وتكەن جۇما كۇنى «قازمەديا» ورتالىعىندا اقپارات جانە كوممۋنيكاتسيالار ءمينيسترى داۋرەن اباەۆ پەن قازاقستان حالقى اسسامبلەياسى توراعاسىنىڭ ورىنباسارى-حاتشىلىق مەڭگەرۋشىسى دارحان مىڭبايدىڭ قاتىسۋىمەن «قازاقستاننىڭ 100 جاڭا ەسىمى» جوباسى بويىنشا جۇمىس توبىنىڭ جانە ساراپشىلاردىڭ كەزەكتى وتىرىسى ءوتتى. وعان قوعام بەلسەندىلەرى, باق وكىلدەرى قاتىستى.
وتىرىستى اقپارات جانە كوممۋنيكاتسيالار ءمينيسترى د.اباەۆ اشىپ, قىسقاشا ءسوز سويلەدى. «ەلباسى ۇسىنعان «رۋحاني جاڭعىرۋ» باعدارلامالىق ماقالاسىنىڭ اياسىندا قولعا الىنعان بۇل جوبا ونەرىمەن, بىلىمىمەن, قوعامعا سىڭىرگەن ەڭبەگىمەن, ەرەكشە قاسيەتتەرىمەن دارالانعان تالانتتى ازاماتتاردىڭ تانىلۋىنا ۇلكەن مۇمكىندىك تۋعىزىپ وتىر. جاڭا ەسىمدەردى انىقتاۋعا جۇرتشىلىق تا جوعارى بەلسەندىلىك كورسەتۋدە», دەي كەلىپ, ول بيىلعى 7 ماۋسىمنان باستاپ 15 قىركۇيەككە دەيىن ەلىمىزدىڭ تۇكپىر-تۇكپىرىنەن جوباعا قاتىسۋشىلاردان وتىنىشتەر قابىلدانعانىن جەتكىزدى. ولار «ەل.كز» پورتالىندا تىركەلىپ, ۇزىن سانى 2212 ادامعا جەتكەن. مينيستر قازىر ولاردى ىرىكتەۋ جۇمىستارى جۇرگىزىلىپ جاتقانىن, سونىمەن قاتار ولاردىڭ تابىستىلىعىنىڭ سىرىن اقپارات قۇرالدارىندا جان-جاقتى كورسەتۋ جۇمىستارى قولعا الىنعانىن ايتتى. «حالىققا ولاردىڭ تابىستىلىعىنىڭ سىرىن تانىتار بولساق, بۇل شارانىڭ تاربيەلىك ءارى يدەولوگيالىق تۇرعىدان ءوز جەمىسىن بەرەتىنىنە ءبىز سەنىمدىمىز. قازىر اقپارات جانە كوممۋنيكاتسيالار مينيسترلىگى مەن قازاقستان حالقى اسسامبلەياسى وسى ماقساتتى ىسكە اسىرۋ بويىنشا جۇيەلى ىستەردى قولعا الۋدا. اتاپ ايتقاندا, 100 جاڭا ەسىمنىڭ ءبىرى اتانۋعا ۇمىتكەر ازاماتتار تۋرالى دەرەكتى فيلمدەر تسيكلى تۇسىرىلۋدە», دەدى مينيستر.
وسىدان كەيىن جينالعاندارعا مىسال رەتىندە «استانا» تەلەارناسى تۇسىرگەن فيلمنەن ءۇزىندى كورسەتىلدى.
وسىدان ءارى د.اباەۆ فيلم قامتىعان ازاماتتاردىڭ بىرنەشەۋىن اتاپ ءوتتى. ماسەلەن, اقتوبە قالاسىنداعى مۇگەدەك جان شاحان جولداسباەۆتىڭ تۋعان شاھارىنداعى عيماراتتارعا پاندۋس جاساۋدى ۇيىمداستىرعانىن, شىعىس قازاقستان وبلىسىنىڭ بەس مىڭ ادامدىق شاعىن كەنتىندە تۇراتىن ۆالەنتين اليفانوۆتىڭ بالالاردىڭ ونەر مەكتەبىندە جاڭا تەاتر ءبولىمىن اشقانىن جەتكىزدى. سوڭعىسىنىڭ شاكىرتتەرى قازىر بالالار اراسىندا وتەتىن حالىقارالىق كونكۋرستارعا قاتىسىپ, بايگە الىپ جۇرگەن كورىنەدى.
