جاستار – ءبىرىنشى, ەرەسەكتەر ەكىنشى ورىندا

اۋىلدا تۇرسا دا ۇزاق جىلدار قول كۇرەسى مەن گىر سپورتىنىڭ قازاق­ستاندا وركەندەۋىنە ولشەۋ­سىز ۇلەس قوسقان, تالاي  چەم­پيون­داردى باپتاعان اتاقتى ۇستاز ءوزىن قولپاشتاپ قارسى العان اعا­لارى مەن دوستارىن كورگەندە قاتتى تولقىدى. ۇلان اۋداندىق ءماس­لي­حاتىنىڭ دەپۋتاتى نۇرتاي تىلەۋ­جان جىرمەن شاشۋ شاشقان ءسات ەرەكشە اسەرلى بولدى.

– وتىز جىلدا مۇنداي قۇرمەتتى تۇڭ­عىش رەت كورىپ تۇرمىن. ءوز با­سىم ماقتانعاندى ۇناتا بەر­مەي­­مىن. ءدۇبىرلى جارىستارعا بارا جاتقاندا ەلەۋسىز اتتانىپ, قاي­تاردا دا باسقالارعا سال­ماق سالماي كەلەتىنمىن. ۇلان ەلى, جەرى دە باي عوي. ادامدارى قان­­­داي جارقىن, دوستىققا ادال. سىز­­دەر­­گە ەرەكشە العىسىمدى بىل­دىر­­گىم كەلەدى, دەدى مۇقان ساعيدوللا ۇلى.

شىركىن ادال دوستىققا نە جەت­سىن! ايشىلىق الىستان تابىس­پەن ورالعان, ەل نامىسىن ابىروي­مەن قورعاعان ازاماتتارعا قانداي قۇرمەت كورسەتسە دە جاراسىمدى عوي.

مۇقاننىڭ دوستارى اق داس­تار­قان جايىپ, ماجارستاندا قول كۇ­رەسىنەن وتكەن 39-شى الەم چەم­­پيوناتى جايلى سۇرادى.

– بۋداپەشتەگى الەم چەمپيو­ناتى­نا 55 مەملەكەتتىڭ 1600-گە جۋىق ىعاي مەن سىعايلارى جي­نالدى. ولاردىڭ اراسىندا بىر­نەشە دۇركىن الەم چەمپيوندارى بولدى.

قازاقستاننان باپكەرلەر مەن قول كۇرەسىنىڭ 84 شەبەرى باردى. الەم چەمپيوناتىنىڭ ءتارتىبى بويىنشا, جارىستىڭ ءبىرىنشى جانە ەكىنشى كۇنى 18 بەن 23 جاستاعى سپورتشىلار سىنعا ءتۇستى. ودان كەيىن, 40-50, 50-60, 60 جاستان اسقان ارداگەرلەر اراسىندا بىرنەشە توپ بولىپ جۇلدەلەردى ساراپقا سالدىق. سەنەسىز بە, جاس­تارىمىز جارادى.

