– بۇگىن باتىس قازاقستان وبلىسىنىڭ ورتالىعىنان ەۋروپاداعى فرانكفۋرت قالاسىنا تىكە جول ءتۇستى. قازاقستان – الەمنىڭ دامىعان ەلدەرىمەن تىعىز قارىم-قاتىناس ورناتقان ەل. ەكسپو-2017 كورمەسىنە گەرمانيا وكىلدەرى دە قاتىسىپ, جاڭا تەحنولوگيالارىن نازارعا ۇسىنۋدا. ەلباسىنىڭ «نۇرلى جول» باعدارلاماسى اۋقىمىندا حالىقارالىق ءدالىزدى دامىتۋ جونىندەگى تاپسىرماسى ورىندالۋدا. باتىس قازاقستان وبلىسى اكىمدىگى «قپو ب.ۆ.» جانە «ەير استانا» كومپانيالارىمەن كەلىسسوز جۇرگىزىپ, جاڭا رەيستىڭ اشىلۋىنا قول جەتكىزدى. وتكەندە «ورال-ماسكەۋ» باعىتىندا دا رەيس اشقان ەدىك. بۇگىندە ورال اۋەجايىنىڭ تەرمينالىن حالىقارالىق دەڭگەيگە سايكەس جوندەۋ ءۇشىن جوبالىق-سمەتالىق قۇجاتتاما جاسالىپ جاتىر. جاڭا حالىقارالىق رەيس ءوڭىر ءۇشىن ينۆەستور تارتۋعا, بيزنەس سالاسىنداعى سەرىكتەستىكتى دامىتۋعا وڭ جاعداي تۋعىزادى, – دەيدى باتىس قازاقستان وبلىسى اكىمىنىڭ ورىنباسارى يگور ستەكسوۆ.
فرانكفۋرت – گەرمانيادا ورنالاسقان ءىرى اۋەجاي. ول ەۋروپا بويىنشا جولاۋشىلار سانى جونىنەن لوندون قالاسىنداعى حيتروۋ, پاريجدەگى شارل-دە-گولل جانە ستامبۇلداعى اتاتۇرىك اۋەجايلارىنان كەيىنگى 4-ورىندا تۇر. فرانكفۋرت اۋەجايىنان الەمنىڭ تۇكپىر-تۇكىپىرىنە 293 باعىتتا جولاۋشىلار رەيسى بار ەكەن. ەندى, مىنە, وعان قازاقستاننىڭ باتىس قاقپاسى – ورال قوسىلدى.
- «ەكسپو-2017 كورمەسى كەزىندە گەرمانياعا قاتىنايتىن جاڭا رەيستىڭ اشىلۋى اسا ماڭىزدى ءرول اتقارادى. ەندى ورالعا بۇرىنعىدان 4,2 ساعاتقا ەرتە جەتە الامىز. «قاراشىعاناق پەتروليۋم وپەرەيتينگ ب.ۆ.» كومپانياسىندا 40-تان استام شەتەلدىك مەملەكەتتەن كەلگەن مامان جۇمىس ىستەيدى. ولار ءۇشىن دە ەلىنە وڭاي بارىپ كەلۋگە جاعداي جاسالدى», – دەيدى «قپو ب.ۆ.» كومپانياسىنىڭ جوبالارىن باسقارۋشى ترەۆور ماندەي.
جولعا شىققان Airbus A320 c ۇشاعىندا ەكونوم كلاستى – 132, بيزنەس-كلاستى – 16 ورىن بار. ەڭ تومەنگى بيلەت باعاسى – 154 935 تەڭگەگە ەسەپتەلگەن.
قازبەك قۇتتىمۇرات ۇلى,
"ەگەمەن قازاقستان"
ورال