قوستانايدا وتكەن پرەزيدەنت كوپ سايىسى بويىنشا ىشكى ىستەر مينيسترلىگى ۇيىمداستىرعان رەسپۋبليكالىق چەمپيوناتتا قوستانايلىق پوليتسەيلەر ءبىرىنشى ورىندى قانجىعالادى. چەمپيوناتقا ەلىمىز ايماقتارىنداعى ىشكى ىستەر دەپارتامەنتتەرىنىڭ 120 وكىلى قاتىستى. ارينە, ولاردىڭ اراسىندا الاڭ يەسى «دينامو» دەنەشىنىقتىرۋ-سپورت ۇيىمى دا بار.
جارىستا جۇزۋدەن, 1000/3000 مەترگە جۇگىرۋدەن, جامبى اتۋدان, الىسقا گراناتا لاقىتۋدان, ۇزىندىققا سەكىرۋدەن ەلىمىزدەگى پوليتسەي-سپورتشىلار سايىسقا ءتۇستى. جارىس قورىتىندىسى بويىنشا قوستاناي وبلىستىق ىشكى ىستەر دەپارتامەنتىنىڭ قۇراما كومانداسى جالپى كوماندالىق ءبىرىنشى ورىندى الدى. ەكىنشى ورىن سولتۇستىك قازاقستان سپورتشىلارىنا, ءۇشىنشى ورىن قاراعاندىلىقتارعا بۇيىردى.
«قوستاناي وبلىستىق ىشكى ىستەر دەپارتامەنتىندە قىزمەتكەرلەردىڭ سپورتپەن شۇعىلدانۋىنا, سپورت تۇرلەرىن دامىتۋعا كوپ كوڭىل بولىنەدى. بۇل جولعى چەمپيونات قوستانايلىق پوليتسەيلەردىڭ سپورتتىق جوعارى دايىندىعىن جانە جەڭىسكە دەگەن ەرىك-جىگەرىن كورسەتتى», - دەدى «دينامو» دەنەشىنىقتىرۋ-سپورت ۇيىمى» قوعامدىق بىرلەستىگىنىڭ ورتالىق كەڭەسى باسقارماسىنىڭ باسشىسى نيكولاي كنيازەۆ.
ءنازيرا جارىمبەت
«ەگەمەن قازاقستان»
قوستاناي