فينالدا تەك قازاق سپورتشىلارى ونەر كور­سەتكەن كەزدە, شەتەلدەن كەلگەن ماماندار مەن جانكۇيەرلەر «بۇل الەم چەمپيوناتى ما, جوق الدە قازاقستاننىڭ بىرىنشىلىگى مە؟», دەپ تاڭدانىستارىن جاسىرا المادى. ۇلان اۋدانىنان بارعان الەمنىڭ ەكى دۇركىن چەمپيونى وراز باساروۆ بۇل جولى وڭ جانە سول قولمەن كەزدەسۋدە كۇمىس مەدال يەلەندى. اعا جاتتىق­تىرۋ­شى ەرلان ۋاليەۆتىڭ تاعى ءبىر شاكىرتى چەمپيون اتاندى. سەمەي­لىك ەكى جىگىت تە جەڭىستىڭ بيىك تۇعى­رىنا كوتەرىلدى. جەرلەسىمىز, كۇرشىمنىڭ تۋماسى, قازىر استا­نادا تۇراتىن ەركىن ءالىمجان چەم­پيون, اقتوبەلىك, بۇل كۇندەرى الماتىدا تۇرىپ جاتقان ادىل­بەك دەگەن ازامات كۇمىس جۇلدەگەر اتاندى. ەلىمىزدەگى قول كۇرەسى فەدەراتسياسىنىڭ پرەزيدەنتى, الەم, ازيا چەمپيونى, مەنىڭ شاكىرتىم – مارات اسايىنوۆ ەرلەدى. چەمپيونداردى باپتاعان, ءدۇبىرلى دوداعا زور ازىرلىكپەن, 12 باپكەر باستاپ بارعان كوماندا جاستار اراسىندا ءبىرىنشى, ال ەرەسەك­تەر اراسىندا ەكىنشى ورىن­عا تابان تىرەدى. اتتەڭ مۇگەدەكتەر, ارباعا تاڭىلعاندار, مىلقاۋ, كوزى كورمەيتىندەر اراسىنداعى جارىس­قا تولىق قۇرامدا كوماندا اپارا المادىق. ەگەر تولىق قۇرامدا بارعاندا ەرەسەكتەر اراسىندا دا ءبىرىنشى ورىندى بەرمەس ەدى. قول كۇرەسى ەرەكشە دامىعان وڭتۇستىك قازاق­ستان وبلىسى شاردارا قالا­سىنىڭ الەم چەمپيونى ارمان قارسىباەۆ باسقاراتىن كلۋبىندا جاتتىعاتىن التى بالانىڭ تور­تەۋى التىن, ال ەكەۋى كۇمىس جۇل­دە يەلەندى. الپىس جاستان اسقان ارداگەرلەر اراسىنداعى بىرىن­شى­لىككە 17 سپورتشى قاتىسىپ, ءوزىم جۇلدەگەر اتاندىم. راس, بۇل جولى بابىم كەلىسپەدى. ونىڭ ۇستىنە اۋىلدا تۇرامىن, بىرگە جاتتى­عاتىن ادام جوق, باسقا جۇمىستار دا باستان اسىپ جاتىر. كەلەر جىلى انتاليادا وتەتىن الەم بىرىنشىلىگىندە توپ جارسام دەگەن وي بار», دەپ اعىنان جارىلدى مۇقان اعزاموۆ.

قول كۇرەسى سپورتىن ورگە وگىز­دەي سۇيرەپ كەلە جاتقان مۇ­قان ساعيدوللا ۇلى ەلىمىزدە فەدە­را­تسيانى 1992 جىلى قۇردى. سودان بەرى ونىڭ جەتەكشىلىگىمەن ەلىمىزدە بىرنەشە الەم, ازيا چەمپيوناتتارى ءوتتى. قازىر قازاقستاننىڭ قول كۇرەسى جانە گىر سپورتى قۇراماسى الەمدىك رەيتينگتە ەكىنشى ورىندا تۇر.

2011 جىلى الماتىداعى بالۋان شولاق اتىنداعى سپورت سارا­يىندا مۇقان اعزاموۆتىڭ 60 جاسقا تولۋى قۇرمەتىنە قول كۇرە­سى­نەن الەم چەمپيوناتى وتكە­نى­نەن كوپشىلىك حاباردار بولار. سول جولى 48 مەملەكەتتەن 1300 ساڭلاق كەلىپ, جەڭىمپازدار اتاقتى سپورتشىنىڭ قولىنان كۋبوك پەن ماراپاتقا يە بولعان. اۋىلدا تۇرسا دا, ەلىمىزدەگى قول كۇرەسىنىڭ ءوسىپ-وركەندەۋىنە ۇلەس قوسىپ كەلە جاتقان, عالىم, ونەرتاپقىش ازاماتتىڭ ەسىمى ەلىمىزدەگى گين­نەس­تىڭ كىتابىنا ەنبەۋى قالاي دەگەن ساۋال تۋىندايدى؟ ەش­تەن كەش جاقسى, دەگەن ەمەس پە, مۇ­قان سياقتى ازاماتتاردى قالاي قۇر­مەتتەسەك تە لايىقتى.

وڭداسىن ەلۋباي, جۋرناليست وسكەمەن سۋرەتتە: مۇقاندى (وڭ جاقتان ءۇشىنشى) جەرلەستەرى قارسى الدى. سۋرەتتى تۇسىرگەن اۆتور