بەيبىتشىلىك جانە كەلىسىم سارايىندا «استانا – مەنىڭ ماحابباتىم» اتتى ميۋزيكلدىڭ تۇساۋكەسەرى ءوتتى. مۋزىكالىق قويىلىمدى از ۋاقىتتا كوڭىلدى سپەكتاكلدەرىمەن ەستە قالعان «استانا ميۋزيكل» تەاترى ۇسىنىپ وتىر.
قويىلىمنىڭ قويۋشى-رەجيسسەرى – «استانا ميۋزيكل» تەاترىنىڭ كوركەمدىك جەتەكشىسى, «قازاقكونتسەرت» مكۇ ديرەكتورى, قازاقستاننىڭ ەڭبەك سىڭىرگەن قايراتكەرى اسحات ماەميروۆ. قويىلىم اۆتورلارى – قازاقستاننىڭ ەڭبەك سىڭىرگەن قايراتكەرى باقىت قايىربەكوۆ جانە ارتۋر ورەنبۋرگسكي. ميۋزيكل بارىسىندا اباي قۇنانباەۆتىڭ, سونداي-اق ارىستانبەك مۇحامەدي ۇلى, اقتوتى رايىمقۇلوۆا, قايرات باەكەنوۆ جانە حاميت شاڭعاليەۆتىڭ تۋىندىلارى ورىندالدى.
اتالعان ميۋزيكل ادامزاتقا ورتاق ۇلى – سەزىم ماحاببات تاقىرىبىندا ءوربيدى. قازاقستاندا وتەتىن ءان بايقاۋىنا قاتىسۋعا كەلگەن شەتەل قازاعى جانار مەن نۇرجاننىڭ ماحابباتىنا, ەندى بىردە كوپ جىلدار بۇرىن تۋعان جەردەن قول ۇزۋگە ءماجبۇر بولعان جاناردىڭ اتاسى حاميت اقساقالدىڭ ەلگە, جەرگە دەگەن ساعىنىشىنا اينالىپ ساحنا تورىنەن ءۇن قاتادى. قويىلىم رەجيسسەرى اسحات ماەميروۆتىڭ ايتۋىنشا, ميۋزيكلدىڭ «استانا – مەنىڭ ماحابباتىم» دەپ اتالۋىندا دا ۇلكەن ءمان بار.
«سەبەبى تاعدىردىڭ بۇرالاڭ جولى جىراقتاتىپ جىبەرگەن سان تاعدىرلار اسەم قالا استانادا توعىسادى. استانا – ورىندالار اسىل ارمانداردىڭ, جارقىن بولاشاقتىڭ قالاسى. استانا – ءبىزدىڭ تاۋەلسىزدىگىمىزدىڭ سيمۆولى. وسى رەتتە پاريج سياقتى ماحابباتتىڭ, ادامزاتقا ورتاق بارشا اسىل سەزىمدەردىڭ ورداسىنا اينالدىرۋىمىز كەرەك», دەيدى ول.
شىنى كەرەك, قويىلىمنىڭ تاقىرىبىنا قاراپ, كوركەم شىعارمادان گورى ساياسي ناۋقان لەبى باسىم كورىنگەن. الايدا داۋىس پەن قيمىل-قوزعالىس دراماتۋرگياسى, ماعىنالى ستسەنوگرافيا مەن كوستيۋمدەر قويىلىمدى كوڭىلدى ەتە تۇسكەن ميۋزيكلدىڭ مازمۇنى الدەقايدا اۋقىمدى ەكەنىن بايقادىق. سونىمەن بىرگە ۆوكال مەن پلاستيكانىڭ ءوزارا ۇيلەسىمى, ءبىر ءسات تە توقتامايتىن تارتىس پەن جاستىق ەنەرگەتيكاسى زال ءىشىن كەرنەدى. قازاقستانداعى ميۋزيكل جانرىنىڭ قالىپتاسۋى مەن دامۋى ءۇشىن تەر توگىپ جۇرگەن تالانتتى ۇجىم وزدەرىن جاڭا قىرىنان كورسەتۋگە بارىن سالىپ كەلەدى.
ايا ءومىرتاي,
«ەگەمەن قازاقستان»
سۋرەتتەردى تۇسىرگەن ەرلان ومار,
"ەگەمەن قازاقستان"