الماتى اكىمى باۋىرجان بايبەك فرانتسيا ۇلتتىق اسسامبلەياسىنىڭ دەپۋتاتى, «فرانتسيا-قازاقستان» پارلامەنتارالىق دوستىق توبىنىڭ توراعاسى پەر كابارەمەن كەزدەستى.
تاراپتار مادەني-گۋمانيتارلىق بايلانىستاردى, سونىڭ ىشىندە ءبىلىم بەرۋ جانە تۋريستىك كلاستەردى دامىتۋ تاجىريبەسىن الماسۋ بويىنشا ىنتىماقتاستىقتى نىعايتۋ ماسەلەلەرىن تالقىلادى.
قازاقستاننىڭ تاۋەلسىزدىك جىلدارى ەكى ەل اراسىندا بارلىق باعىتتار بويىنشا سەرىكتەستىك قاتىناستارى ورنىقتى. بۇگىنگى كۇنى الماتىدا فرانتسۋز كاپيتالىمەن ساۋدا, تاماق ونەركاسىبى, كولىك پەن تەلەكوممۋنيكاتسيا سالالارى بويىنشا 60-تان استام كاسىپورىن جۇمىس ىستەيدى. الماتى مەن فرانتسيا اراسىنداعى تاۋار اينالىمى بيىلعى جىلدىڭ ءبىرىنشى توقسانىندا 13%-عا وسكەن. بۇلاردان وزگە, مەگاپوليستە فرانتسيا مادەنيەتى مەن ونەرىنە قاتىستى ءتۇرلى شارالار قالا تۇرعىندارى اراسىندا ءجيى ءوتىپ تۇرادى.
كەزدەسۋ بارىسىندا پەر كابارە ەكى ەل اراسىنداعى ىنتىماقتاستىقتىڭ ەڭ الدىمەن سەنىم مەن دوستىققا نەگىزدەلگەنىن اتاپ ءوتتى.
«بۇل مەنىڭ الماتىعا العاش كەلۋىم, بايقاعانىم قالا زاماناۋي ترەندتەر مەن جاڭا تەحنولوگيالار اكتسەنتى بويىنشا دامۋ ۇستىندە ەكەن.تاۋلاردىڭ تىم جاقىن ورنالاسۋى - الماتىنىڭ تۋريستىك تارتىمدىلىعىنىڭ تاپتىرماس ارتىقشىلىعى. وسى باعىتتى دامىتۋدا فرانتسۋز كومپانيالارىنىڭ تاجىريبەسى مول, بۇل ەكى جاقتى بايلانىستى ودان ءارى نىعايتۋدىڭ تاعى ءبىر سالاسى», - دەپ اتاپ ءوتتى فرانتسيا ۇلتتىق اسسامبلەياسىنىڭ دەپۋتاتى.
قازىرگى كەزدە الماتىدا «اليانس فرانسەز» وكىلدىگى بار. اباي اتىنداعى ۇلتتىق پەداگوگيكالىق ۋنيۆەرسيتەتتە ورتا ازياداعى العاشقى «سوربوننا-قازاقستان» ينستيتۋتى جۇمىس ىستەۋدە.
ال 2016 جىلى فرانتسيا استاناسى پاريجدە يۋنەسكو اياسىندا الماتىنىڭ 1000 جىلدىعى مەرەكەلەندى. الماتى مەن رەنن قالالارى باۋىرلاستىعىنىڭ 25 جىلدىعى قۇرمەتىنە اباي ەسكەرتكىشى اشىلدى.
ال كۇز ايىندا الماتىدا «تسيفرلى كۇز» فەستيۆالىن وتكىزۋ جسوپارلانعان, مۇندا قالا تۇرعىندارى مەن قوناقتارى تسيفرلى تەحنولوگيالار ارقىلى فرانتسۋز مادەنيەتى جانە ونەرىمەن تانىساتىن بولادى.
ەلۆيرا سەرىكقىزى,
«ەگەمەن قازاقستان»
الماتى