اقمولا وبلىسىنا كەلگەن سوڭ مەملەكەت باسشىسى ءداندى جانە مايلى داقىلدار القابىن ارالاپ, ەگىن ورۋ ناۋقانىنا دايىندىق بارىسىمەن تانىستى.
– استىقتىڭ ۋاقتىلى جينالۋىن قامتاماسىز ەتۋ قاجەت. بىزگە اۋا-رايى قولايلى بولىپ تۇر. ەگىن ورۋ ۋاقىتىنىڭ سوزىلۋى ەداۋىر شىعىن كەلتىرەتىندىكتەن, بۇل جۇمىستاردى جەدەلدەتۋ كەرەك, – دەدى ەلباسى.
نۇرسۇلتان نازارباەۆقا اقمولا وبلىسىنىڭ الەۋمەتتىك-ەكونوميكالىق دامۋىنىڭ نەگىزگى ناتيجەلەرى مەن اۋىل شارۋاشىلىعى سالاسىنىڭ پەرسپەكتيۆالارى جونىندە مالىمدەلدى.
قازاقستان پرەزيدەنتى اگروونەركاسىپ كەشەنىنە وزىق عىلىمي جەتىستىكتەردى جانە تسيفرلاندىرۋ ۇدەرىسىن ەنگىزۋدىڭ ماڭىزدىلىعىن اتاپ ءوتتى.
– شورتاندى اۋدانىندا تاجىريبە رەتىندە القاپتاردىڭ ەلەكتروندى كارتاسىن ەنگىزۋ, ەگىستىك جاعدايىنا سپۋتنيكتىك مونيتورينگ جاساۋ, تۇقىمدى رەتىمەن ەگىپ, تىڭايتقىشتاردى ديففەرەنتسيالدى تۇردە سەبۋ جۇمىستارى جۇزەگە اسىرىلۋدا. بۇل ەڭبەك ونىمدىلىگىن 2 ەسە ارتتىرۋعا, سونداي-اق شىعىندى 20 پايىزعا تومەندەتە وتىرىپ, استىق ونىمدىلىگىن 5 تسەنتنەردەن اسىرۋعا مۇمكىندىك بەرەدى, – دەدى مەملەكەت باسشىسى.
سونىمەن قاتار, ەلباسى قازاقستاندا جانە شەتەلدە قۇراستىرىلاتىن تەحنيكالاردىڭ ۇلگىلەرى قويىلعان اۋىل شارۋاشىلىعى ماشينالارىنىڭ كورمەسىن ارالاپ كوردى.