مىسالى, مۇحتار اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى سپورت جانە تۋريزم فاكۋلتەتىنىڭ 1-كۋرس ستۋدەنتى دانيار مەلدەبەك ەركىن كۇرەستەن ءۇندىستاندا وتكەن ازيا چەمپيوناتىندا قولا جۇلدەگە يە بولسا, اتىراۋدا وتكەن قازاقستان جاستار ويىندارىندا 84 كيلو سالماق دارەجەسىندە جۇلدەلى 2-ءشى ورىننان كورىندى. ەندى بيىل الەم بىرىنشىلىگىنە قاتىسۋدى جوسپارلاپ وتىر. جاقىندا عانا سپورت شەبەرى اتاعىنا قول جەتكىزگەن ول ەركىن كۇرەس سەكتسياسىنا جەتى جاسىنان باستاپ قاتىسىپتى. ال تاەكۆوندوشى نۇرقانات قوجاحمەت 2020 جىلى وتەتىن توكيو وليمپياداسىندا توپ جارۋدى ماقسات ەتەدى. ارينە, توپ جارعاننان بۇرىن وليمپياداعا جولداما الۋ دا وڭاي شارۋا ەمەس. ول ءۇشىن ىرىكتەۋ جەكپە-جەكتەرىندە ۇزدىكتەر قاتارىنان كورىنىپ, الەمدىك رەيتينگتە ءوز سالماق دارەجەسىندە العاشقى سەگىزدىكتە بولۋى كەرەك. مۇنداي تالاپتاردى جاقسى بىلەتىن قوجاحمەت جاتتىعۋلارىن ەسەلەي تۇسۋدە. قازىرگى كورسەتكىشتەرى دە ماقتان ەتەرلىكتەي. سپورت شەبەرى. قارا بەلبەۋدەن 1-ءشى دان يەگەرى. قازاقستان چەمپيوناتىندا جانە ءتۇرلى دەڭگەيدەگى جارىستاردا بىرنەشە رەت جەڭىسكە جەتكەن. حالىقارالىق ارەنادا 2015 جىلى جاسوسپىرىمدەر اراسىندا قىتاي ەلىنىڭ تايبەي قالاسىندا وتكەن ازيا بىرىنشىلىگىندە 68 كيلو سالماقتا قولا جۇلدەگە يە بولدى. ال 2016 جىلى بىرىككەن اراب امىرلىكتەرىندە وتكەن G-1 دارەجەسىندەگى III Fujairah open جارىسىندا جاستار اراسىندا قارسىلاس شاق كەلتىرمەي, التىن جۇلدەگە يە بولدى. بيىل 74 كيلو سالماق دارەجەسىنە اۋىسقان سپورتشى – م.اۋەزوۆ اتىنداعى وقمۋ-دىڭ 2-كۋرس ستۋدەنتى. قازىرگى تاڭدا ول جازعى ۋنيۆەرسيادا مەن قازاقستان كۋبوگىنا جانە كۇزدە وتەتىن قازاقستان بىرىنشىلىگىنە دايىندالۋدا. قوجاحمەتتى سپورتقا 10 جاسىندا اكەسى الىپ كەلگەن. ءىنىسى المات قوجاحمەت تە تاەكۆوندودان ءبىراز بيىكتەردى باعىندىرىپ ۇلگەرگەن. «شىمكەنتتە سپورتقا جاقسى كوڭىل بولىنۋدە. مۇنى قازاقستاندا ءتۇرلى قالالارعا جارىستارعا بارعاندا بايقادىم. ءبىزدىڭ سپورت كەشەندەرىنىڭ جاي-كۇيى, سونداعى جاعىمدى اتموسفەرا استانا, الماتى قالالارىنان سونشالىقتى تومەن ەمەس. الدىڭعى ۇشتىكتە دەسە دە بولادى. سونداي-اق, ءبىزدىڭ ۋنيۆەرسيتەتتە سپورتپەن اينالىسۋعا بارلىق جاعداي جاسالعان. رەكتورىمىز جۇماحان مىرحالىقوۆ اعايىمىزعا ايتار العىسىمىز زور! ءبىزدىڭ ەلىمىزدە ءالى ەشكىم وليمپيادادا تاەكۆوندودان التىن المادى. 2008 جىلى تاەكۆوندوشى ارمان ءشىلمانوۆ قولا العان ەدى. ودان كەيىن ەشقانداي جەتىستىككە جەتە المادىق. وسى ولقىلىقتىڭ ورنىن تولتىرىپ, وليمپيادا جولداماسىنا يە بولۋ ءۇشىن بارىمدى سالامىن», دەيدى نۇرقانات قوجاحمەت.
عالىمجان ەلشىباي, «ەگەمەن قازاقستان»
شىمكەنت