شىعارمالارى شۋاققا تولى وسىناۋ سۋرەتشىگە بەينەلەۋ ونەرى قانمەن دارىعان. اۋلەتىمەن بەينەلەۋ ونەرىنە قىزمەت ەتكەن سۇلتان يلياەۆ ەلىمىزدەگى تانىمال سۋرەتشى, ويۋلاردى وقۋدىڭ مامانى عاني يلياەۆتىڭ ۇلى عانا ەمەس, ونىڭ ونەرىن دە جالعاستىرعان مۇراگەرى.
تانىمال وتباسىندا دۇنيەگە كەلگەن سۋرەتشىگە ومىرلىك جولى مەن شىعارماشىلىق باستاۋى ءۇشىن وسىنىڭ ءوزى دە جەتكىلىكتى سياقتى كورىنگەنىمەن, بەينەلەۋ ونەرىنىڭ بۇگىنگى بەل بالاسى ءوز ورنەگىن ىزدەدى. بۇل سۋرەتشىنىڭ ەڭبەكتەرى وتباسىندا دۇنيەگە كەلگەن سۋرەتشىگە سۋپرەماتيزم مەن رەاليزم اراسىنداعى التىن ارقاۋ.
شىمقالانىڭ ميزام شاقتارىن ماڭگىلىككە سىيلاعان سۇلتان يلياەۆ ءبىراز جىل وڭتۇستىك قالانىڭ باس سۋرەتشىسى رەتىندە سۋرەتشىلەر وداعىنىڭ وبلىستىق فيليالىن باسقاردى. وعان قوسا قالالىق ديزاين باسقارماسىندا شاھاردىڭ كەلبەتىن جاساۋعا ەرەن ۇلەسىن قوسىپ جۇرگەن ادام.
وسىدان قىرىق جىل بۇرىن شىمكەنت مەملەكەتتىك پەداگوگيكالىق ينستيتۋتىنىڭ كوركەم-گرافيكا فاكۋلتەتىنەن تۇلەپ ۇشقان تالانت يەسى ءوزىن وسى سالاعا ارناپ كەلەدى. ەڭبەگى دە ەلەۋسىز ەمەس. قازاقستاننىڭ مادەنيەت قايراتكەرى دە, ەڭبەك سىڭىرگەن قايراتكەرى دە اتانعان. ەڭ باستىسى, ورتاسى ونى مىقتى سۋرەتشى رەتىندە مويىندايدى.
الايدا سۋرەتشى ءۇشىن ماڭىزدىسى, ءوزىنىڭ شىعارماشىلىق الەمى, ياعني جان بۇلقىنىسى بۋىرقانعان بوياۋلاردىڭ استاسىپ, كەنەپ بەتىندە سالتانات قۇرعانى.
بىردەن ايتۋ كەرەك, سۇلتان يلياەۆتىڭ تۋىندىلارى باسقا پلانەتادان تۇسكەندەي, بوگدە ءبىر الەم. سۋرەتشى ءوزىن سيمۆولدىق توتەمدەردى تۇپتەپ زەرتتەۋشى, حالىقتىق نىشانداردى بوياۋدىڭ تىلىمەن پارىقتاۋشى دەپ ەسەپتەسە دە, ونىڭ شىعارماشىلىق شەشىمدەرى توسىن.
ماسەلەن, ونىڭ تۋىندىلارى كادۋىلگى, جاۋابى دايىن, كوزگە تانىس كەسكىندەر ەمەس. ونىڭ كورمەلەرىندە ايالداعان ادام, سۋرەتشى نە ايتقىسى كەلدى, بۇل بوياۋلاردىڭ استارىندا نە بارىن ءسوزسىز ىزدەيدى. ءارى كۇردەلى, ءارى قاراپايىم تۋىندىلار تولايىم ءبىر عارىشتىق جۇيە سياقتى اسەر قالدىراتىنىن بايقاماۋ مۇمكىن ەمەس. قاراما-قايشىلىققا تولى شىعارمالار تولعانۋدى قاجەت ەتەدى.
سوعان قاراماستان, سۋرەتشىنىڭ ەڭبەكتەرىندە ۇلتتىق دەكوراتيۆتىك-قولدانبالى ونەردىڭ بەلگىلەرى سەرىكتەستىگىنەن جاڭىلمايدى. ەتنومادەني سيپاتقا يە مىنەز يلياەۆتىڭ بارلىق جۇمىستارىندا بار.
ونەرتانۋشىلار دا ءوز تاراپىنان سۋرەتشى شىعارمالارىنىڭ باستى تۇجىرىمى – قاساڭ شەڭبەردى بۇزىپ, قاراپايىم ادامدار بايقاي بەرمەيتىن الەمگە, كەز كەلگەن كەسكىنگە جاڭا كۇي سىيلاۋىمەن دارالاناتىنىن مويىندايدى. سۇلتان يلياەۆتىڭ جۇمىستارى – تۇنىق تۇستەر مەن قانىق بوياۋلاردىڭ پاتشالىعى.
كىمدە-كىم سۋرەتشىنىڭ اكەسى عاني يلياەۆتىڭ قولتاڭباسىمەن تانىس بولسا, بەينەلەۋ ونەرى قانىندا بار گەنەتيكالىق قۇبىلىس, ياعني تالانت تا تەك قۋالايتىنىن تۇسىنەر.
ايناش ەسالي, «ەگەمەن قازاقستان»
الماتى