ەلىمىزدەگى ەڭ ۇلكەن قالانىڭ ءبىرى دەسەك تە, قاراعاندى شاھارى وزىنە لايىق كولەمدەگى كونتسەرت زالىنا ءزارۋ ەدى.
اۋقىمدى شارالار مەن قالا قوناقتارىنىڭ كونتسەرتتەرى امبەباپ شاڭىراققا اينالعان كەنشىلەر مادەنيەت سارايىندا, تسيرك ارەناسىندا, ءتىپتى ستاديوننىڭ اشىق الاڭىندا وتكىزىلەدى. ەندى, مىنە, وسى ماسەلەنى شەشۋدىڭ دە رەتى كەلگەن سىڭايلى. جاڭا كونتسەرت زالىن تۇرعىزۋعا قاراعاندىنىڭ بەدەلدى سانالاتىن وڭتۇستىك-شىعىس اۋدانىنان اۋقىمدى جەر ءبولىنىپ, ءبىراز ۋاقىت بۇرىن عيمارات جوباسىنا بايقاۋ جاريالانعان بولاتىن. وسى سىندا قاراعاندىلىق جاس ساۋلەتشى ەرنار نۇرمۇقانوۆتىڭ جوباسى ۇزدىك دەپ تانىلدى.
– العاشقىدا كونتسەرت زالى عيماراتى دالا تاسىنىڭ پىشىنىندە بولسا دەپ ويلاعام, – دەيدى ەرنار. – ۇلتتىق بولمىسىمىزعا جاقىن دۇنيە عوي. الايدا ول قالانىڭ جالپى كورىنىسىمەن ۇيلەسە قويماس دەگەن پايىمعا كەلىپ, عيمارات كلاسسيكالىق ۇلگىدە بولۋى ءتيىس دەپ شەشتىم.
ءتورت قاباتتى جاڭا كونتسەرت زالىنىڭ جوباسى كونە گرەك پارفەنونىن ەسكە سالادى: عيمارات ءتورت جاعىنان دا كولوننالارمەن اسەمدەلەدى. عيماراتتىڭ ۇلكەن زالىنا ءبىر مەزگىلدە 1 250 كورەرمەن, ال دايىندىق زالىنا 400 ادام سىيادى. بايقاۋ شارتىنا سايكەس, بولاشاق عيماراتتىڭ الدىندا كۇن جىلىدا ءتۇرلى شارالار وتكىزۋگە بولاتىن ۇلكەن الاڭ بولادى.
قاراعاندى وبلىسىنىڭ اكىمى ەرلان قوشانوۆ قۇرىلىس, ساۋلەت جانە قالا قۇرىلىسى باسقارماسىنا جوبالاۋ-سمەتالىق قۇجاتتامالاردى ازىرلەۋگە تاپسىرما بەردى.
– قۇرىلىس جۇمىستارىن باستاۋعا قاجەتتى قۇجاتتار مەن ساراپتامالىق شارالاردى رەتتەپ, قارجىلاندىرۋ كوزدەرى كەلىسىلگەن سوڭ, كۇز ايلارىندا ىسكە كىرىسۋگە بولادى, – دەيدى اتالعان وبلىستىق باسقارما باسشىسىنىڭ مىندەتىن اتقارۋشى تايحان قالماحانوۆ.
جالپى, جاڭا كونتسەرت زالى جوبالارىنىڭ بايقاۋىنا ءتۇرلى ستيلدەگى ون ءبىر جۇمىس قاتىسقان بولاتىن. سولاردىڭ ارقايسىسى وزىندىك ساۋلەتىمەن ەرەكشەلەنەدى. دەگەنمەن سولاردىڭ ىشىندە جاس دارىننىڭ اتى وزدى. ازىرگە ۇستەل ۇستىندە تۇرعان جوبا ەندى بىرەر جىلدىڭ ىشىندە ەڭسەلى عيماراتقا اينالىپ, حالىقتىڭ يگىلىگىنە قىزمەت ەتەرىنە سەنىم مول.
قايرات ءابىلدا,
«ەگەمەن قازاقستان»
قاراعاندى