العاشقى باسقوسۋدا اۆستريا دەلەگاتسياسىنىڭ باسشىسى, عىلىمي زەرتتەۋلەر جانە ەكونوميكا ۆيتسە-ءمينيسترى بەرنادەتتە گيرلينگەر ءسوز سويلەپ, قازاقستان وزدەرىنىڭ ورتالىق ازياداعى ماڭىزدى سەرىكتەسى ەكەنىن اڭگىمەلەدى. «كۇللى دۇنيە كوز تىككەن كورمە اياسىندا قازاق ەلىنىڭ استاناسى «بولاشاقتىڭ ەنەرگياسى» تاقىرىبى بويىنشا جاڭا يدەيالارمەن جانە شەشىمدەرمەن الماسۋ ءۇشىن ەڭ قولايلى الاڭعا اينالدى. ەكسپو – اقپاراتتاندىرۋ, شابىتتاندىرۋ جانە قارىم-قاتىناس جاساۋ ءۇشىن تاپتىرماس ورىن», دەدى ءمينيستردىڭ ورىنباسارى. مەرەكە قوناقتارى اۆستريانىڭ پاۆيلونىمەن تانىسىپ, كۇش ەنەرگياسىن تاماشالادى. بۇل پاۆيلوننىڭ ەرەكشەلىگى دە سول, كەلۋشىلەر «بولاشاقتىڭ ەنەرگياسىن» وزدەرى وندىرەدى. ماسەلەن, مەملەكەتتىڭ اسەم تابيعاتىن, كورىكتى وڭىرلەرىن, كەرەمەت قالالارىن تاماشالاعىڭىز كەلسە, LED ەكرانعا جالعانعان ۆەلوسيپەدتى تەبۋىڭىز كەرەك. سول كەزدە ەكراندى ىسكە قوساتىنداي ەنەرگيا جينالىپ, بەينەماتەريالداردى كورەسىز. مۇندا «ويناپ ءجۇرىپ» ەنەرگيا جينايتىن, سول ارقىلى ىسكە قوسىلاتىن بىرنەشە قۇرىلعى ورناتىلعان. پاۆيلوندا ۆەلوسيپەد باسقىشىن اينالدىرعاندا قانشا ەنەرگيانى وندىرۋگە بولاتىنىن دا بىلۋگە بولادى. ايتالىق, جەڭىل كولىكتى ءبىر شاقىرىم قاشىقتىققا ەنەرگيامەن قامتاماسىز ەتۋ ءۇشىن باسقىشتى 12 ساعات بويى اينالدىرۋ قاجەت. سول سياقتى ءبىر ۇيگە قاجەتتى ەنەرگيانى 5000 ساعات وندىرۋگە تۋرا كەلەدى. ال كومپيۋتەردە ءبىر كليك جاساۋ ءۇشىن ۆەلوسيپەد باسقىشىن 52 سەكۋند اينالدىرسا جەتكىلىكتى. بۇدان بولەك, اتكەنشەكتەردى تەۋىپ, مۋزىكانى ويناتۋعا مۇمكىندىك بار. وسىلايشا, اۆستريالىقتار كينەتيكالىق ەنەرگيانىڭ, ياعني قوزعالىس كۇشىنىڭ ماڭىزدىلىعىن كورسەتكەن.
سىرت كوز – سىنشى
اناستاسيا بوندارەنكو, اۆستريالىق گيد: – اۆستريانى مۋزىكاسىز جانە ۆەلوسيپەدسىز ەلەستەتۋ مۇمكىن ەمەس. سول سەبەپتى, ءبىز پاۆيلوندى جاساقتاۋ بارىسىندا وسى ەكى نارسەنى بارىنشا پايدالانىپ, بالامالى ەنەرگيانىڭ ماڭىزدىلىعىن ايشىقتاۋعا تىرىستىق. مۇندا ەنەرگيا ءوندىرۋ ءۇشىن بارلىق ينستاللياتسيالاردى قوزعاۋ قاجەت, اينالدىرۋ كەرەك جانە قول جۇمساۋعا مىندەتتىسىز. ويتكەنى, ەنەرگيانىڭ باستى كوزى – ادامنىڭ ءوزى, ونىڭ اقىلى, جۇرەگى مەن كۇشى. سونىڭ ءبارى سارقىلماس ەنەرگيا كوزى بولىپ سانالادى. پەتەر ۆيسكوۆسكي, اۆستراليالىق قوناق: – كورمە كەشەنىنىڭ ينفراقۇرىلىمى وتە ىڭعايلى جاسالعان ەكەن. مۇندا بىرەر كۇننەن كەيىن باستالاتىن استانا ەكونوميكالىق فورۋمىنا قاتىساتىن بولعاندىقتان, ءالى ءبىراز كۇن ايالدايتىنىم انىق. الەم پاۆيلوندارىمەن تانىسۋعا مۇمكىندىگىم بار, اسىرەسە, اقش, ۆەنەسۋەلا ەلدەرىنىڭ تاقىرىپتارى قىزىقتىرادى. استاناعا العاش كەلىپ تۇرمىن, ارحيتەكتۋرالىق ءار الۋاندىعىمەن لاس-ۆەگاسقا ۇقسايتىن ادەمى قالا ەكەن. وسى دامۋ قارقىنىن جوعالتپاسا, تۋريستەر كوپ ات باسىن بۇراتىن ايماق بولاتىنى ءسوزسىز.
اسحات قويشىعارا ۇلى, «ەگەمەن قازاقستان»
سۋرەتتەردى تۇسىرگەن ەرلان وماروۆ, «ەگەمەن قازاقستان»