قازاقستان پارلامەنتىنىڭ دەلەگاتسياسى 7-11 شىلدە ارالىعىندا ەۋروپاداعى قاۋىپسىزدىك جانە ىنتىماقتاستىق ۇيىمى پارلامەنتتىك اسسامبلەياسىنىڭ بەرليندەگى جىل سايىنعى 27-ءشى سەسسياسىنا قاتىسۋدا, دەپ حابارلايدى پارلامەنت سەناتىنىڭ ءباسپاسوز قىزمەتى.
قازاقستاندىق دەلەگاتسيا قۇرامىنا سەنات دەپۋتاتتارى تولەۋبەك مۇقاشەۆ, دۋلات قۇسداۋلەتوۆ, ميحايل بورتنيك, سونداي-اق ءماجىلىس دەپۋتاتتارى سۆەتلانا بىچكوۆا مەن قۇرالاي قاراكەن ەنگەن بولاتىن.
بەرلين سەسسياسى «ەقىۇ اياسىنداعى مىندەتتەمەلەردى ورىنداۋ: پارلامەنتتەر ءرولى» تاقىرىبىنا ارنالدى. 8 شىلدەدەگى جالپى وتىرىس بارىسىندا تاريحي رەيحستاگ عيماراتىندا ۇيىمعا قاتىسۋشى مەملەكەتتەردىڭ مۇشەلەرى ەقىۇ كەڭىستىگىندەگى ۇزاققا سوزىلعان تەكە-تىرەستەر, ەۋروپاداعى كوشى-قون شيەلەنىستەرى, تەرروريزممەن كۇرەس, ايەلدەر قۇقىقتارىن كەڭەيتۋ مەن ولاردىڭ قاقتىعىستاردى بولدىرماۋعا جانە ونى شەشۋگە قاتىسۋى سەكىلدى الەم قوعامداستىعى الدىندا تۇرعان قازىرگى زامان قاتەرلەرىن تالقىلادى.
ەقىۇ پا سەسسياسىنا قاتىسۋشىلار تەكە-تىرەستەردى بەيبىت شەشۋ, مەملەكەتتەردىڭ ەگەمەندىك تەڭدىگى جانە ولاردىڭ اۋماقتىق تۇتاستىعى, حالىقارالىق قۇقىق ەرەجەلەرىنىڭ ساقتالۋىمەن قاتار ۇيىمنىڭ قاعيدالارىنان اينىمايتىنىن ناقتىلادى.