الەمدە قاتەرلى ىسىك اۋرۋلارىنان جىلىنا 10 ميلليونداي ادام كوز جۇمادى ەكەن. داۋاسى جوق دەرتتىڭ ىشىندە ءسۇت بەزى ىسىگىنەن ءولىم-ءجىتىم كورسەتكىشتەرى العاشقى ورىندا تۇر. بىراق بۇل سىرقاتتى ەرتە ساتىدا انىقتاسا, تولىققاندى جازىلۋ مۇمكىندىگى 94 پايىزعا جەتەدى. ال مۇنداي اۋرۋدى باستاپقى كەزەڭىندە انىقتاۋدىڭ باستى جولى – ساۋلەلى دياگنوستيكا. كۇللى الەمنىڭ راديولوگتارى مەن رەنتگەنولوگتارى استانادا جينالىپ, راديولوگتاردىڭ ءVىى ەۋرازياىق فورۋمى اياسىندا وسى ماسەلەنى كەڭىنەن تالقىلادى.
جيىننىڭ باسىندا دەنساۋلىق ساقتاۋ ۆيتسە-ءمينيسترى ءلاززات اقتاەۆا ەلىمىزدىڭ مەملەكەتتىك حاتشىسى گۇلشارا ابدىقالىقوۆانىڭ فورۋم قاتىسۋشىلارىنا جولداعان قۇتتىقتاۋحاتىن وقىپ بەردى. «ۇلتتىڭ دەنساۋلىعىن نىعايتۋ – مەملەكەتىمىزدىڭ باستى ساياساتىنىڭ ءبىرى. بۇگىندە ەلىمىزدە مەديتسينا سالاسىن دامىتۋدىڭ «دەنساۋلىق» باعدارلاماسى ءساتتى جۇزەگە اسىرىلىپ كەلەدى. بۇل باعدارلامانىڭ باستى ماقساتى – دەنساۋلىق ساقتاۋ سالاسىن ىلگەرىلەتىپ, حالىقتىڭ ءومىر ءسۇرۋ جاسىن ۇزارتۋ. جاھاندانۋ, تسيفرلاندىرۋ جانە تەحنيكالىق پروگرەستىڭ قارقىندى دامىعان زامانىندا بارلىق سالا زامانعا ساي كەشەندى وركەندەۋ كەرەك. بۇل راديولوگيا سالاسىنا دا قاتىستى. قازىرگى تاڭدا ۇساق دەتالدەردىڭ ءوزىن انىق ءارى ساپالى كورسەتەتىن, اعزاداعى مورفولوگيالىق وزگەرىستەردى ەرتە باستان انىقتاۋعا مۇمكىندىك بەرەتىن يننوۆاتسيالىق قوندىرعىلار شىعىپ جاتىر. مەديتسينانىڭ مۇنداي وزىق جەتىستىكتەرىن ەلىمىزگە دە ەنگىزىپ, ساۋلەلى دياگنوستيكا سالاسىنىڭ ەڭ جوعارى تاسىلدەرىن مەڭگەرە ءبىلۋىمىز كەرەك. بۇگىنگى فورۋم قازاقستاندىق ماماندار ءۇشىن ۇلكەن تاجىريبە الاڭىنا اينالاتىنىنا سەنىمدىمىن», دەلىنگەن قۇتتىقتاۋحاتتا.
راديولوگتاردىڭ ەۋرازيالىق فورۋمىنا الەمنىڭ 25 ەلىنەن 350-دەي دەلەگات كەلىپتى. ەكى كۇنگە جالعاساتىن القالى جيىندا ساۋلەلى دياگنوستيكا سالاسىنداعى جاڭا تەحنولوگيالار مەن ەمدەۋدىڭ سوڭعى تاسىلدەرى ءسوز بولىپ, جاس ماماندارعا بىلىكتى عالىمدار شەبەرلىك ءدارىسىن وتكىزبەك.
ۆيتسە-ءمينيستردىڭ مالىمەتى بويىنشا, بۇگىندە ەلىمىزدە 933 رەنتگەنولوگ, 450 كومپيۋتەرلىك توموگرافيا مامانى, 1500 ۋزي دارىگەرى, 40 يادرولىق مەديتسينا مامانى, 30 ءداستۇرلى ەمەس رەنتگەن-حيرۋرگ بار ەكەن. مامانداردىڭ ايتۋىنشا, قازاقستاننىڭ ساۋلەلى دياگنوستيكا سالاسىنىڭ دامۋ قارقىنى باسقا ەلدەردىڭ جاعدايىنان ەش كەم ەمەس. 2012 جىلدان بەرى قازاقستان – ەۋروپالىق راديولوگتار قوعامىنىڭ تولىق قۇقىلى مۇشەسى. بۇل دەگەنىڭىز ءبىزدىڭ ماماندار جىل سايىن الەمنىڭ ەڭ مىقتى عالىم-دارىگەرلەردىڭ دارىستەرىنەن ءوتىپ, بىلىكتىلىگىن شىڭداپ, وسى سالاداعى ەڭ سوڭعى ەمدەۋ تاسىلدەرىن يگەرىپ تۇرادى دەگەن ءسوز. ەۋروپالىق راديولوگتار قوعامىنىڭ ەڭ كوپ – ەكى اپتالىق كۋرسى قازاقستاندا وتكىزىلەدى ەكەن. دەگەنمەن دە, ەلىمىزدە راديولوگ-مامانداردى دايىنداۋ جاعىنان ماسەلە بار. مىسالى, امەريكادا, ەۋروپا ەلدەرىندە ساۋلەلى دياگنوستيكا ماماندارىن كەمى بەس جىل وقىتادى ەكەن. ال قازاقستاندا – ەكى جىل. «بۇل – راديولوگ-ماماندارىن دايارلاۋ ءۇشىن تىم از ۋاقىت. سوندىقتان كەلەشەكتە كادرلار دايىنداۋ ماسەلەسىن قايتا قاراماق ويىمىز بار. ءبىزدىڭ ويىمىزشا, ەندى ءبىر 5-10 جىلدا ەلىمىزدە ساۋلەلى دياگنوستيكا سالاسىنىڭ ەڭ مىقتى ماماندار شوعىرى قالىپتاساتىن بولادى», دەيدى قازاقستان راديولوگتار قوعامىنىڭ ۆيتسە-پرەزيدەنتى تايرحان داۋتوۆ.
وسىمەن جەتىنشى رەت وتكىزىلىپ وتىرعان راديولوگتاردىڭ ەۋرازيالىق فورۋمى بەلگىلى عالىم, ەلىمىزدىڭ راديولوگيا سالاسىنا سۇبەلى ۇلەس قوسقان تۇلعا جانعالي حامزاباەۆتىڭ رۋحىنا جانە قازاقستاندىق راديولوگتار قوعامىنىڭ 40 جىلدىعىنا ارنالدى.
قىمبات توقتامۇرات, «ەگەمەن قازاقستان»