باسپانالى بولۋ – ءار ادامنىڭ ارمانى. سول ارمانداعان باسپاناسىنا قول جەتكىزۋ ءۇشىن بىرەۋلەر قاجەتتى قاراجاتتى جىلداپ جينايدى. ەكىنشى بىرەۋلەر نەسيە الادى, قارىزدانادى. ال ءۇشىنشى بىرەۋلەر تەز ارادا باسپانالى بولعىسى كەلىپ جەڭىل جول ىزدەيدى. الايدا وسى ادامداردىڭ قايسىبىرى الاياقتار قۇرىعىنا ءتۇسىپ قالىپ جاتادى. اسىرەسە جەڭىل جول ىزدەيتىندەر مەملەكەتتىك باعدارلاما ارقىلى پاتەر الىپ بەرەمىز دەيتىن ادامدارعا الدانادى. وسى ورايدا مۇنداي الاياقتاردىڭ ارباۋىنا ءتۇسىپ, قاپىدا قالماس ءۇشىن نەنى ءبىلىپ, نە ىستەۋ كەرەك دەگەن سۇراققا ادۆوكات سەيفۋللا شىڭعىس جاۋاپ بەرەدى.
– راسى كەرەك, بۇل ماسەلە بۇگىندە ۋشىعىپ تۇر. «مەملەكەتتىك باعدارلاما ارقىلى پاتەر الىپ بەرەمىن» دەيتىن الاياقتار كەز كەلگەن ادامنىڭ سەنىمىنە وڭاي كىرەدى. وسى ورايدا جىلداپ جيناعان بار اقشاسىنان ايىرىلىپ قالىپ, سان سوعىپ جۇرگەندەر قاتارى ازايار ەمەس. قارجىسىن قايتارۋ ءۇشىن ىشكى ىستەر ءبولىمىنىڭ تابالدىرىعىن توزدىرىپ جۇرگەندەر قانشاما. بىراق, وكىنىشكە قاراي, كوپ جاعدايدا الاياقتار جاۋاپكەرشىلىكتەن قۇتىلىپ كەتەدى. بۇعان نە سەبەپ دەيسىز عوي؟ وعان سەبەپ, پوليتسيانىڭ قاۋقارسىزدىعى ەمەس, الاياقتاردىڭ الدىن الا ۇستالماۋ امالىن جان-جاقتى قاراستىرىپ, قانداي تىعىرىقتان دا شىعۋدىڭ جولىن تاۋىپ قويعاندىعىندا جاتىر. قالاي دەيسىز عوي. ولار جابىرلەنۋشىدەن اقشانى قولحات نەمەسە قارىزعا اقشا بەرۋ تۋرالى نوتاريۋسپەن بەكىتىلگەن كەلىسىمشارتپەن الادى. ءسويتىپ قىلمىستى ازاماتتىق قارىم-قاتىناسقا اۋىستىرىپ, سۇتتەن اق, سۋدان تازا بولىپ شىعا كەلەدى. ال باس پروكۋراتۋرانىڭ جالپى قىلمىس تۋرالى ارىز-شاعىمداردى تىركەۋ تارتىبىنە سايكەس, ولاردىڭ ىشىندە قولحات نەمەسە كەلىسىمشارتتار نەگىزىندە تۋىنداعان قارىم-قاتىناستار بويىنشا ارىزدارعا قىلمىستىق ءىس قوزعالمايتىنى بەكىتىلگەن. الاياقتاردىڭ وسى امالىنا كوپ ادامدار ءمان بەرە قويمايدى.
ەندەشە الاياققا جەم بولۋدىڭ بىردەن-ءبىر سەبەبى, كۇماندى ۇسىنىستارعا الدانۋ ەكەن. الاياقتار ۇسىنعان امالدىڭ زاڭعا سايكەس ەمەستىگى بارشاعا ءمالىم. كەزەكتەن تىس باسپانا الامىن دەپ نيەتتەنگەندەر, مۇنىڭ زاڭسىز ەكەنىن ءبىلىپ تۇرسا-داعى تاۋەكەلگە بارادى. ال ونىڭ اقىرى كوپ جاعدايدا نەمەن اياقتالاتىنىن ايتپاسا دا تۇسىنىكتى. سوندىقتان باسپانا ساتىپ الاردا الاياققا جەم بولعىڭىز كەلمەسە, جوعارىداعىداي كۇماندى امالدارعا جولاماعان دۇرىس. بۇل قاراجاتىڭىزدى ۇنەمدەۋدىڭ بىردەن-ءبىر جولى. باسپاناعا قول جەتكىزە الماساڭىز دا, اقشاڭىز وزىڭىزدە قالادى. ال اقىرى, الاياققا الدانىپ, ونىڭ قىلمىسىن دالەلدەۋ كەرەك بولسا, ءبىراز تەر توگۋگە تۋرا كەلەدى.
ارىزدانباس بۇرىن, ايعاقتاردى جيناستىرىڭىز. الاياقپەن كەزدەسكەنىڭىزدى, وعان اقشا بەرگەنىڭىزدى كورگەن كۋالاردى تابۋ قاجەت. قولىڭىزداعى كەلىسىمشارت نەمەسە قولحات جانە باسقا دا ايعاق بولار قۇجاتتاردى جيناۋ كەرەك. ەگەر الاياقپەن تەلەفون ارقىلى سويلەسكەندە اڭگىمە بارىسى, جىبەرىلگەن قىسقا حابارلار جازىلىپ قالعان بولسا, تىپتەن دۇرىس. سونىمەن قاتار الاياقتىڭ ارەكەتىنەن جاپا شەككەن باسقا ادامداردى تابۋعا ارەكەت جاساعان ءجون. ال ونىڭ ءبىر عانا ءسىزدى الداپ قويماعانى انىق.
جازىپ العان
الەكساندر تاسبولات, «ەگەمەن قازاقستان»