ۆاشينگتوننىڭ قالالىق كەڭەسى سەيسەنبى كۇنى رەسەي ەلشىلىگى ورنالاسقان الاڭدى بەلگىلى رەسەيلىك وپپوزيتسيونەر بوريس نەمتسوۆتىڭ اتىنا بەرۋ تۋرالى زاڭجوباسىن ءبىراۋىزدان قولدادى. بۇل تۋرالى bbc.com حابارلادى.
وتىرىس بارىسىندا كەڭەس مۇشەلەرى «بۇل بوريس نەمتسوۆتىڭ قۇرمەتىنە ارنالىپ وتىر» دەپ مالىمدەدى. ولار سونداي-اق, بۇل شەشىمدەرىن «قالانىڭ دەموكراتياعا بەيىمدىلىگىنىڭ بىردەن ءبىر دالەلى» دەپ اتاپ ءوتتى. قالالىق كەڭەستە وپپوزيتسيونەردىڭ اتى-ءجونى جازىلعان تاقتايشالار ونىڭ قايتىس بولعان كۇنىنە, ياعني 28 اقپانعا دەيىن ىلىنەدى دەپ ۇمىتتەنىپ وتىر.
ۆاشينگتونداعى كوشەلەردىڭ بىرىنە نەمتسوۆتىڭ اتىن بەرۋ تۋرالى ويدى العاش رەت 2016 جىلى فلوريدا شتاتىنىڭ رەسپۋبليكالىق سەناتورى ماركو رۋبيو ۇسىنعان بولاتىن. ەگەر بۇل ۇسىنىس قالالىق كەڭەس تاراپىنان قولداۋ تابار بولسا, رەسەيدىڭ اقش-تاعى ەلشىلىگى «بوريس نەمتسوۆ پلازا, 1-ءۇي» دەگەن مەكەنجايعا يە بولاتىنى سول كەزدە حابارلانعان.
2017 جىلدىڭ جەلتوقسان ايىندا قالالىق كەڭەستە نەمتسوۆتىڭ اتىن بەرۋ تۋرالى ماسەلە قوزعالعان. سول كەزدە ۆاشينگتون ۇكىمەتى ءپروفيلدى باسقارماسىنىڭ مۇشەسى بۇل جۇمىسقا باس-اياعى ەكى مىڭ دوللار قارجى جۇمسالاتىنىن ايتتى. ونىڭ ايتۋىنشا بۇل سوما كوشە اتاۋى جازىلعان تاقتايشالاردى ازىرلەۋگە كەتەدى.
«امەريكالىق باسشىلار كوشەنى, الاڭدى كىمنىڭ اتىنا بەرەتىنىن وزدەرى شەشەدى. ءبىز قۇراما شتاتتاردىڭ كەز كەلگەن شەشىمىن قابىلدايمىز», دەدى رەسەيدىڭ اقش-تاعى ەلشىسى اناتولي انتونوۆ.
ال ءوز كەزەگىندە رەسەي فەدەراتسياسىنىڭ بۇرىنعى ۆيتسە-پرەمەرى الفرەد كوح facebook پاراقشاسىندا بىلايشا وي ءبولىستى: «بوريس كەزىندە ۆلاديمير ءپۋتيننىڭ قارسىلاسى بولاتىن. ەندى, ماسكەۋدەگى الاڭدى دونالد ترامپتىڭ دۇشپانىنىڭ اتىنا بەرۋ ماسەلەسى قارالار ما ەكەن؟ حيللاري كلينتون با؟ اقىماقتىق سەكىلدى. بولماسا ءولتىرىپ كەتكەن ساياساتكەردىڭ اتىنا بەرۋ مە؟ بالكىم دجون كەننەدي بولار؟ امەريكالىقتار بۇل ىسكە قايتا قۋاناتىن بولادى. مۇمكىن ليۋتەر كينگ؟ ول دا سول سەكىلدى امەريكالىقتاردى قۋانتادى», دەپ جازدى.
ايتا كەتەيىك, بوريس نەمتسوۆتى 2015 جىلدىڭ 28 قاڭتارعا قاراعان ءتۇنى ماسكەۋ ورتالىعىندا اتىپ كەتكەن.