16 شىلدەدەن باستاپ اپتاسىنا 4 رەت (دۇيسەنبى, سارسەنبى, جۇما, سەنبى كۇندەرى) «ماسكەۋ-قىزىلوردا-ماسكەۋ» جاڭا اۋە باعىتى ءوز جۇمىسىن باستايدى. اۋە تاسىمالى «اەروفلوت» كومپانياسىنىڭ ا-320/321 «ەيرباس», «Boeing-737» ۇشاعى ارقىلى جۇرگىزىلەدى.
سونىمەن قاتار, «بايقوڭىر-قىزىلوردا (اۋەجاي)» ترانسفەرى دايىندالادى.
«وسى جىلدىڭ مامىر ايىندا «قورقىت اتا» اۋەجايىنىڭ قىزمەتكەرلەرى «اۆياتسيالىق اەروفلوت مەكتەبىنىڭ» ماماندارىنان ارنايى وقۋدان ءوتىپ, ا320/321 اۋە كەمەسىنىڭ تەحنيكالىق قىزمەت كورسەتۋ دايارلىعىن تەكسەرۋدەن وتكىزدى.
سونىمەن قاتار, قىزىلوردا وبلىسى جولاۋشىلار كولىگى جانە اۆتوموبيل جولدارى باسقارماسى بايقوڭىر قالاسىنىڭ اكىمشىلىگىمەن اۋە باعىتىنىڭ جۇمىسىن جانداندىرۋ ماقساتىندا اۋەجايعا باراتىن اۆتوبۋستار ماسەلەسى تۋرالى جۇمىستاردى اتقاردى. «اەروفلوت» كومپانياسى ارقىلى ۇشۋ باسقا اۋە كومپانيالارىمەن سالىستىرعاندا ءبىرشاما ارزان», - دەدى وبلىس اكىمىنىڭ ورىنباسارى سەرىك سۇلەيمەنوۆ.
ايتا كەتەيىك, بۇگىنگى كۇنى العاشقى رەيسكە بيلەتتىڭ كوپ بولىگى ساتىلعان.
كەستە بويىنشا ۇشاقتىڭ كەلۋ ۋاقىتى – 06:10, ۇشۋ ۋاقىتى جەرگىلىكتى ۋاقىتپەن – 07:20. ساتىپ العان ۋاقىتىنا قاراي بيزنەس-كلاسس بيلەتتەرىنىڭ باعاسى – 167 000-نان باستالسا, ەكونوم-كلاسس بيلەتتەرى 26000-نان باستالادى.