وڭىردەگى كەمباعال جاندار اراسىندا «تەمىر تۇلپار» تىزگىندەگىسى كەلەتىندەر كوپ. الايدا ارنايى جابدىقتالعان كولىك بولماعاندىقتان جۇرگىزۋشىلىك كۋالىككە قول جەتكىزە الماي ءجۇر. ءوزى قاتارلاس قۇربى-قۇرداستارىنىڭ ارمان-ماقساتىن جۇزەگە اسىرۋعا قۇلشىنا كىرىسكەن ءسالىمحان ءسابيتوۆ جۋىردا مۇمكىندىگى شەكتەۋلى جاندارعا ارنالعان اۆتومەكتەپتىڭ جوباسىن الماتى قالاسىندا ءساتتى قورعاپ كەلدى.
«ەلىمىزدە العاش رەت قولعا الىنعان تىڭ يدەيانى جان-جاقتى سۇزگىدەن وتكىزىپ, «راۆنايا دوروگا» دەگەن اتاۋمەن قولدانىسقا ەنگىزگەلى وتىرمىز. وعان مۇمكىندىكتەر مول», دەيدى وبلىستىق «قوعامدىق كەلىسىم» كمم-ءنىڭ جەتەكشى ساراپشىسى س.ءسابيتوۆ. ءسالىمحاننىڭ ءوزى دە جاستايىنان مۇگەدەكتىككە ۇشىراپ, كوررەكتسيالىق مەكتەپتى بىتىرگەن. «اردوس-جۇرەك» مۇگەدەكتەر ۇيىمىن قۇرۋعا اتسالىسقان. باسقا دا قوعامدىق جۇمىستارى جەتەرلىك. وزىق باعدارلاما «مەتالل گرۋپپ» كومپانياسى تاراپىنان قولداۋ تاۋىپ, 2 ميلليون تەڭگە ءبولىنىپتى. بۇل قاراجاتقا «لادا گرانتا» اۆتوكولىگى ساتىپ الىنىپ, رەسەيدىڭ چەليابى قالاسىندا مۇگەدەك ادامدارعا ىڭعايلانىپ وزگەرتىلمەك.
دارىگەرلەردىڭ قورىتىندىسى بويىنشا جۇرگىزۋشى كۋالىگىن الۋعا رۇقسات ەتىلسە, ىنتا-تىلەك بىلدىرگەن عارىپ جاندار قىسقا مەرزىمدى كۋرستارعا جازىلۋعا, «تەمىر تۇلپار» جۇرگىزۋدىڭ قىر-سىرىن مەڭگەرۋلەرىنە بولادى. وقۋ باعاسى بار-جوعى 15 مىڭ تەڭگەنى قۇرايدى. اۆتومەكتەپ ۇيىمداستىرۋشىلارى ولاردى جۇمىسقا ورنالاستىرۋ, قوسىمشا تابىس تابۋ جولدارىن دا قاراستىرۋدا. «التىن قىران» سەرىكتەستىگى دە 4 ميللليون تەڭگە مولشەرىندە قارجى بولۋگە ء ازىر. وعان تاعى ءبىر جەڭىل كولىك ساتىپ الىنباق. كەلەشەكتە تەحنيكالىق قىزمەت كورسەتۋ ستانساسىن قۇرۋ دا جوسپاردا بار. ءسويتىپ كولىكتەردى كورشى ەلگە اپارماي-اق جەرگىلىكتى جەردە جابدىقتاپ بەرمەك.
بۇگىندە وبلىس ورتالىعىندا 8 مىڭنان استام تىرەك قيمىل جۇيەسى بۇزىلعان مۇگەدەك ادامدار تۇرادى.
سول سياقتى جاس كاسىپكەر رۋسلان سماعۇلوۆ تا تۇرمىستىق زاتتار ءۇشىن قولدانىلاتىن قۇرالدى عارىپ جاندارعا ويلاپ تاۋىپتى. ونىڭ ايتۋىنشا, بىردە كورشىسى بانكالاردى اشىپ بەرۋىن ءوتىنىپ, كومەك سۇراپ كەلگەن. وسىدان سوڭ ءبىر قولى جوق ءۇي شارۋاسىنداعى ايەلگە جاردەمدەسۋدىڭ جولىن ىزدەستىرىپ, ءبىر ايدىڭ ىشىندە قۇرىلعىنى جاساپ شىعارعان. ول قازىر تەندەرگە قاتىسىپ, ونىمدەرىن پەتروپاۆل, كوكشەتاۋ, استانا قالالارىنا وتكىزىپ ءجۇر. تۇيمە, كىلت, تاعى باسقا كۇندەلىكتى تۇتىناتىن زاتتاردى ۇستاۋعا وتە ىڭعايلى اسپاپقا سۇرانىستىڭ كوپتىگى ەسكەرىلىپ, ءوندىرىستى كەڭەيتپەك.
«ۇزدىك الەۋمەتتىك جوبا» وڭىرلىك بايقاۋىندا جاس كاسىپكەردىڭ ونەرتاپقىش جاڭالىعى جاقسى قىرىنان باعالانىپ, 700 مىڭ تەڭگە سىياقى الدى. بۇگىندە 7 مىڭداي ادام رۋسلاننىڭ قولجەتىمدى قۇرىلعىسىنا ءزارۋ. قىتاي مەن رەسەيدە ونىڭ باعاسى قىمبات.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى