وبلىستىق توتەنشە جاعدايلار دەپارتامەنتى جەدەل قۇتقارۋ جاساعىنىڭ حابارىنشا, 1-9 شىلدە ارالىعىندا جازعى سۋعا شومىلۋ كەزىندە سۋداعى وقىس وقيعالار كۇرت كوبەيىپ كەتىپتى. سۋعا كەتكەن 8 ادامنىڭ 4-ءى بالا كورىنەدى.
«ەرتىس وزەنىنىڭ جاعاسىندا 22 جاعاجاي رەسمي تۇردە اشىلدى. بىراق, ادامدار وبلىس ورتالىعىنداعى وزەن پورتىنىڭ سۋ ايدىنى, ۋسولكا وزەنى جاعالاۋى, اۆتوجول كوپىرى اۋماعى, «التىن-قۇم» دەمالىس ايماعى, اقسۋ گرەس-ءنىڭ سۋ توگۋ ارناسى, مۇناي بازاسىنىڭ جاعالاۋى, ەكىباستۇز گرەس-2 جاساندى سۋ قويماسى, ق.ساتباەۆ اتىنداعى ارنانىڭ سۋ قويماسى سياقتى سۋعا شومىلۋ ءۇشىن اسا قاۋىپتى ورىندارعا بارىپ سۋعا تۇسەدى», - دەيدى قۇتقارۋشىلار.
جاز ماۋسىمىنىڭ باسىنان بەرى قۇتقارۋ بولىمشەلەرى مەن سۇڭگۋىر اپاتتىق-قۇتقارۋ جاساعى سۋداعى بولىپ قالار توتەنشە جاعدايلاردى جويۋ ءۇشىن كۇشەيتىلگەن رەجيمدە جۇمىس ىستەۋگە كوشكەن. سەنبى جانە جەكسەنبى كۇندەرى جاسىباي جانە سابىندىكول كولدەرىندە دەمالىس ايماقتارىنا دەمالۋشىلاردىڭ سانى 10 مىڭ ادامعا جەتەدى. وتكەن اپتادا قۇتقارۋ جيلەتىنسىز كاتاماراندا سەرۋەندەۋشىلەر جاسىباي كولىنە باتىپ كەتكەن. دەر كەزىندە قۇتقارىلىپتى.
«بۇل ءبىر ساتتىك قانا ءسات. سۋعا تۇسكەن كەزدە دە, جالپى دەمالۋعا شىققان كەزدە بارلىق جاعدايدا ساقتىق قاجەت. ءبىز تۇرعىندارعا وسىنى تالاي رەت ەسكەرتتىك, ولاردىڭ ومىرلەرىن ساقتاپ قالۋ ءۇشىن ەسكەرتۋدەن جالىقپايمىز: ويكەنى, بۇل ءبىزدىڭ مىندەتىمىز»,- دەيدى باس قۇتقارۋشى ەرقانات اققوزينوۆ.
قازىر ەرتىس وزەنىندەگى سۋدىڭ دەڭگەيى جوعارى. سوندىقتان سۋعا شومىلۋ كەزىندە ساق بولۋ قاجەت. جاعاجايلارعا جاقىن جانە سۋعا شومىلۋ ءۇشىن اسا قاۋىپتى جەرلەردە 100-دەن استام ەسكەرتۋ جانە تىيىم سالۋ بەلگىسى ورناتىلعان.
فاريدا بىقاي
«ەگەمەن قازاقستان»
پاۆلودار