كوپشىلىك نازارى ادامزاتتىڭ نازىك جاراتىلىسىنا اۋعان بۇل كۇندەرى پاۆلوداردا ۇزاق جاساعان جانە كوپ بالالى انالارعا قۇرمەت كورسەتىلىپ جاتىر. بۇل تۋرالى 24.kz حابارلادى.
كوكتەمنىڭ شۋاقتى مەرەكەسىندە 10 كەيۋانا عاسىر تويىن تويلاۋ ۇستىندە. ولاردىڭ التاۋى وبلىس ورتالىعىندا, وزگەسى اۋدانداردا تۇرادى. وبلىس اكىمى بولات باقاۋوۆ جۇزگە كەلگەن تىل ەڭبەككەرى ەۆدوكيا ماكسيموۆانى قۇتتىقتادى. ءۇش بالا تاربيەلەپ وسىرگەن ول ەلىنىڭ وركەندەۋى جولىندا ايانباي ەڭبەك ەتكەن. ال ەڭ ۇزاق جاساعان كۇلجاميلا احمەديانوۆا اجەيدىڭ جاسى 106-عا كەلگەن. سونىمەن قاتار وبلىس باسشىسى بولات باقاۋوۆ 8 ناۋرىز مەرەكەسىنە وراي التى جانە ودان دا كوپ بالا تاربيەلەپ وسىرگەن ارداقتى انالارعا «التىن القا» جانە «كۇمىس القا» تابىس ەتتى. انالارعا ارناپ جايىلعان اق داستارحان باسىندا ەمەن-جارقىن اڭگىمە قۇرعان ايماق باسشىسى ءوزىنىڭ دە كوپ بالالى وتباسىنان شىققانىن جەتكىزدى. دۇنيە ەسىگىن ونىنشى ءسابي بولىپ اشقان ءۇيىنىڭ ءسۇت كەنجەسى ءۇشىن اناسىنىڭ التىن القاسى بويتۇمارعا اينالعان. انا بولۋ باقىتى ءبىر جاعىنان ۇلكەن جاۋاپكەرشىلىك. ماراپاتقا يە بولىپ جاتقان ءاربىر ايەل مۇنى جاقسى تۇسىنەدى.
- وتە قۋانىشتىمىن. ءوزىم التى پەرزەنتىمدى ۇستازدىق قىزمەتىممەن قاتار الىپ ءجۇرىپ, ءوسىرىپ جاتىرمىن. سولاردىڭ اماندىعىن تىلەيمىن. ەلىمىز تىنىش بولسىن. وزگە دە ايەل ادامداردى, ارۋلاردى 8 ناۋرىز حالىقارالىق مەرەكەمەن قۇتتىقتايمىن. ەلىمىز تىنىش, جۇرتىمىز امان بولسىن, - دەدى اسەل راقىمجانوۆا ەسىمدى كوپ بالالى انا.
- مەن ءۇشىن بۇگىن وتە قۋانىشتى كۇن. بارلىق انالاردى 8 ناۋرىز مەرەكەسىمەن قۇتتىقتايمىن. مەن ءوزىم كوپ بالالى وتباسىنان شىقانمىن. ومىرگە 6 ءسابي اكەلدىم. ەندى مەنىڭ وتان الدىنداعى مىندەتىم – سول بالالارىمدى ءوسىرىپ جەتكىزۋ. سونىمەن قاتار ءبىلىم بەرۋ, ەڭ بىرىنشىدەن ولارعا جاقسى تاربيە بەرۋ. بارلىق انالاردى مەرەكەلەرىمەن قۇتتىقتايمىن, - دەدى كوپ بالالى انا مارت ورالحانوۆا.