قوعامدىق كەڭەستەر جونىندەگى زاڭنامانى جەتىلدىرۋ اياسىندا قوعامدىق كەڭەستەردەگى مەملەكەتتىك ورگانداردىڭ قاتىسۋىن 10 پايىزعا دەيىن قىسقارتۋ ۇسىنىلۋدا. بۇل تۋرالى قوعامدىق دامۋ ۆيتسە-ءمينيسترى ابزال نۇكەنوۆ پاريج قالاسىندا (فرانتسيا) وتكەن ەكونوميكالىق ىنتىماقتاستىق جانە دامۋ ۇيىمى (ەىدۇ) سىبايلاس جەمقورلىققا قارسى جۇيەسىنىڭ پلەنارلىق وتىرىسىندا حابارلادى.
ۆيتسە-مينيستر ابزال نۇكەنوۆ ءوز سوزىندە قوعامدىق كەڭەستەردى جەتىلدىرۋ بويىنشا قابىلدانىپ جاتقان ءىس-شارالار تۋرالى باياندادى. ول قوعامدىق كەڭەستەر جونىندەگى زاڭ جوباسى تۇجىرىمداماسىنىڭ جوباسى ازىرلەنىپ, قر ادىلەت مينيسترلىگىنە ەنگىزىلگەنىن اتادى. وزگەرىستەر قوعامدىق كەڭەس مۇشەلەرىن قالىپتاستىرۋ, روتاتسيالاۋ, وكىلەتتىكتەرىن توقتاتۋ مەحانيزمدەرى جانە كەڭەس قىزمەتىن قارجىلاي, ماتەريالدىق-تەحنيكالىق قامتاماسىز ەتۋ ماسەلەلەرىنە قاتىستى بولادى. سونىمەن قاتار, قوعامدىق كەڭەستەرگە مەملەكەتتىك ورگانداردىڭ قاتىسۋىن 10 پايىزعا دەيىن قىسقارتۋ ۇسىنىلۋدا. قولدانىستاعى زاڭناماعا سايكەس مەملەكەتتىك ورگانداردىڭ قوعامدىق كەڭەستەرگە قاتىسۋى مۇشەلەرىنىڭ جالپى سانىنىڭ ۇشتەن ءبىر بولىگىنەن اسپاۋى ءتيىس.
ەىدۇ ساراپشىلارى ءوز كەزەگىندە, قازاقستاندا قوعامدىق كەڭەستەردى جەتىلدىرۋ بويىنشا قابىلدانىپ جاتقان ءىس-شارالارعا وڭ باعا بەردى.
ساراپشىلاردىڭ پىكىرىنشە, بۇل وزگەرىس قوعامدىق كەڭەستەردىڭ ماقساتى مەن مىندەتتەرىنە قاتىستى قوعامنىڭ وڭ پىكىرىن قالىپتاستىرادى. سونىمەن قاتار, مەملەكەتتىك ورگاندار مەن تۇرعىندار اراسىنداعى سۇحبات الاڭى رەتىندە قوعامنىڭ سەنىمىن ارتتىرادى.
ەىدق وتىرىسىنىڭ نەگىزگى ماقساتى – سىبايلاس جەمقورلىققا قارسى ستامبۋلدىق ءىس-قيمىل جوسپارىن تالداۋدىڭ 4-ءشى كەزەڭى اياسىندا ارمەنيا, قىرعىزستان جانە ۋكراينانىڭ تالداۋ ەسەبىن, سونىمەن قوسا ءازىربايجان, قازاقستان, گرۋزيا, مونعوليا, تاجىكستان, ۋكراينا جانە وزبەكستان بويىنشا ارالىق ەسەپتەردى تالقىلاۋ جانە بەكىتۋ.