وسكەمەندە شايبالى حوككەيدەن بالالار مەن جاسوسپىرىمدەر اراسىنداعى ءداستۇرلى وبلىستىق «جۇلدىزشا» ءتۋرنيرى وسىمەن بەسىنشى مارتە ۇيىمداستىرىلدى.
استانا قالاسىنىڭ 20 جىلدىق مەرەيتويىنا ارنالىپ وتكىزىلگەن سايىستىڭ اشىلۋ سالتاناتىنا وبلىس اكىمىنىڭ ورىنباسارى اسەم ءنۇسىپوۆا مەن وسكەمەندىك حوككەيدىڭ ارداگەرلەرى ارنايى قاتىسىپ, لەبىزدەرىن ءبىلدىردى. «وبلىسىمىزدا ناعىز ەرلەر ويىنى سانالاتىن حوككەيگە بەت بۇرعان جاستارىمىزدىڭ قاتارىنىڭ كوبەيىپ كەلە جاتقانى قۋانتادى. بۇگىنگى جارىس سونىڭ ءبىر دالەلى دەۋگە بولادى. بيىلعى تۋرنيردە توپ جارعان كىشى توپ حوككەيشىلەرى رەسپۋبليكالىق جارىسقا قاتىسۋعا مۇمكىندىك الادى. سول جارىستا جاس حوككەيشىلەرىمىز وبلىسىمىزدىڭ نامىسىن ابىرويمەن قورعايتىندارىنا كامىل سەنەمىز», - دەدى ءا.ءنۇسىپوۆا.
جارىس قورىتىندىسىندا وسكەمەننىڭ جاس حوككەيشىلەرى كىشى توپتا (2006-2007 جىلدارى تۋعان بالالار) ۇزدىك اتانسا, سەمەيلىك ورەندەر 2004-2005 جىلعى ويىنشىلاردان قۇرالعان كوماندالار باسەكەسىندە ەشكىمگە دەس بەرمەدى. جەڭىمپاز كوماندالاردىڭ ارقايسىسىنا وبلىس اكىمىنىڭ ارنايى جۇلدەسى – 500 مىڭ تەڭگەنىڭ سەرتيفيكاتى تاپسىرىلدى.
ازامات قاسىم,
«ەگەمەن قازاقستان»
وسكەمەن
سۋرەتتەردى تۇسىرگەن تىلەۋبەك شاياحمەتوۆ