قحا توراعاسىنىڭ ورىنباسارى دارحان مىڭباي جۇمىس توبىنىڭ العا قويىلعان ماقسات جولىندا ۇلكەن ءىس-شارالار اتقارعانىنا ريزاشىلىق بىلدىرە كەلىپ, تىركەلگەن ازاماتتاردىڭ تابىستىلىعىنىڭ سىرى, ولاردىڭ جۇرگەن جولدارى تۋرالى « ۇلى دالانىڭ جاڭا ەسىمدەرى» دەگەن اتپەن الەۋمەتتىك جەلىدە دە توپ قۇرىلعانىن ايتتى. جالپى, وندا تارتىلعان ادامداردىڭ سانى 6 مىڭنان اسىپ كەتىپتى. قازىر ولاردى قولداۋ مەن تالقىلاۋلار ءجۇرىپ جاتىر. سونىمەن قاتار, 15 قىركۇيەكتە وتىنىمدەر قابىلداۋ اياقتالىپ, ەندى ءارى قاراي جۇمىستار مينيسترلىكپەن بىرلەسىپ جاسالادى, دەدى ول. د.مىڭباي اسسامبلەيا قۇرىلىمدارىنىڭ بۇل ءىس-شاراعا ايرىقشا بەلسەندىلىكپەن قاتىسقانىن اتاپ ءوتتى. ولاردىڭ قاتىسۋىمەن 520 ادامنىڭ ءومىرباياندارى تىركەلىپتى, ال تۇسكەن ۇسىنىستاردىڭ سانى 900-گە جۋىق ەكەن. اسسامبلەيالىقتار تىزىمگە ۇسىنعان كانديداتتاردىڭ قاتارىندا ول مىسالعا, «رودينا» اۋىلدىق وكرۋگىنىڭ اكىمى بەلا گازديەۆانى اتاپ, ونىڭ ءوز جۇمىسىن بەلسەندىلىكپەن اتقارىپ, ۇزدىك ۇسىنىستارىمەن كوزگە ءتۇسىپ جۇرگەنىن, سونىمەن قاتار, 26 جاسىندا كانديداتتىق ديسسەرتاتسيا قورعاعانىن جەتكىزدى. سونداي-اق, شىعىس قازاقستان وبلىسىنىڭ 28 جاسار تۇرعىنى قۋانىش جۇمابەكوۆ اعىلشىن ءتىلىن جەڭىل جولمەن ۇيرەنۋ وقۋلىعىن جاساپ, ونىڭ ۇزدىكتىگىن تۇركيالىقتارعا مويىنداتىپ, سول ەلدە باستىرعان جانە ءوزى بىرنەشە ءتىلدى مەڭگەرگەن پوليگلوت, اۋدارماشى, عالىم ەكەن. بۇرىن ەسىمدەرى حالىققا بەلگىسىز بولىپ كەلگەن ازاماتتارىمىز كوپ جانە ولار قازاق پەن ورىس اراسىنان عانا ەمەس, قازاقستاندا تۇراتىن بارلىق ەتنوس وكىلدەرى اراسىنان شىققان, دەدى ول.
ال «استانا قالاسى تەلەديدارى» جشس باس ديرەكتورى ءلاززات تانىسباي جۇرتقا جاڭا كورسەتىلگەن فيلم سياقتى 10 دەرەكتى تۋىندى ءتۇسىرىلىپ, ونىڭ ءبارى ەفيردەن بەرىلەتىنىن جەتكىزدى. ء«بىزدىڭ قىزمەتكەرلەرىمىز بۇل جۇمىستارعا بەلسەنە كىرىسىپ, شىعارماشىلىق شابىتپەن جۇمىس ىستەۋدە. جاڭا ەسىمدەردىڭ كوبىن ءبىزدىڭ جۋرناليستەرىمىز بۇرىن بىلمەگەن, ەندى ولارمەن ەتەنە تانىسا كەلگەندە وزدەرىنىڭ تاڭىرقاۋلارىن جاسىرا الماۋدا. بۇرىن ءبىز كەز كەلگەن سالانىڭ جۇرتقا بەلگىلى ادامدارىن عانا كورسەتىپ, ماقتانىش ەتەتىن بولساق, ەندى ونەرلەرى مەن تابىستى ىستەرى حالىققا بىلىنبەي كەلگەن تالانتتى ادامداردىڭ بىزدە وتە كوپ ەكەنىنە كوز جەتكىزىپ جاتىرمىز», – دەدى ول.
«قازكونتەنت» اق باسشىسى ەۆگەني كوچەتوۆ «ەل.كز» پورتالىنداعى «100 جاڭا ەسىم» بويىنشا اۋقىمدى جۇمىس جاساعانىن, سايتقا كەلگەن بارلىق ءوتىنىش قابىلدانعانىن ايتتى. ء«بىز جۇمىستىڭ ءبىرىنشى كەزەڭىندە جەرگىلىكتى اتقارۋشى ورگاندارمەن ىنتىماقتاسىپ, ولاردىڭ ۇسىنىستارىن جينادىق, ەندى 1 قازاننان ايدىڭ اياعىنا دەيىن جۇمىستىڭ ەكىنشى كەزەڭىن باستاپ, وسى سايتتاعى ەسىمدەرگە حالىقتىڭ ونلاين رەجىمدە داۋىس بەرۋىن ۇيىمداستىردىق. سونىمەن بىرگە ۇمىتكەرلەردىڭ جەڭىمپاز بولۋىنىڭ ەڭ باستى كريتەريى – ەلباسىنىڭ باعدارلامالىق ماقالاسىندا ايتىلعانىنداي, تاۋەلسىز قازاقستان ءۇشىن ايرىقشا ماڭىزدى ەڭبەك ەتكەندىگىنىڭ مويىندالۋى», – دەدى ول. سونىمەن بىرگە ول جينالعاندارعا سايتتا كورسەتىلگەن داۋىس بەرۋدىڭ ءتارتىبى تۋرالى بايانداپ بەردى.
وتىرىستا بۇلاردان باسقا دا جۇمىس توبى مەن ساراپشىلاردىڭ بىرنەشە بەلسەندىلەرى سويلەپ, وزدەرىنىڭ ىستەگەن جۇمىستارى مەن ۇسىنىستارىن ورتاعا سالدى. جيىندى اقپارات جانە كوممۋنيكاتسيالار ءمينيسترى د.اباەۆ قورىتىندىلاپ, پورتالعا ەسىمدەرى ەنگەن بارلىق ادام بەلگىلى ءبىر تابىسقا قول جەتكىزگەندەر, ياعني ولاردىڭ ارقايسىسى ءبىر جەتىستىكتىڭ تاريحى ەكەنىن ايتا كەلىپ, باق ولاردى حالىققا تانىتۋدا ايانباي ەڭبەك ەتۋلەرى كەرەكتىگىن ايتتى.
سۋرەتتى تۇسىرگەن ورىنباي بالمۇرات, «ەگەمەن قازاقستان»