قالاداعى مادەنيەت سارايىندا وتكەن «الاشتىڭ نار جىگىتى» اتتى ەر ازاماتتار اراسىنداعى سايىس شاكارىم قۇدايبەردى ۇلىنىڭ 160 جىلدىعىنا, وتان قورعاۋشىلار كۇنى مەن جەڭىستىڭ 73 جىلدىعىنا ارنالدى. سايىستا 18 جاستان 40 جاس ارالىعىنداعى سەگىز ازامات وزدەرىنىڭ «سەگىز قىرلى, ءبىر سىرلى» جىگىت ەكەندىكتەرىن دالەلدەپ, سىنعا ءتۇستى.
ولاردىڭ ىشىندە اتاپ ايتساق, «اقشىڭ» ساۋدا ورتالىعىنىڭ اتقارۋشى ديرەكتورى ەرلان جاقىپوۆ, ارتيللەريالىق ديۆيزيانىڭ اسكەري قىزمەتشىسى ەرمەك تەڭىزباەۆ, №42 ورتا مەكتەپتىڭ مۇعالىمى امان قونىسبەكوۆ, ر.بايسەيىتوۆ اتىنداعى قارجى-ەكونوميكالىق كوللەدجىنىڭ ۇستازى سامات كارىپجانوۆ, «نۇرداۋلەت» بالالار باقشاسىنىڭ تاربيەشىسى ەرنۇر اقپاروۆ, سەمەيدەگى وبلىستىق تاريحي-ولكەتانۋ مۋزەيىنىڭ ەكسكۋرسوۆود جەتەكشىسى ميراس قۇسايىنوۆ, شاقامان اۋىلدىق وكرۋگىنىڭ باس مامانى دانيار ايدارباەۆ, ابايدىڭ مەملەكەتتىك قورىق مۋزەيىنىڭ عىلىمي قىزمەتكەرى مەيىرجان نۇرلانوۆتار بار.
– ءبىز سايىسقا ءتۇرلى ماماندىقتا قىزمەت ىستەپ جۇرگەن سايدىڭ تاسىنداي ءور جىگىتتەرىمىزدى شاقىرىپ وتىرمىز, – دەدى سەمەي قالالىق مادەنيەت جانە تىلدەردى دامىتۋ ءبولىمىنىڭ باسشىسى نازەركە اققوجينا. – الاشتىڭ ءىزباسارلارى تەك وزدەرىنىڭ عانا ماماندىقتارى ەمەس, باسقا دا تالانتتارى بار ەكەندىكتەرىن حالىق الدىندا كورسەتە ءبىلىپ, كەلەر ۇرپاققا ۇلگى-ونەگە بولسىن دەگەن ماقساتتى ۇستاندىق.
نار جىگىتتەر اۋەلى ولەڭمەن ءوزىن تانىستىرۋدان سىنعا ءتۇستى. سول كەزدەن باستاپ ەرلان جاقىپوۆ الدىعا وزا شاباتىندىعىن بىردەن كورسەتتى. كەڭ داۋىسى, ساحنادا ءوزىن-ءوزى ۇستاۋ مادەنيەتىمەن ەرەكشەلەنىپ, سايىسقا قاتىسىپ وتىرعانداردان بىردەن العا شىقتى. جەتى قازىنانىڭ بىرىنە جاتاتىن ەر قارۋىن قولدانۋدا تاعى دا ەرلان جاقىپوۆتىڭ ءباسى جوعارى بولدى. ەڭ مەرگەن رەتىندە تانىلعان ەرلان جاقىپوۆ بىردەن 44 ۇپاي جينادى. ودان كەيىن 41 ۇپايدى مەيىرجان نۇرلانوۆ, 38 ۇپايدى سامات كارىپجانوۆ ەنشىلەدى.
ۇلتتىق كيىم كيىپ شىققان كەزدە دە سايىسقا قاتىسۋشىلاردىڭ تالعامى كەڭىنەن باعالاندى. گير تاسىن كوتەرۋ, ءان سالىپ, ۇلتتىق ناقىشتا بي بيلەۋ, سالت-داستۇرلەردى, تاريحتى جاتقا ايتىپ بەرىپ, تۇسىندىرۋدەن «الاشتىڭ نار جىگىتى» باس بايگەسىن ەرلان جاقىپوۆ يەلەنىپ, بەلىنە جەڭىستىڭ بەلبەۋىن تاقتى.
راۋشان نۇعمانبەك, جۋرناليست
سەمەي