بۇگىن سەنات دەپۋتاتتارى قازاقستان پرەزيدەنتىنىڭ «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىن ىسكە اسىرۋ اياسىندا تەمىرجولداعى ماشينا جاساۋ سالاسىن ودان ءارى دامىتۋ جانە كولىك-لوگيستيكا ينفراقۇرىلىمىنىڭ تيىمدىلىگىن ارتتىرۋ ماسەلەلەرى بويىنشا «قازاقستان تەمىرجولى» اكتسيونەرلىك قوعامىنىڭ باسشىلىعىمەن كەزدەستى.
پارلامەنت سەناتى ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ توراعاسى اسقار بەيسەنباەۆ شارانى اشا كەلىپ, ماشينا جاساۋ – يندۋسترياسى دامىعان مەملەكەتتەگى ەكونوميكانىڭ ماڭىزدى سالاسى ەكەنىن اتاپ ءوتتى. ماشينا جاساۋ سالاسىنىڭ ورنىقتى دامۋى مەن سەنىمدى قىزمەت ەتۋى ەڭبەك ونىمدىلىگىن ارتتىرىپ, وندىرىستەگى ەكولوگيالىق قاۋىپسىزدىك دەڭگەيى مەن ەلىمىزدىڭ ەكونوميكالىق قاۋىپسىزدىگىن كورسەتەدى.
A.بەيسەنباەۆ مەملەكەت باسشىسى نۇرسۇلتان نازارباەۆ 2018 جىلعى 10 قاڭتارداعى «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىندا يندۋستريالاندىرۋ ون مىندەتتىڭ العاشقىسى بولىپ بەلگىلەگەنىن ەسكە سالىپ, بۇل سالا ەلىمىزدىڭ دامۋى مەن جاڭا تەحنولوگيالاردى ەنگىزۋ بارىسىندا كوش باسىندا تۇرۋى ءتيىس ەكەنىن اتاپ ءوتتى.
سەناتوردىڭ پىكىرىنشە, ساندىق تەحنولوگيانى, ونىڭ ىشىندە بلوكچەين سەكىلدىلەردىڭ جاپپاي ەنگىزىلۋىن قامتاماسىز ەتۋ كەرەك, ول جۇكتەر قوزعالىسىن ونلاين تۇرىندە قاداعالاۋعا جانە ءترانزيتتىڭ كەدەرگىسىز وتۋىنە, كەدەن وپەراتسيالارىن وڭايلاتۋعا مۇمكىندىك بەرەدى.
A.بەيسەنباەۆ قازىرگى زامانداعى مىندەتتەر ماشينا جاساۋشىلارعا جاڭا تەحنولوگيالاردى ەنگىزۋدى, ەڭبەك ونىمدىلىگىن ارتتىرۋ مەن ەكسپورتقا باعدارلانعان باسەكەگە قابىلەتتى ونىمدەر ءوندىرۋدى تالاپ ەتەتىنىن اتاپ ءوتتى. تابىسقا قول جەتكىزۋگە نيەتتەنگەن كاسىپورىندارعا تيىمدىلىكتى ارتتىرۋعا, تەحنيكالىق جاڭارۋلارعا قارجى بولۋگە, باسەكەگە قابىلەتتى ءونىم وندىرۋىنە جانە جاڭا نارىقتاردى يگەرۋىنە جان-جاقتى كومەك كورسەتىلەتىن بولادى.
سەنات دەپۋتاتى ەرىك سۇلتانوۆ تەمىرجولداعى ماشينا جاساۋ سالاسىنىڭ ماقساتتارى مەن مىندەتتەرى تۋرالى بايانداما جاسادى. ول مىڭداعان جاس ماماندارعا وسى سالادان تۇراقتى جۇمىس بەرىلگەنىن اتاپ ءوتتى. ارالاس سالالاردا ونداعان مىڭ جۇمىس ورىندارى اشىلدى. ءوندىرىستى جاڭا تەحنولوگيالارمەن جابدىقتاۋعا جانە جاڭا تەحنولوگيا ەنگىزۋگە جەكە مەنشىك بيزنەس ميللياردتاعان ينۆەستيتسيا بەرىپ وتىر.
ە.سۇلتانوۆ ەلىمىزدىڭ كولىك-لوگيستيكا كەشەنىنىڭ, ونىڭ ىشىندە كولىككە قاتىستى ماشينا جاساۋ سالاسىنىڭ الدىندا تۇرعان مىندەتتەردى ورىنداۋ ءۇشىن مەملەكەت بارلىق قاجەتتى جاعدايلاردى جاساپ كەلە جاتقانىن اتاپ ءوتتى. زاڭ شىعارۋ ورگانى سالانى زاڭنامالىق تۇرعىدا قامتاماسىز ەتىپ كەلەدى.
شاراعا «قازاقستان تەمىر جولى» ۇلتتىق كومپانياسى» اكتسيونەرلىك قوعامىنىڭ باسقارما توراعاسى قانات الپىسباەۆ باستاعان سالا وكىلدەرى قاتىستى.
كەزدەسۋ اياسىندا سەناتورلار «نۇرلى جول» تەمىرجول ۆوكزالىن, «لوكوموتيۆ قۇراستىرۋ زاۋىتى» اق, «ەلەكتروۆوز قۇراستىرۋ زاۋىتى» جشس, «تۇلپار - تالگو» جشس جانە استاناداعى «قتج» ۇك» تەمىرجول كولىگى قىزمەتكەرلەرىن باعالاۋ جانە دامىتۋ ورتالىعىن ارالادى.