ورال قالاسىنداعى №20 مەكتەپتىڭ 4 سىنىبىندا وقيتىن ءنۇرالى وتەعاليەۆ فرانتسيادا وتكەن IV حالىقارالىق ارت-فەستيۆال – «Young cannes stars» («كاننىڭ جاس جۇلدىزدارى») اتتى ءان بايقاۋىندا 1-ورىندى جەڭىپ الدى.
مەكتەپتەن تىس جۇمىستار ورتالىعىندا سۆەتلانا گونچاروۆا مەن اقمارال احمەتوۆادان اكتەرلىك شەبەرلىك جانە ۆوكال جانرى بويىنشا ساباق الىپ جۇرگەن ءنۇرالى 6 جاسىنان باستاپ ۇلكەن ساحنالارعا شىعا باستاپتى. وتكەن جىلى رەسەيدىڭ قازان قالاسىنداعى ءان بايقاۋىندا – 2-ورىن, پيتسۋندا قالاسىنداعى ءان دوداسىندا – 1-ورىن السا, استانادا وتكەن «اق كوگەرشىن» بايقاۋىنىڭ دا 1-ورىن يەگەرى اتانعان.
– كاننداعى باسەكە وتە تارتىستى ءوتتى, – دەيدى جاس ءانشىنىڭ ناعاشى اجەسى, ءتۇرلى جارىستارعا اپارىپ, جانىندا جۇرەتىن گۇلشات جانداۋلەتوۆا.
7-9 جاس ارالىعىندا ونەر كورسەتكەن بالعىن ونەرپازدار اراسىندا ءنۇرالى قازاقستاننىڭ نامىسىن جالعىز ءوزى قورعاعان. قازىلار القاسىنىڭ توراعاسى, فرانتسۋز كومپوزيتورى پاتريك نەببۋلا قازاقستاندىق ءانشىنىڭ وتە جاقسى دايىندىقپەن كەلگەنىن, ساحنالىق كوستيۋمى جانە رەپەرتۋارى ونەرپازدىڭ جاسىنا ساي بولعانىن باسا ايتىپتى. ء«نۇرالىنىڭ بويىندا ۇلكەن تالانت بار. جالعىز ءوتىنىشىم – ءنۇرالى ءان ايتۋىن تاستاپ كەتپەسە ەكەن» دەپتى كانن كونسەرۆاتورياسىندا ۇستازدىق ەتەتىن پاتريك نەببۋلا.
ءنۇرالى حالىقارالىق ءان بايقاۋىنىڭ فينالىندا ورالدىق قالامگەر ميرا شۇيىنشاليەۆانىڭ سوزىنە جازىلعان سازگەر ادىلبەك سۇلەيمەنوۆتىڭ «قازاقستان جاس ۇلانى» اتتى ءانىن شىرقاعان. ءنۇرالىنىڭ اتا-اناسى ارىستان مەن ءماريا دا اسكەري قىزمەتكەر بولعاندىقتان شىعار, جاس ءانشى دە مارش ستيلىندەگى رۋحتى شىعارمانى جان-تانىمەن ورىنداسا كەرەك.
ءنۇرالى وتەعاليەۆ ەندى سانك-پەتەربۋرگ قالاسىندا 2018 جىلى 3 قازاندا وتەتىن سۋپەر-فينالعا شاقىرتۋ الىپ وتىر. فرانتسياداعى بايقاۋدان كەيىن جاس ءانشىنى ءتۇرلى بايقاۋلارعا شاقىرتا باستاپتى. سولاردىڭ ءبىرى – الداعى 21-23 ماۋسىمدا برەست قالاسىندا وتەتىن ءان فەستيۆالى.
– ءبىز فرانتسياعا ءوز قارجىمىزبەن بارىپ كەلدىك. وسى بايقاۋعا قاتىسقان وزگە ونەرپازداردىڭ جانىندا ۇستازدارى, اتا-اناسى, ءتىپتى پسيحولوگى بار جانكۇيەر توپ جۇرگەنىن كورىپ, قاتتى قىزىقتىم. مۇنداي قامقورلىق, قولداۋ بولسا, ءبىزدىڭ جاستارىمىز تالاي بيىكتى باعىندىراتىنى انىق قوي, – دەيدى ءنۇرالىنىڭ ناعاشى اجەسى گۇلشات جانداۋلەتوۆا.
قازبەك قۇتتىمۇرات ۇلى,
«ەگەمەن قازاقستان»
ورال