قوستانايدا جاس سۋرەتشى-پورترەتشىلەردىڭ وبلىستىق بايقاۋى بيىل ءۇشىنشى رەت ءوتتى. جىل سايىن بەدەل الىپ كەلە جاتقان بۇل شارا قوستاناي وڭىرىنە بەلگىلى سۋرەتشى-پلاكاتشى, قازاقستان سۋرەتشىلەر وداعىنىڭ مۇشەسى, وبلىستىق «مەتسەناتتار كلۋبى» سىيلىعىنىڭ لاۋرەاتى يۋري نوۆوسەلوۆتىڭ باستاماسىمەن ۇيىمداستىرىلدى. جاقسى ءىستى وبلىستىق تاريحي-ولكەتانۋ مۋزەيى مەن قازاقستان سۋرەتشىلەر وداعىنىڭ وبلىستىق فيليالى دا قولدادى. قارت سۋرەتشى ءوزىنىڭ اتاۋلى سىيلىعىن تاعايىنداپ, وعان تەك 14 پەن 35 جاس ارالىعىنداعى جاستار عانا قاتىسا الادى دەگەن شارتىن دا بەكىتتى.
بيىل وسى بايقاۋعا وبلىس قالالارى مەن اۋداندارىنان جاستار 50-دەن اسا جۇمىستارىن ۇسىندى. بايقاۋ شارتىنا وراي, ولار وزدەرىنىڭ جاقىن تۋعان-تۋىستارىنىڭ, بالالارىنىڭ, دوستارىنىڭ, اتا-انالارىنىڭ, قىسقاسى ومىردە بار ادامداردىڭ بەينەسىن سالۋى ءتيىس. يۋري نوۆوسەلوۆتىڭ بايقاۋدى نەگە تەك قانا پورترەت جانرىندا وتكىزۋىنىڭ سىرى دا بار.
– پورترەت ەڭ قيىن, كۇردەلى جانردىڭ ءبىرى. جاقىندارىنىڭ پورترەتىن سالۋ وڭاي كورىنگەنىمەن, ونىڭ قيىندىعى بوياۋلار ۇيلەسىمدىلىگىن, كەيىپكەردىڭ ىشكى جانە سىرتقى ۇقساستىعىن جاساۋ, پورترەتكە پسيحولوگيالىق جانە رۋحاني سيپات بەرىپ, مودەلدىڭ نەگىزگى يدەياسىن تابۋ, كىسىنىڭ سۋرەتتەگى وزىنە ۇقسايتىن ءساتىن بەينەلەۋدە بولسا كەرەك. پورترەت ونەرى باسىنان اياعىنا دەيىن شىعارماشىلىق جۇمىستى تالاپ ەتەدى, – دەيدى يۋري دميتريەۆيچ.
جىل سايىن بايقاۋعا تۇسكەن جۇمىستاردى قوستانايداعى سۋرەتشىلەر سارالايدى. بيىل قازىلار جاستارعا تالاپتى كۇشەيتىڭكىرەپتى. ولار ەڭ جاقسى دەگەن جۇمىسقا ءبىرىنشى ەمەس, ەكىنشى ورىن بەردى. ونى قوستاناي قۇرىلىس كوللەدجىنىڭ ستۋدەنتى روزا ىبىراەۆا الدى. ال ءۇشىنشى ورىنعا ل.رۋسين اتىنداعى جەكەمەنشىك كوركەم سۋرەت مەكتەبىنىڭ وقۋشىسى ارينا ۆاكەروۆانىڭ جۇمىسى لايىق دەپ تابىلدى. وبلىستىق بولعانىمەن بايقاۋدىڭ جۇلدەسىنە تاعايىندالعان سىيلىق كوپ ەمەس, 10-15 مىڭ تەڭگە عانا.
– بۇل سىيلىقتى مەن ءوزىمنىڭ زەينەتاقىمنان بولەمىن. جاستار ءۇشىن بۇل بايقاۋدىڭ سىيلىق كولەمى ەمەس, ەڭ باستىسى وعان قاتىسۋى, سول ارقىلى شىعارماشىلىعىن شىڭداۋى, ىزدەنىسى, ۇيرەنۋى ماڭىزدى بولۋى ءتيىس. جاستاردى ونەرگە باۋلۋ, شىڭداۋ ءۇشىن مەملەكەتتەن ءۇيىپ-توگىپ قارجى بولىنەدى. ول كوبىنەسە ناۋقاندىق سيپات الادى. جۇلدەسى از بولسا دا, قازىر جاستار وسى بايقاۋعا جاپپاي قاتىسىپ كەلەدى. ءۇش جىلدىڭ ىشىندە بايقاۋعا تۇسكەن دۇنيەلەردەن نازار اۋدارتاتىن قانشاما جۇمىستى بايقادىم. ءوسۋ بار دەگەن ءسوز. مەنىڭ ماقساتىم وسى عانا بولاتىن, – دەيدى يۋري دميتريەۆيچ. بايقاۋدىڭ قورىتىندى كورمەسى وبلىستىق كوركەمسۋرەت گالەرەياسىندا ءبىر اي تۇرادى. قولىنا قىلقالام ۇستاعان تالاپكەرلەردىڭ تالپىنىسىن قىزىقتاۋشىلار دا كوپ.
ءنازيرا جارىمبەت, «ەگەمەن قازاقستان»
قوستاناي