قازاق ونەرىن اسقاقتاتۋ, ەل ىشىندەگى ونەرلى ازاماتتاردى حالىققا تانىتۋ, ولاردىڭ شىعارماشىلىعىن ناسيحاتتاۋ ماقساتىندا وتكەن جىلى قولعا الىنعان «Men qazaqpyn» ءداستۇرلى ءانشى, كۇيشى جانە تەرمەشىلەردىڭ حالىقارالىق تەلەۆيزيالىق بايقاۋى بيىل دا جالعاسىن تاباتىن بولادى. بۇل ورايدا ۇلتتىق ونەردى ناسيحاتتاپ جۇرگەن ونەرپاز جانداردىڭ جاسىنداي جارقىراۋىنا مۇمكىندىك مول.
وتكەن جىلى اتالعان بايقاۋدا ء«داستۇرلى ءان» اتالىمى بويىنشا جامبىلدىق سۇلۋجان ابەنوۆا توپ جارعان بولاتىن. جۋىردا وڭىرلىك كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا «Qazaqstan» رترك» اكتسيونەرلىك قوعامى «Jambyl.tv» جامبىل وبلىستىق فيليالىنىڭ ديرەكتورى جاسۇلان ءابدىماناپ اتالعان جوبادا اۋليەاتا وڭىرىندەگى تالانتتاردىڭ كورىنۋىنە مۇمكىندىك جوعارى ەكەنىن, سونىمەن قاتار, جوبانىڭ ماقساتى اۋىلدى جەردە جۇرگەن ازاماتتارعا قولداۋ كورسەتۋ ەكەنىن ايتتى.
ال جامبىل وبلىستىق مادەنيەت, ارحيۆتەر جانە قۇجاتتاما باسقارماسى باسشىسىنىڭ ورىنباسارى ءزۇبايرا سەمبينانىڭ ايتۋىنشا, ءۇش اتالىم بويىنشا تاراز قالاسىندا جانە وبلىستىڭ بارلىق اۋداندارىندا ىرىكتەۋ كەزەڭدەرى ءوتىپ, ونى بىلىكتى ماماندار سارالايتىن بولادى. سونداي-اق اتالعان بايقاۋعا 18 بەن 40 جاس ارالىعىنداعى ءداستۇرلى ونەرگە بەيىمى بار ۇمىتكەرلەر قاتىسا الادى. جالپى, باسقوسۋدا قاتىسۋشىلاردىڭ ارنايى ديپلومى نەمەسە كاسىبي ءبىلىمى بولۋى ماڭىزدى ەمەستىگى دە ايتىلدى. ءوز سوزىندە وبلىستىق حالىق شىعارماشىلىعى ورتالىعىنىڭ كوركەمدىك جەتەكشىسى ەلميرا دۇتباەۆا ايتۋلى مەگاجوباعا اۋليەاتا ءوڭىرىنىڭ دايىندىعىنىڭ جوعارى ەكەنىنە جانە بايقاۋعا قاتىسۋشى ونەرپازداردىڭ ساپالىق قۇرامى جاقسارعانىنا توقتالدى.
«ەل ءىشى – ونەر كەنىشى» دەيدى حالقىمىز. ەندىگى جەردە اتالعان جوبا ارقىلى اۋىلدا جۇرگەن تالانتتى ونەرپازدار دا تىڭدارمانىمەن قاۋىشىپ, شىعارماشىلىعىن دامىتا الادى. «Men qazaqpyn» جوباسىندا ء«داستۇرلى ءان» اتالىمى بويىنشا تانىمال ءانشى ايگۇل ماقاشەۆا, «تەرمە ونەرى» اتالىمى بويىنشا تەرمەشى-جىرشى ەرتاي تازابەكوۆ, «كۇي» اتالىمى بويىنشا كۇيشى ەرجان رىسمەتوۆ ۇمىتكەرلەردىڭ ءادىل باعالارىن بەرىپ, بارلىق اۋدانداردى ارالاپ شىعادى دەپ جوسپارلانۋدا.
حاميت ەسامان,
«ەگەمەن قازاقستان»
جامبىل وبلىسى