«انا ءتىلى» جانە «قازاق ادەبيەتى» گازەتتەرىنىڭ باسشىلارى اۋىستى

بۇرىنعى «قازاق ادەبيەتى» گازەتىنىڭ باس رەداكتورى اقىن, جۋرناليست جاناربەك ءاشىمجان «انا ءتىلى» گازەتىنىڭ باس رەداكتورى بولىپ تاعايىندالدى. ال «قازاق ادەبيەتى» گازەتىنىڭ باس رەداكتورى قىزمەتىنە «اباي-اقپارات» قازاقستان ينتەرنەت كەڭىستىگىن دامىتۋ قورى» قوعامدىق قورىنىڭ پرەزيدەنتى داۋرەن قۋات كەلدى. 

جاناربەك ءاشىمجان 1976 جىلى 1 ساۋىردە الماتى وبلىسى, كەگەن اۋدانى, جالاڭاش اۋىلىندا تۋعان. 1999 جىلى ءالفارابي اتىنداعى قازاق مەملەكەتتىك ۇلتتىق ۋنيۆەرسيتەتىنىڭ جۋرناليستيكا فاكۋلتەتىن بىتىرگەن.

1996–1999 جج. قالالىق «الماتى اقشامى» گازەتىندە ءتىلشى, 2000 جىلى «قازاقستان» جۋرنالىندا ءبولىم رەداكتورى قىزمەتتەرىن اتقارعان.   

2000–2005 جج. رەسپۋبليكالىق «جاس الاش» گازەتىندە ءبولىم مەڭگەرۋشىسى, 2005–2008 جج. رەسپۋبليكالىق «جاس قازاق» ۇلتتىق اپتالىعىندا باس رەداكتوردىڭ ورىنباسارى بولىپ قىزمەت ەتكەن.   

2008 جىلدان باستاپ قازاقستان جازۋشىلار وداعىنا قاراستى «جۇلدىز», «پروستور», «سىن» جۋرنالدارى مەن «قازاق ادەبيەتى» گازەتتەرىن بىرىكتىرگەن «قالامگەرمەديا» ورتالىعىنىڭ ديرەكتورى قىزمەتىن اتقارعان.   

داۋرەن قۋات 1973 جىلى بۇرىنعى تالدىقورعان وبلىسى, قاپال اۋدانى, اششىبۇلاق اۋىلىندا دۇنيەگە كەلگەن. م.قاشقاري اتىنداعى جانە ع.مۇسىرەپوۆ اتىنداعى سىيلىقتاردىڭ لاۋرەاتى. 

1990 جىلى اۋداندىق «قاپال ەڭبەككەرى» گازەتىنىڭ ءتىلشىسى;

1993 جىلى وبلىستىق «جەرۇيىق» گازەتىنىڭ ءتىلشىسى;

1994 جىلى رەسپۋبليكالىق «حالىق كەڭەسى» گازەتىنىڭ بۇرىنعى تالدىقورعان وبلىسىنداعى (قازىرگى الماتى وبلىسى) مەنشىكتى ءتىلشىسى;

1996 – 1997 جىلدار ارالىعىندا ەلارالىق «قازاق ەلى» حالىقارالىق گازەتىنىڭ مەنشىكتى ءتىلشىسى, ءبولىم مەڭگەرۋشىسى;

1997 – 1999 جىلدار ارالىعىندا رەسپۋبليكالىق «جاس الاش» گازەتىنىڭتىلشىسى, ءبولىم مەڭگەرۋشىسى;

2000 – 2001 جىلدار ارالىعىندا رەسپۋبليكالىق «التىن وردا» گازەتى باس رەداكتورىنىڭ ورىنباسارى;

2001 – 2003 جىلدار ارالىعىندا «حابار» ارناسىنداعى «مايدان» تەلەباعدارلاماسىنىڭ رەداكتورى, م.و.اۋەزوۆ اتىنداعى ادەبيەت ينستيتۋتىنىڭ كىشى عىلىمي قىزمەتكەرى;

2002 – 2003 جىلدار ارالىعىندا «قازاق ادەبيەتى» گازەتى باس رەداكتورىنىڭ ورىنباسارى;

2004 -2007 جىلدارى رەسپۋبليكالىق «التىن وردا» گازەتىندە باس رەداكتور;

2008 – 2009 جىلدارى رەسپۋبليكالىق «جاس قازاق» گازەتىنىڭ باس رەداكتورى;

2009 جىلدان بەرى قاراي «Abai.kz» اقپاراتتىق پورتالىنىڭ باس رەداكتورى, «اباي-اقپارات» قازاقستان ينتەرنەت كەڭىستىگىن دامىتۋ قورى» قوعامدىق قورىنىڭ پرەزيدەنتى بولعان.

«قازاق ادەبيەتى» گازەتى قازاقستان جازۋشىلار وداعىنىڭ ورگانى رەتىندە 1934 جىلدىڭ قاڭتارىندا جارىق كوردى. گازەت بەتتەرىندە قازاق اقىن-جازۋشىلارىنىڭ ولەڭ, جىر, داستاندارى, اڭگىمە-وچەركتەرى, رومان, پوۆەستەرىنەن ۇزىندىلەر, قازاق ادەبيەتىنىڭ وتكەنى مەن بۇگىنى جانە كەلەشەگى جايلى بايىپتى ادەبي-سىن ماقالالار, دۇنيە ءجۇزى كلاسسيكتەرىنىڭ ۇزدىك تۋىندىلارىنان اۋدارمالار جاريالانادى.

«انا ءتىلى» گازەتىنىڭ العاشقى ءنومىرى 1990 جىلى 22 ناۋرىزدا جارىققا شىقتى. «انا ءتىلى» تەك مەملەكەتتىك ءتىل عانا ەمەس, ۇلتقا قاتىستى كەز كەلگەن كۇرمەۋلى ماسەلەلەردى كوتەرىپ كەلەدى. قازاقتىڭ ءتىلى, قازاقتىڭ اۋىلى, قازاق مەكتەبى, بالاباقشاسى, قازاق جاستارى, قازاق عىلىمى, ت.ب. كوپتەگەن تاقىرىپتار باسىلىم بەتتەرىنەن ءتۇسىپ كورگەن ەمەس.