استانا قالاسىنداعى «بارىس ارەنا» مۇز ايدىنىندا استانانىڭ 20 جىلدىق مەرەيتويى اياسىندا كاسىپقوي بوكس كەشى ءوتتى. بۇل شارانىڭ باستى جەكپە-جەگى قازاقستاندىق بىلعارى قولعاپ شەبەرى بەيبىت شۇمەنوۆ (18-2, 12 كو) پەن تۇركيا ەلىنىڭ بوكسشىسى حيزني التۋنكايا (30-2, 17 كو) اراسىندا وتكەن بولاتىن.
اتالعان بوكس كەشى الدىندا بۇكىلالەمدىك بوكس ۇيىمىنىڭ (WBA) كەڭەيتىلگەن جينالىسى ءوتتى. جيىندا WBA ۆيتسە-پرەزيدەنتى حوسە وليۆەر ۇيىمنىڭ جۇمىسى تۋرالى كەڭىنەن اڭگىمەلەپ, WBA نەلىكتەن شۇمەنوۆكە قولداۋ بىلدىرگەنىن ايتىپ, ونىڭ كاسىپقوي رينگتەگى مۇمكىندىكتەرىنە باعا بەردى.
– الدىمەن قازاقستانعا كەلگەنىمە قۋانىشتى ەكەنىمدى ايتقىم كەلەدى. ءيا, بەيبىت ۇيىمنىڭ العاشقى اۋىر سالماقتاعى بەلبەۋى ءۇشىن جۇدىرىقتاسادى. سەبەبى بەيبىت بەلبەۋدى جەكپە-جەكتەن جەڭىلىپ بەرگەن جوق. سوندىقتان ءبىز وعان چەمپيوندىعىن قايتارىپ الۋعا مۇمكىندىك بەرىپ وتىرمىز. جاقسى جەكپە-جەك جانە بەيبىتتىڭ ۇلكەن بوكسقا ورالۋىن كۇتەمىز. قازاقستانمەن بايلانىسىمىز تىعىز, مۇندا WBA دەلەگاتسياسىن الا كەلدىك. بولاشاقتا كىممەن جۇمىس ىستەۋگە بولاتىنىن قاراپ ءجۇرمىز. قازاقستاندا كاسىپقوي بوكسشىلار قاتارى كوبەيىپ كەلەدى, – دەپ اتاپ ءوتتى حوسە وليۆەر. سونداي-اق ول قازاقستاندا اۋەسقوي بوكستىڭ قارقىندى دامىپ كەلە جاتقانىن, اۋەسقوي بوكستاعى جەتىستىكتەرىمىزدەن حاباردار ەكەنىن جەتكىزدى. بولاشاقتا قازاق بوكسشىلارىمەن تىعىز قارىم-قاتىناستا جۇمىس ىستەپ, ءبىزدىڭ ەلدىڭ بوكسشىلارىنا باسىمدىق بەرەتىندەرىن دە تىلگە تيەك ەتتى.
نەگىزگى جەكپە-جەك باستالماس بۇرىن, «بارىس ارەنا» سپورت كەشەنىنە جينالعان جانكۇيەر قاۋىم كاسىپقوي بوكستا باق سىناپ جۇرگەن ءبىر توپ قازاقستاندىق بوكسشىلاردىڭ ونەرىن تاماشالادى. بوكس كەشىنىڭ شىمىلدىعىن قازاق ەلىنە انشىلىك قىرىمەن تانىلعان يبراگيم ەسكەندىر (4-0, 4 كو) اشىپ بەردى. ول رەسەيلىك قارسىلاسى سەرىك اجىباەۆتى (0-1) ءبىرىنشى راۋندتىڭ العاشقى مينۋتىندا, ال ءبىرىنشى اۋىر سالماقتا سىنعا تۇسەتىن ەدىل قوجامبەرديەۆ (4-2, 4 كو) تاعى ءبىر رەسەيلىك بوكسشى سەرگەي بەلوشاپكيندى (11-27-1, 3 كو) ەكىنشى راۋندتا تەحنيكالىق نوكاۋت- پەن جەڭدى. 2004 جىلى افينى وليمپياداسىنا قاتىسقان جەڭىل سالماقتاعى مەيىرجان راحىمجانوۆ كاسىپقوي بوكستاعى دەبيۋت كەزدەسۋىن وتكىزىپ, ءبىرىنشى راۋندتان سوڭ تورەشىلەر شەشىمىمەن جەڭىسكە جەتتى. ءۋاليحان بيسەنقۇلوۆ (6-0, 6 كو) سەگىز راۋندقا جوسپارلانعان كەزدەسۋدە ازەربايجاندىق قارسىلاسى انار ابدۋللاەۆتى (2-2, 2 كو) كەزدەسۋدىڭ ەكىنشى راۋندىندا تەحنيكالىق نوكاۋتپەن تىزە بۇكتىردى.
