پاۆلوداردىڭ «ەرتىسى» جاڭا ماۋسىمعا دايىن

ەل چەمپيوناتىن 5 مارتە جەڭىپ العان  «ەرتىس» فۋتبول كلۋبىنىڭ جاڭا قۇرامىن تانىستىرۋ راسىمىنە  وبلىس اكىمى بولات باقاۋوۆ جانە جانكۇيەرلەر قاتىستى.  بيىل وزگەرىسكە ۇشىراعان «ەرتىستىڭ» جاڭا قۇرامىندا  رۋمىنيالىق ادريان اۆراميا, دورۋ پاپاديۋك, نيگەريالىق فۋاد سالامي, بەلورۋسسيالىق سەرگەي كيسلياك, يسپانيالىق ادريان گومەز بار. ەلىمىزدىڭ فۋتبولشىلارى المات بەكباەۆ, ميدات گالباەۆ, بەرىك ايتباەۆ, ماقسات ءامىرحانوۆ, دميتري شميدت, راحىمجان روزىباكيەۆ, ۆلاديمير ۆومەنكو, كيريلل شەستاكوۆتار دا ەندى «ەرتىستىڭ» قۇرامىندا وينايدى. بۇرىنعى ويىنشىلاردان رۋسلان ەسىموۆ, سەرىكبول قاپانوۆ, نيكيتا كالمىكوۆ, الەكساندر كيسليتسين, پاۆەل شابالين, يليا كالينين, ارمان سمايلوۆ, ميلوش ستامەنكوۆيچ پەن كارلوس فونسەكالار بار.

ال, «ەرتىستىڭ» جاڭا كاپيتانى بولىپ ەكىباستۇز فۋتبول مەكتەبىنىڭ تۇلەگى رۋسلان ەسىموۆ تاعايىندالدى. قازىر  «ەرتىستى»  جاڭا باس باپكەر يسپانيالىق  حەرارد نۋس جاتتىقتىرۋدا.  حەرارد ءنۋستىڭ باپكەرلىك قىزمەتى فۋتبول جانكۇيەرلەرىنە جاقسى تانىس.

وتكەن  4 ناۋرىز كۇنى «ەرتىس» ومبىنىڭ «ەرتىس» كومانداسىمەن جولداستىق كەزدەسۋ وتكىزىپ جەڭىس اكەلدى.  ەندى ەلىمىزدىڭ چەمپيوناتى شەڭبەرىندەگى العاشقى ويىن 11-ناۋرىز كۇنى ساعات 15:00 تە باستالادى. ەرتىستىكتەر ءوز الاڭىندا اتىراۋ كومانداسىمەن كەزدەسەدى.

فاريدا بىقاي

«ەگەمەن قازاقستان»

پاۆلودار

سۋرەتتى تۇسىرگەن: ۆالەري بۋگاەۆ