ۇلت ۇستازى ىبىراي التىنسارين: «مۇعالىم بارىنەن دە قىمبات» دەيدى. شىنىندا, ۇلكەن ۇمىتپەن ءبىلىم ۇياسىنىڭ تابالدىرىعىن اتتاعان ساتتە الدىڭنان ك ۇلىمسىرەي شىعاتىن, شىن نيەتپەن قارسى الاتىن, ءارىپ تانىتىپ, ازامات ەتىپ قاناتتاندىراتىن مۇعالىم اتا-انادان كەيىنگى ايالى الاقان يەسى ەكەنى انىق.
ۇستاز باقىتى – شاكىرتىنىڭ شاتتىعىنا كۋا بولۋ, سونى وزىنە مەرەي ساناپ, مارتەبەسىنىڭ ارتىپ ءجۇرۋى دەر ەدىك.
ۇرپاققا ساباق بولار ونەگە قالدىرعان ۇلاعاتتى ۇستازدىڭ قاتارىندا جاقىپ بايمۇقانوۆ تا بولعان ەدى. ول بۇكىل سانالى عۇمىرىن ۇستازدىققا ارناپ, مەكتەپ باسقارعان بىلىكتى ازامات بولاتىن. ومىردەن وزعانىنا بەس جىل بولعان ۇستازدىڭ قۇرمەتىنە جاقىندا الماتى وبلىسى, ىلە اۋدانى, قوسوزەن اۋىلىنداعى №14 ورتا مەكتەپتە ەسكە الۋعا ارنالعان بوكستان وبلىستىق تۋرنير ءوتتى.
ءتۋرنيردىڭ اشىلۋ سالتاناتىندا مەكتەپ ديرەكتورى كۇلايىم بالىقبەكوۆا جاقىپ بايمۇقان ۇلىنىڭ اتالعان مەكتەپتى جيىرما جىلدان ارتىق باسقارعانىن, ورىس مەكتەبىن قازاق ءتىلدى ۇلت مەكتەبىنە اينالدىرعانىن, بىرنەشە تولقىن ۇرپاق تاربيەلەگەنىن, جاس ۇستازداردىڭ ءبىلىم-بىلىگىن ارتتىرۋ ىسىنە سەپتىگى تيگەنىن العا تارتىپ, الداعى ۋاقىتتا ۇستازدىق اتىن جاڭعىرتۋ ماسەلەسىن دە قوزعادى. سول سەكىلدى پەداگوگيكا عىلىمدارىنىڭ دوكتورى, پروفەسسور تۇرسىنبەك بايمولداەۆ جانە وزگە دە ازاماتتار جاقىپ بايمۇقان ۇلىنىڭ ۇلت پەداگوگيكاسىنا قوسقان ۇلەسىن اتاپ ايتتى.
وبلىستىق تۋرنيرگە 20 كوماندا قاتىستى. جاستاردىڭ شارشى الاڭداعى كەزدەسۋىن وليمپيادا چەمپيونى ەرماحان ىبىرايىموۆ اشىپ, ءىزباسارلارىنا ساتتىلىك تىلەدى. تۋرنيرگە قاتىسقان 382 بالانىڭ 25-ءى توپ جارىپ, التىن مەدال مەن كۋبوككە يە بولسا, ەكىنشى ورىن العان 10 وقۋشى كۇمىس مەدالعا, ال 5 وقۋشى قولا مەدالعا قول جەتكىزدى.
تۋرنير قورىتىندىسىندا ەرماحان ىبىرايىموۆ مۇنداي جارىستاردى اۋىلدا ۇيىمداستىرۋدىڭ ماڭىزىن اتاپ ايتتى. شارانىڭ جاقسى وتۋىنە قارجى جاعىنان دەمەۋشىلىك جاساعان, اسىرەسە اۋىل مەكتەبىنىڭ سپورت زالىن جوندەۋدەن وتكىزىپ بەرگەن كاسىپكەر ۇلان بايمۇقانوۆقا, باسقا دا جاناشىر جاندارعا العىس ءبىلدىردى.
سۇلەيمەن مامەت,
«ەگەمەن قازاقستان»
الماتى وبلىسى,
ىلە اۋدانى