استانادا قازاقستان مۇسىلماندارى ءدىني باسقارماسىنىڭ عيماراتىندا باس ءمۇفتي سەرىكباي قاجى ورازدىڭ توراعالىعىمەن كەزەكتى حاتتامالىق جينالىس ءوتتى.
القالى جيىنعا ءبىرىنشى نايب ءمۇفتي, «ازىرەت سۇلتان» مەشىتىنىڭ باس يمامى ناۋرىزباي قاجى تاعان ۇلى, نايب ءمۇفتي الاۋ ءادىلباي, قمدب اپپارات باسشىسى عىلىمبەك ماجيەۆ پەن قمدب ءبولىم مەڭگەرۋشىلەرىلەر قاتىستى.
كۇن تارتىبىندە رامازان ايىن جوعارى دەڭگەيدە وتكىزۋ ماسەلەسى تالقىلاندى. قاسيەتتى ايدا جۇزەگە اساتىن ءىس-شارالاردىڭ جوسپارى مەن مەرزىمى پىسىقتالىپ, ناقتى تاپسىرمالار بەرىلدى.
«رامازان – جاقسىلىقتا جارىساتىن اي. قاسيەتتى ايدا ىزگى ءىس-شارالاردى, قايىرىمدىلىق جۇمىستاردى كوبىرەك جۇزەگە اسىرۋىمىز كەرەك. ورازا كەزىندە ءار سالاداعى مەكەمە جەتەكشىلەرى مەن جالپى جاماعاتقا اۋىزاشار ۇيىمداستىرىلسىن. قايىرىمدىلىق ايىندا ماتەريالدىق مۇمكىندىگى از ادامدارعا مۇمكىندىگىنشە كومەك كورسەتىلسىن», – دەدى باس ءمۇفتي سەرىكباي قاجى ساتىبالدى ۇلى.
جينالىس سوڭىندا قمدب توراعاسى س.ساتىبالدى ۇلى ايماقتاعى وكىل يمامدارعا ناقتى تاپسىرمالار جولدادى.