ماۋلەن اشىمباەۆ جەدەل جاردەم قىزمەتكەرلەرى مەن قامكوڭىل قاريالاردى مەرەكەمەن قۇتتىقتادى

قالالىق جەدەل جاردەم ستانساسى ەلوردامىزداعى ەڭ كونە مەديتسينالىق مەكەمەلەردىڭ ءبىرى. ونىڭ نەگىزى 1932 جىلى 14 اقپاندا قالانعان. ال 2017 جىلى پرەزيدەنتتىك باعدارلاما اياسىندا ستانسا جاڭا عيماراتقا كوشىرىلدى. مۇنداعى قىزمەتكەرلەردىڭ بارلىعى جوعارى بىلىكتى ماماندار. وسىدان ەكى جىل بۇرىن, ياعني 2016 جىلى ليتۆادا وتكەن حالىقارالىق مەديتسينالىق جەدەل جاردەم سايىسىندا اتالعان ستانسانىڭ بريگاداسى 3-ورىن الدى. ال وتكەن جىلى ەحرو-2017 حالىقارالىق كورمەسى اياسىندا وتكىزىلگەن ءىى رەسپۋبليكالىق جەدەل جاردەم قىزمەتكەرلەرىنىڭ سايىسىندا 2-ورىننان كورىندى. 

ستانسانىڭ باس دارىگەرى ساپاربەك دۇيسەنوۆتىڭ ايتۋىنشا, مەكەمە بارلىق زاماناۋي قوندىرعىلارمەن تولىق جابدىقتالعان. سونىڭ ناتيجەسىندە تاۋلىگىنە 274 شاقىرۋعا دەيىن قىزمەت كورسەتۋگە قاۋقارلى. شاقىرۋلاردىڭ ءوزى 4-6 ساناتقا بولىنەدى. مىڭعا جۋىق قىزمەتكەر ەڭبەك ەتەتىن ۇجىمدا قىز-كەلىنشەكتەردىڭ دە سانى ايتارلىقتاي كوپ. دەگەنمەن, ولاردىڭ ءبارى بىردەي مەرەكە كۇندەرى ەركىن دەمالۋعا مۇرسات المايدى. ويتكەنى حالىق دەنساۋلىعىنا ادال قىزمەت ەتەتىن ابزال جاندار بۇل كۇندەرى دە جۇمىسقا شىعىپ, ءوز مىندەتتەرىن ورىندايدى. «نۇر وتان» پارتياسى توراعاسىنىڭ ءبىرىنشى ورىنباسارى وسىنداي جۇمىس ۇستىندەگى ارۋلاردى ارنايى قۇتتىقتاپ, ولارعا ساتتىلىك تىلەدى. 

– بۇل مەرەكە مەيىرىم مەن ىزگىلىكتىڭ, جاقسىلىق پەن جىلىلىقتىڭ بەلگىسى. ونىڭ ءسانىن دە, ءارىن كەلتىرەتىن اق جاۋلىقتى اجەلەرىمىز بەن اياۋلى ارۋلارىمىز. سوندىقتان سىزدەردى بۇگىنگى ءتول مەرەكەلەرىڭىزبەن شىن جۇرەكتەن قۇتتىقتايمىن. مەيرامعا قاراماستان جۇمىسقا شىعىپ, حالىققا قىزمەت كورسەتۋ سىزدەردىڭ جاۋاپكەرشىلىكتەرىڭىزدى كورسەتەدى. ءاردايىم ەڭبەكتە بيىك بەلەستەردى باعىندىرىپ, جەتىستىكتەرگە جەتە بەرىڭىزدەر, – دەدى ماۋلەن اشىمباەۆ.

