«ەگەمەن قازاقستان» گازەتى بىلتىر وقىرمانعا جول تارتقان مەكتەپ ءبىتىرۋشى تۇلەكتەرگە ارنالعان ۇلتتىق بىرىڭعاي تەستىلەۋگە دايارلىق جوباسىن بيىل دا جالعاستىرۋدا.
جوعارى وقۋ ورنىنا قۇجات تاپسىرۋشى تالاپكەرلەر ءۇشىن پايداسى زور جوبا اياسىندا بيىلعى ۇبت سۇراقتارى مەن جاۋاپتارىن رەسپۋبليكالىق Kazbilim ورتالىعىنىڭ ماماندارى ازىرلەپ ۇسىنىپ وتىر. اتالعان جوبا اياسىندا باس باسىلىم باسشىسى دارحان قىدىرالى مەن رەسپۋبليكالىق Kazbilim ورتالىعىنىڭ جەتەكشىسى اياتجان احمەتجان ۇلى ەكىجاقتى ىنتىماقتاستىق تۋرالى مەموراندۋمعا قول قويدى.
ەكىجاقتى كەلىسىم نەگىزىندە ەندى ءار اپتانىڭ سەيسەنبىسىندە وقىرمان گازەت ىشىندەگى كىتاپشا تۇرىندە جاريالانعان ۇلتتىق بىرىڭعاي تەستىلەۋ سۇراقتارىمەن تانىسىپ, ونىڭ دۇرىس جاۋاپتارىن بەلگىلەپ, قانشا بالل جيناعانىن بىلە الادى.
قۇجاتقا قول قويۋ بارىسىندا گازەت باسشىسى د.قىدىرالى باسىلىمنىڭ قازىرگى وتاندىق ءبىلىم بەرۋ سالاسىندا ورىن الىپ جاتقان جاڭاشىلدىقتار مەن كۇردەلى ماسەلەلەر توڭىرەگىندە وقىرماندارعا, سونىڭ ىشىندە مۇعالىمدەر مەن مەكتەپتىڭ جوعارى سىنىپ وقۋشىلارى ءۇشىن پايدالى كونتەنت ۇسىنۋدى كوزدەيتىنىن, سونداي-اق مۇعالىم ابىرويى مەن مارتەبەسىنە, ءبىلىم بەرۋ مۇمكىندىكتەرىن ۇلعايتۋعا بايلانىستى ماسەلەلەرگە رەداكتسيانىڭ بەي-جاي قارامايتىنىن, وسى تاراپتا اعارتۋشىلىق باعىتتى كۇشەيتۋ ارقىلى ءبىلىم سالاسىنا ايتارلىقتاي قولداۋ كورسەتىلىپ وتىرعانىن جەتكىزدى. ءوز كەزەگىندە رەسپۋبليكالىق Kazbilim ورتالىعىنىڭ جەتەكشىسى ا.احمەتجان ۇلى ەل ىشىندەگى, شالعاي ەلدى مەكەندەردەگى ءبىلىم سالاسىنداعى ماسەلەلەرگە توقتالىپ, باسىلىم باسشىلىعىنىڭ قولداۋىنا ريزاشىلىق ءبىلدىردى.
ايتا كەتۋ كەرەك, بىلتىر باس باسىلىمدا ۇلتتىق بىرىڭعاي تەستىلەۋ ورتالىعىمەن ارىپتەستىك شەڭبەرىندە ۇبت-عا دايارلاۋ جوباسى جۇزەگە اسىرىلعان بولاتىن. بيىل اتالعان مەملەكەتتىك مەكەمەمەن قابىلدانعان مەموراندۋم اياسىندا ەلباسى تاپسىرماسىنا سايكەس, مۇعالىمدەردىڭ بىلىكتىلىك دەڭگەيىن ەسكەرەتىن كاتەگوريالاردىڭ جاڭا كەستەسىنە بايلانىستى ۇستازدارعا ارنالعان ۇلتتىق بىلىكتىلىك تەستىلەۋدى جاريالاۋ جوسپارلانىپ وتىر.
دۋمان اناش, «ەگەمەن قازاقستان»