سونداي-اق ايدان ەلجانوۆ (5-1, 3 كو) ازەربايجاندىق اسقار راگيموۆتى (2-1, 1 كو) ۇپاي سانىمەن, دياس تاستەمىروۆ (3-0, 3 كو) جەڭىلىپ كورمەگەن ازەربايجان ەلىنىڭ بوكسشىسى ەلۆين احۋنزادانى (5-1, 2 كو) ەكىنشى راۋندتا مەرزىمىنەن بۇرىن جەڭدى. ال بوبىرجان مومىنوۆ (7-0, 6 كو) گرۋزيادان كەلگەن گيورگي بليادزەنى (8-7, 3 كو) بەسىنشى راۋندتا تەحنيكالىق نوكاۋتپەن جەڭدى. WBA Asia بەلدىگى ءۇشىن شارشى الاڭعا ايدوس ەربوسىن ۇلى (8-0, 6 كو) مەن ازەربايجاندىق يسمات ەينۋللاەۆ (13-3, 9 كو) شىعىپ, وتانداسىمىز العاشقى راۋندتا قارسىلاسىنان باسىم ءتۇسىپ, كارەراسىنداعى تۇڭعىش بەلدىگىنە قول جەتكىزدى. ارمان رىسبەك (4-0, 3 كو) گرۋزيالىق بوكسشى ساندرو تەراشۆيليدەن (5-2, 2 كو) ءبىرىنشى راۋندتىڭ ءبىرىنشى مينۋتىندا باسىم ءتۇستى. نەگىزگى جەكپە-جەك الدىنداعى سوڭعى كەزدەسۋدە قازاقستاندىق ءالي بالوەۆ (5-0, 4 كو) ازەربايجاندىق بىلعارى قولعاپ شەبەرى كازيم ۋمۋدوۆتى (2-0, 1 كو) 30 سەكۋند ىشىندە سۇلاتىپ سالدى.
ال بوكس كەشىنىڭ باستى جەكپە-جەگى جوعارىدا ايتقانىمىزداي, بەيبىت شۇمەنوۆ پەن تۇركيالىق حيزني التۋنكايا اراسىندا ءوربىدى. بۇعان دەيىن وتكىزگەن 29 جەكپە-جەگىنىڭ تەك بىرەۋىندە عانا جەڭىلگەن تۇركيالىق بوكسشىنى وسال دەپ ايتا المايمىز. ويتكەنى ول 17 قارسىلاسىن مەرزىمىنەن بۇرىن, ياعني نوكاۋتپەن جەڭگەن. ون ەكى راۋندتىق فورماتتا وتكەن جەكپە-جەكتە ورتاعا ءبىرىنشى اۋىر سالماقتاعى WBA تۇجىرىمىنىڭ ۆاكانتتى بەلدىگى ساراپقا سالىندى.
اراعا ەكى جىلدان اسا ۋاقىت سالىپ كاسىبي شارشى الاڭعا ورالعان قازاقستاندىق بوكسشى بەيبىت شۇمەنوۆ كەزدەسۋ باستالا سالا قارسىلاسىن سوققىنىڭ استىنا الىپ, ءبىرىنشى راۋندتا ءبىر رەت نوكداۋنعا ءتۇسىردى. بۇيىردەن تيگەن سوققىدان كەيىن تۇرىك بوكسشىسى ءبىر تىزەرلەپ الدى. وسىلايشا, وتانداسىمىز ءوزىنىڭ بوكستا الىنباي قالعان ەنشىسى بار ەكەنىن, ۇلكەن بوكسقا بوستان-بوسقا ورالماعانىن دالەلدەي تۇسكەندەي بولدى. كەيىنگى راۋندتاردا ەكى بوكسشى دا ءبىر-ءبىرىنىڭ وسال تۇسىن ىزدەپ, ءبىراز اڭدىسىپ باقتى. دەگەنمەن, بەيبىت رەتى كەلگەندە شابۋىلعا شىعىپ, قارسىلاسىن سوققىسىمەن بۇرىشتان-بۇرىشقا تىقسىرۋمەن بولدى.
جەكپە-جەكتىڭ ءتورتىنشى بولىگىنە كەلگەندە بەيبىت شۇمەنوۆتىڭ ەكىنشى تىنىسى اشىلعانداي, شابۋىلدى ۇدەتە ءتۇستى. ونىڭ اۋىر سوققىلارى قارسىلاسىنىڭ ەسىن جيدىرماي, əبدەن تيتىقتاتتى. قاشا ءجۇرىپ جۇدىرىقتاسقان حيزني دە ءوزىنىڭ قاراجاياۋ ەمەستىگىن دالدەپ باققىسى كەلدى. ورايى كەلگەندە سوققى جاساپ قالۋعا ۇمتىلدى. بىراق ونىسىنان تۇك شىقپادى. توعىزىنشى راۋندتا بەيبىتتىڭ ءدوپ تيگەن تاعى ءبىر سوققىسىنان كەيىن حيزني التۋنكايا ەكىنشى رەت نوكداۋن الدى. وسى ءبىر سوققىدان سوڭ تۇركيالىق بوكسشى جەكپە-جەكتى جالعاستىرۋدان باس تارتىپ, جەڭىلگەنىن مويىندادى. تەحنيكالىق نوكاۋت!
سونىمەن ەكى جىلدىق ۇزىلىستەن شارشى الاڭعا جەڭىس ءۇشىن, چەمپيوندىق اتاق ءۇشىن قايتا ورالعان 34 جاستاعى بەيبىت شۇمەنوۆ ءوزىنىڭ 18-ءشى جەكپە-جەگىندە جەڭىسكە جەتىپ, ءبىرىنشى اۋىر سالماقتاعى WBA تۇجىرىمىنىڭ چەمپيوندىق بەلدىگىن يەمدەندى. استانانىڭ 20 جىلدىق مەرەيتويىنا وراي وتكىزگەن بوكس كەشىنەن سوڭ بەيبىت شۇمەنوۆ ءسوز سويلەپ, جەڭىسىن استانا كۇنىنە ارنادى.
ايتا كەتەيىك, شۇمەنوۆ كاسىپقوي بوكستاعى سوڭعى كەزدەسۋىن 2016 جىلدىڭ مامىر ايىندا امەريكالىق دجۋنيور ەنتوني رايتقا قارسى وتكىزىپ, تەحنيكالىق نوكاۋتپەن جەڭىسكە جەتكەن بولاتىن.
ءالي بيتورە,
«ەگەمەن قازاقستان»