1994 جىلعى الەم چەمپيوناتىندا كولۋمبيالىق اياقدوپشى اندرەس ەسكوبار بايقاۋسىزدا ءوز قاقپاسىنا گول سوعىپ العاندىقتان, ولار جارىس جولىنان شىعىپ قالعان-دى. وسىعان اشۋلانعان فاناتتار ەلگە ورالعان سوڭ ونى التى جەردەن اتىپ مەرت قىلعان.
ال بيىلعى چەمپيوناتتىڭ پلەي-وفف كەزەڭىندە كولۋمبيالىقتار 4 شىلدە كۇنى پەنالتيدەن انگليا قۇراماسىنان ۇتىلدى. وسى كەزدەسۋدە ەكى رەت قاتەلىك جىبەرىپ, قارسىلاس كوماندانىڭ ايىپ سوققىسىن جاساۋىنا مۇمكىندىك بەرگەن كارلوس سانچەسقا جانە ءبىر مارتە قاتەلىك جىبەرگەن ماتەۋس ۋريبە مەن كارلوس باككانى جەرلەستەرى «سەندەرگە اندرەس ەسكوباردىڭ كەبىن كيگىزەمىز» دەپ الەۋمەتتىك جەلى ارقىلى قورقىتىپ-ۇركىتىپ جاتقان كورىنەدى. ءتىپتى ولارعا ء«تىرى قالعىلارىڭ كەلسە, كولۋمبيا توپىراعىنان جىراق كەتىڭدەر» دەپ شارت قويۋدا.
بۇل وقيعاعا بايلانىستى باسپاسوزگە مالىمەت بەرگەن مارقۇم اندرەس ەسكوباردىڭ تۋعان ءىنىسى ساچي ەسكوبار: «اعامنىڭ باسىنا كەلگەن قاسىرەت قايتالانباسا ەكەن دەيمىن. ناعىز فۋتبول جانكۇيەرلەرى بۇلاي جاساماسا كەرەك. بۇل اقىماقتاردىڭ ارەكەتى» دەپ اياقدوپشىلارعا ارا تۇسۋدە.
بەكەن قايرات ۇلى, «ەگەمەن قازاقستان»