىعى كوركەم فيلم مەن سەريال, 1500-دەن اسا انيماتسيالىق فيلم, 45 مىڭ تەلەۆيزيالىق شوۋ, كونتسەرتتەر مەن مۋزىكالىق بەينەجازبا, سونداي-اق 20 مىڭنان اسا اقپاراتتىق باعدارلاما بار. حالىقارالىق ەڭ ءىرى بەينەقىزمەت كورسەتۋ ورتالىعى FOX, Universal, SONI, WaltDisney, MGM, Miramax, Warner, Broters, Paramount Pictures, BBS, Euronews, DiscoweryCommunications, Viacom سەكىلدى ايگىلى ستۋديالارمەن كەلىسىمشارت جاساسقان.
ايگۇل احانبايقىزى,
«ەگەمەن قازاقستان»
الماتى