2017 جىلى مۋزەي قورىنا 1665 مۋزەيلىك زات تۇسكەن. بۇل تۋرالى بۇگىن الماتى قالاسى وڭىرلىك كوممۋنيكاتسيالار قىزمەتىنىڭ الاڭىندا وتكەن بريفينگتە مەملەكەتتىك ورتالىق مۋزەيى ديرەكتورىنىڭ ورىنباسارى عاليا تەمىرتون مالىمدەدى.
عاليا تەمىرتوننىڭ سوزىنە سۇيەنسەك, قوردى ەسەپكە الۋ جانە ساقتاۋ توبىندا 17 مامان جۇمىس ىستەيدى (قوردى ەسەپكە الۋ توبى – 5 مامان, قور ساقتاۋ توبى – 12 مامان).
بۇل توپتاردىڭ نەگىزگى مىندەتى – بەلگىلەنگەن نورماعا ساي ەسەپكە الۋ قۇجاتتارى مەن ءىس-قاعازدارىن جۇرگىزۋ, مۋزەي قۇندىلىقتارىنىڭ ساقتالۋىن قامتاماسىز ەتۋ, ەسكەرتكىشتەردى قيراۋ, ۇرلانۋ جانە بۇزىلۋدان قورعاۋ ءارى ولاردى زەرتتەۋگە مەن ناسيحاتتاۋعا قولايلى جاعداي جاساۋ بولىپ تابىلادى. قور ساقتاۋ توبى ماماندارىنىڭ مىندەتىنە تىكەلەي قور كوللەكتسيالارىن ساقتاۋ كىرەدى.
– كوللەكتسيا بويىنشا, دەرەكتەردىڭ تۇرىنە, ماتەريالىنا قاراي بىرىكتىرىلگەن مۋزەيلىك زاتتار 15 قورعا ءبولىنىپ, قور ساقتاۋشى مامانداردىڭ ماتەريالدىق جاۋاپكەرشىلىگىندە ساقتالادى, – دەدى مەملەكەتتىك ورتالىق مۋزەيى ديرەكتورىنىڭ ورىنباسارى.
قور جۇمىسىنداعى نەگىزگى باعىتتاردىڭ ءبىرى قابىلداۋ جانە جاڭا تۇسكەن جادىگەرلەردى ەسەپكە الۋ, قوردى تولىقتىرۋ مەن جابدىقتاۋ. قوردى جۇيەلى تۇردە تولىقتىرۋ جۇمىستارى مۋزەي ىسىندەگى باستى عىلىمي باعىتتاردىڭ ءبىرى. وتكەن جىلى جيناقتالعان ماتەريالداردى مۋزەي قورىنا قابىلداۋ ءۇشىن قىك-نىڭ 5 جينالىسى ءوتىپ, ونىڭ شەشىمى ارنايى حاتتامامەن راسىمدەلگەن. 2012 جىلدان بەرى فوتوقۇجاتتار قورىنداعى مۋزەيلىك زاتتاردىڭ ساندىق كوشىرمەسىن جاساۋ (وتسيفروۆكا) جۇمىستارى جۇرگىزىلىپ كەلەدى.
قازىرگى تاڭدا مەملەكەتتىك ورتالىق مۋزەيىنىڭ قورىندا 266 500 ساقتام بىرلىك مەملەكەتتىك تىركەۋگە الىنعان. ونىڭ ىشىندە: نەگىزگى قور – 215 645 ساقتام بىرلىك, عىلىمي-كومەكشى قور – 49 593 ساقتام بىرلىك ۋاقىتشا قور – 1262 ساقتام بىرلىكتى قۇرايدى. مۋزەيدىڭ نەگىزگى قورىنداعى مۋزەيلىك زاتتار مەن كوللەكتسيالار قازاقستان مۋزەيلەرىنىڭ ۇلتتىق قورىنىڭ قۇرامىنا كىرەدى, – دەدى عاليا تەمىرتون.
ايناش ەسالي,
«ەگەمەن قازاقستان»
الماتى