قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ حالىققا ءداستۇرلى جولداۋى – ەلدىڭ ستراتەگيالىق دامۋىن ايقىنداپ بەرىپ وتىرعان جىل سايىنعى باستى قۇجات. مەملەكەتتى دامىتۋدا زاماناۋي تالاپتار مەن وركەنيەتتىڭ جاھاندىق كورىنىسىنە ساي ارەكەت ەتۋدى باعدارلايتىن بۇل قۇجاتتىڭ مازمۇنى دا, قوعام الدىنا جۇكتەر جاۋاپكەرشىلىگى دە سالماقتى.
ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى داۋىرىندە دامۋدىڭ باسىم 10 باعىتىن ايقىنداپ بەرگەن بۇل جولداۋ ەل دامۋىنا جاڭا سەرپىن بەرمەك.
قازىرگى زامان تالابىنىڭ ترەندى – يندۋستريالاندىرۋ, جاڭا وزىق تەحنولوگيالاردى ەنگىزۋدىڭ كوشباسشىسىنا اينالۋ تالاپتارىنا باسىمدىق بەرىلۋى قۇجاتتىڭ ەرەكشە ماڭىزىن ايقىندايدى. يندۋستريالاندىرۋ پروتسەسىنىڭ جاڭا تەحنولوگيالىق قالىپتىڭ بارلىق مۇمكىندىكتەرىن پايدالانا وتىرىپ, مەيلىنشە يننوۆاتسيالىق سيپاتتا نەگىزدەلۋى ماقسات ەتىلدى. بۇل ماقسات ەلدى زاماناۋي تالاپتا العا ىلگەرىلەتە وتىرىپ 30 دامىعان ەلدەردىڭ قاتارىنا ەنۋگە جول اشپاق.
جولداۋ ونەركاسىپتىك رەۆوليۋتسيا الەمىنە بەيىمدەلە وتىرىپ, ەلىمىزدى سول تالاپتار ۇدەسىنە ساي دامىتۋدىڭ ماڭىزدىلىعىن ايقىنداپ بەردى. زاماناۋي تەحنولوگيالاردى كەڭىنەن قولدانا وتىرىپ دامۋدىڭ جاڭا بەلەسىن باعىندىرۋ جولىندا تسيفرلىق تەحنولوگيالاردىڭ الاتىن ورنىنا زور باسىمدىلىق بەرىلدى. بۇل ساتىدا ەلدىڭ دامۋىن تسيفرلى فورماتقا كوشىرۋ – كۇن تالابىنداعى باستى مىندەتتەردىڭ ءبىرى ەكەندىگى ايشىقتالدى. جولداۋدا كورسەتىلگەندەي, وسى جىلى «تسيفرلىق ءداۋىر» ونەركاسىبىن قالىپتاستىرۋعا ارنالعان يندۋستريالاندىرۋدىڭ ءۇشىنشى بەسجىلدىعىن ازىرلەۋ قولعا الىنباق. جاڭا تەحنولوگيالىق قالىپ بولاشاقتا ءبىزدىڭ تسيفرلىق ورتادا قالاي جۇمىس ىستەيتىنىمىزدى, ەلدىڭ ەكونوميكاسىن, الەۋمەتتىك جاعدايلارىن تۇبەگەيلى وزگەرتەتىندىگىن تارازىلاعان ەلباسى بۇل جاڭاشىلدىققا ۇلكەن دەن قويىپ وتىر.
جوعارى ءبىلىم بەرۋ ىسىندە جاساندى ينتەللەكتپەن جانە «ۇلكەن دەرەكتەرمەن» جۇمىس ىستەۋ ءۇشىن اقپاراتتىق تەحنولوگيالار بويىنشا ءبىلىم العان كاسىبي ماماندار سانى كوبەيسە, بۇل ەلىمىز ءۇشىن حالىقارالىق باسەكەلەستىك ارەنادا ۇلكەن ۇپاي بولماق. بۇل مىندەت تىكەلەي ۋنيۆەرسيتەتتەرگە تيەسىلى دەپ بىلەمىن. ستراتەگيالىق قۇجاتتا ايتىلعانداي, ءبىلىم بەرۋ جۇيەسىن, كوممۋنيكاتسيا مەن ستاندارتتاۋ سالالارىن جاڭا يندۋستريالاندىرۋ تالاپتارىنا ساي بەيىمدەۋ ەل دامۋىنا جاڭا سىلكىنىس بەرەرى انىق. وسى تالاپتار ۇدەسىنەن شىعىپ, باستامالار جان-جاقتى ورىندالعاندا قازاقستاننىڭ دامىعان 30 ەلدىڭ قاتارىنا ەنۋ مۇمكىندىگى ارتا تۇسەدى.
عالىم مۇتانوۆ,
ءال-فارابي اتىنداعى قازۇۋ رەكتورى