بۇگىن قىزىلوردا قالاسىندا اۋىل جاسوسپىرىمدەرىنىڭ رەسپۋبليكالىق II جازعى سپورت ويىندارى باستالادى.
ءتورت جىلدا ءبىر رەت وتكىزىلەتىن سپورتتىق ويىنعا وبلىستاردىڭ قۇراما كوماندالارى قاتىسادى. ويىن باعدارلاماسىندا ۇلتتىق, بۇقارالىق جانە وليمپيادالىق سپورت ءتۇرى ەنگىزىلگەن. ءدۇبىرلى دودادا رەسپۋبليكانىڭ 14 وبلىسىنان 2000-عا جۋىق 2001-2003 جىلدارى تۋىلعان اۋىل سپورتشىلارى باق سىناسادى.
سايىس سپورتتىڭ 10 تۇرىنەن ۆولەيبول, شاعىن-فۋتبول, قازاق كۇرەسى, توعىزقۇمالاق, ەركىن كۇرەس, اسىق اتۋ, گرەك-ريم كۇرەسى, دزيۋدو, تاەكۆوندو, گاندبولدان وتەدى.
پرەزيدەنت ن.ءا.نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىن ىسكە اسىرۋ, سالاۋاتتى ءومىر سالتىن ناسيحاتتاۋ, اۋىلدىق جەردەگى جاسوسپىرىمدەردى دەنە شىنىقتىرۋ جانە سپورتپەن جۇيەلى شۇعىلدانۋعا تارتۋ, ۇزدىك سپورتشىلاردى انىقتاۋ, سپورت رەزەرۆىن دايارلاۋ ماقساتىندا سپورت كۇنىنە ورايلاستىرىپ ءوتىپ جاتقان باسەكە 21 تامىز كۇنى اياقتالادى.