الەكساندر كوليادين ەل مەرەيىن اسىردى

پحەنچحانداعى پاراليمپيادا ويىن­دارىندا الەكساندر كوليادين شاڭعى سپورتىنان 1,5 كيلومەترلىك سپرينتتە اتالعان قاشىقتىقتى 4:19.7 مينۋتتا باعىندىرىپ, مارەگە ءبىرىنشى جەتتى. ەكىنشى ورىن جاپونيالىق يوشيرو نيتتاعا بۇيىرسا, قولا جۇلدەنى مارك ارەندتس مىسە تۇتتى.

ءسويتىپ الەكساندر كوليادين قا­زاق­ستاننىڭ قىسقى پاراليمپيادا تاري­حىن­داعى تۇڭعىش التىن جۇلدە يەلەن­گەن سپورتشى اتاندى. بۇل كوليادين­نىڭ ەكىنشى پاراليمپياداسى. ول ءتورت جىل بۇرىن سوچيدە وتكەن ويىندارعا قاتىسىپ, 13-ورىن يەلەنگەن بولاتىن. قازاق­ستان قۇرا­ما­سىنىڭ سپورتشىلارى پارا­ليم­پيالىق ويىندارعا 1994 جىلدان بەرى تۇراقتى تۇردە قاتىسىپ كەلەدى.

الەكساندر كولياديننىڭ التىن مە­دالى ەل قۇراماسىنىڭ جالپىكو­مان­دالىق ەسەپتە 15-ورىنعا كوتەرىلۋىن قامتاماسىز ەتتى. بيىلعى پاراليمپيا­لىق ويىندارعا قازاقستان قۇراماسىنان سپورت­تىڭ ەكى تۇرىنەن التى سپورتشى قاتى­سىپ جاتىر. بۇل دا – ءبىز ءۇشىن رە­كورد­تىق كور­سەتكىش!

كوليادين تاريحي جەڭىسىنەن كەيىن وتاندىق باق وكىلدەرىنە سۇحبات بەرىپ, جەڭىسىنە قۋانىشتى ەكەنىن ءبىلدىردى. «بۇل جەتىستىككە جەتۋ ءۇشىن وتكەن پار­اليمپيادادان بەرى ۇزاق ۋاقىت دايىندالدىم. وتە قيىن جاتتىعۋلاردىڭ ارقاسىندا وسى ناتي­جەگە جەتتىم دەپ ويلايمىن. پارا­ليمپيادادان كەيىن دە حالىقارالىق دودالاردا ەل نامىسىن قورعايمىن دەگەن ءۇمىتىم بار. قولداۋ ءبىلدىرىپ, ءۇمىت ارتقان بارلىق قازاقستاندىقتارعا ءوز العىسىمدى بىلدىرەمىن. ءدال قازىر ەرەكشە سەزىمدە تۇر­مىن. مەنى شاڭعى سپورتىنا باۋلى­عان نيكولاي چەبوتكوعا دا ەرەكشە العىس ايتامىن», دەپ اعىنان جارىلدى پاراليمپيا ويىندارىنىڭ چەمپيونى.

الەكساندر كوليادين 1973 جىلى قوستاناي قالاسىندا تۋعان. 1997 جىلى جول اپاتىنا ۇشىراپ, ءبىر اياعىنان ايىرىلعان. بۇل جاعدايدان كەيىن كوليادين ۇزاق ۋاقىت ءوز-وزىنە كەلە الماي جۇرگەن. دەگەنمەن, بالا كەزىندە كۇرەسپەن شۇعىلدانىپ, سپورتقا يكەمى بارىن بايقاعان سەرگەي رەۆۋتسكي وعان شاڭعى سپورتىمەن شۇعىلدانۋعا كومەكتەسكەن. سپورتشى 2012 جىلى كوكشە­تاۋ­دا وتكەن قازاقستان چەمپيو­ناتىنا قاتىسىپ, ەل بىرىنشىلىگىنىڭ جەڭىمپازى اتانعان. سول ۋاقىتتان بەرى الەكساندر ەلىمىزدىڭ نامىسىن حالىقارالىق ارەنالاردا ابىرويمەن قورعاپ كەلەدى.

2017 جىلدىڭ جازىندا الەكساندر گەرمانيادا وقۋ-جاتتىعۋ جيىنىنا قاتىسىپ, سول جاقتا وزىنە ىڭعايلى پروتەز اياق جاساتادى. وسىدان سوڭ ول اياعىن ەركىن قيمىلداتىپ, شاڭعى سپور­تىندا بىرقاتار جەڭىسكە جەتە باستايدى. ول ۇزاق ۋاقىت نيكولاي ستە­پين­نىڭ قول استىندا جاتتىققان. قا­زىرگى جات­تىقتىرۋشىسى – ۆاسيلي كولو­ميەتس.

الەكساندر كوليادين بۇگىندە قازاق­ستان چەمپيوناتىنىڭ التى دۇركىن جە­ڭىم­­پازى. سونداي-اق ول بىلتىر گەرما­نيادا وتكەن الەم چەمپيوناتىندا ەستا­فەتالىق جارىستا التىنشى ورىن يە­لەنگەن. بۇل كولياديننىڭ قازىرگى كەز­دەگى ەڭ ۇزدىك ناتيجەسى. الەكساندر «قيىن­­دىق­تاردان قورقۋدىڭ ورنىنا جاڭا قيىن­دىقتاردى ىزدەيمىن» دەگەن ۇستا­نىممەن ءومىر سۇرەتىن سپورتشى.

ءالي بيتورە,

«ەگەمەن قازاقستان»