سونىمەن قاتار پارتيا توراعاسىنىڭ ءبىرىنشى ورىنباسارى ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆامەن بىرگە «شاراپات» الەۋمەتتىك قىزمەت كورسەتۋ ورتالىعىنا بارىپ, ايەلدەر قاۋىمىن مەرەكەمەن قۇتتىقتادى. بۇل ورتالىقتا جالعىزباستى جانە كومەككە مۇقتاج زەينەت جاسىنداعى قاريالار مەن مۇمكىندىگى شەكتەۋلى جاندارعا كۇتىم جاسالىپ, كەشەندى الەۋمەتتىك قىزمەت كورسەتىلەدى. «بۇگىندە 295 قارياعا قىزمەت كورسەتەمىز. ولاردىڭ اراسىندا 3 ۇلى وتان سوعىسىنىڭ ارداگەرى, 14 سولارعا تەڭەستىرىلگەندەر جانە 33 تىل ارداگەرى بار. ورتالىق 1989 جىلدان بەرى جۇمىس ىستەپ كەلەدى. ال 2007 جىلى «كوكتال-1» تۇرعىن الابىندا ورتالىقتىڭ جاڭا عيماراتى سالىنىپ, وسىندا كوشىپ كەلدىك», – دەيدى ورتالىق باسشىسى كەنجەبولات باپىشەۆ.

مەكەمە زاماناۋي مەديتسينالىق قوندىرعىلارمەن جابدىقتالعان. مۇندا ءپاللياتيۆتى كومەك ءبولىمى مەن شۇعىل جاعدايداعى ارنايى پالاتا دا جۇمىس ىستەيدى. بارلىق كابينەتتەردە ينتەنسيۆتى كۇتىم مەن تەراپياعا ارنالعان قاجەتتى مەديتسينالىق قۇرىلعىلار ورناتىلعان.

ماۋلەن اشىمباەۆ «شاراپات» الەۋمەتتىك قىزمەت كورسەتۋ ورتالىعىنىڭ قىزمەتكەرلەرى جانە ونداعى قامكوڭىل جاندارمەن كەزدەسۋىندە بارلىق الەۋمەتتىك ماسەلەلەر ءاردايىم «نۇر وتان» پارتياسىنىڭ باسىم باعىتى بولىپ قالاتىنىن ايتتى. ورتالىقتاعى اق جاۋلىقتى اجەلەر مەن اياۋلى ارۋلاردى مەرەكەمەن قۇتتىقتاعان پارتيا توراعاسىنىڭ ءبىرىنشى ورىنباسارى «پرەزيدەنتتىڭ بەس الەۋمەتتىك باستاماسى» قازاقستاننىڭ الەۋمەتتىك جاڭعىرۋىنداعى جاڭا كەزەڭدى باستاعانىنا نازار اۋداردى. سونداي-اق, ول بۇل باستامالار كوپ كەشىكپەي ءوز ناتيجەسىن بەرەتىنىن دە اتاپ ءوتتى.

– الەۋمەتتىك سالا ەلباسىنىڭ ەرەكشە نازارىندا. جاقىندا جاريالانعان ۇندەۋىندە مەملەكەت باسشىسى الەۋمەتتىك جاڭعىرۋدىڭ نەگىزگى بەس باستاماسىن ايقىنداپ بەردى. «نۇر وتان» پارتياسى اتالعان باسىم-باعىتتاردىڭ جۇزەگە اسىرىلۋىنا تىكەلەي جاۋاپتى. سوندىقتان بۇگىن وسى سالادا قىزمەت كورسەتەتىن مەكەمەلەرگە ارنايى بارىپ, مەرەكەمەن قۇتتىقتاۋدى ۇيعاردىق. جالپى اناعا قۇرمەت كورسەتۋ بارشامىزدىڭ ابىرويلى مىندەتىمىز. بۇگىنگى مەرەكەنىڭ باستى ءمانى دە وسى ۇعىممەن ۇندەسەدى دەپ بىلەمىن. وسى رەتتە ورتالىقتاعى بارشا اپا-اجەلەرىمىز بەن ارۋلارىمىزدى 8 ناۋرىز مەيرامىمەن شىن جۇرەكتەن قۇتتىقتايمىن, – دەگەن ماۋلەن اشىمباەۆ ولارعا مىقتى دەنساۋلىق پەن ۇزاق عۇمىر تىلەدى.