وسىلايشا ەڭ كوپ ەنەرگەتيكا ءوندىرۋشى جانە تۇتىنۋشى مەملەكەت رەتىندە بالامالى قۋات كوزدەرىن دامىتۋعا الەم نازارىن اۋدارماق. سوڭعى جىلدارى قانت قۇراعىنان بيووتىن ءوندىرۋ سالاسىندا كوش باستاپ كەلە جاتقان تايلاندتىقتار كورمە كەزىندە قوناقتارعا قۋات قورلارىن پايدالانۋدىڭ نەبىر تۇرلەرى مەن اۋانى لاستاماۋدىڭ جولدارىن كورسەتپەك. ونى اۋىل شارۋاشىلىعى سالاسىندا جەتكەن جوعارى ناتيجەلەرى ارقىلى تانىستىرادى.
كورمە زالىندا تايلىقتاردىڭ ءومىر سالتى, ءتۇپ تاريحى مەن تابيعي بايلىقتارىنىڭ ەنەرگەتيكالىق الەۋەتى ۇسىنىلعان. ءبىرىنشى بولىمدە تايلاندتىڭ كىشىرەيتىلگەن ۇلگىسىن جەڭىل ينفوگرافيكالار مەن ديناميكالىق دەمونستراتسيالار تەحنولوگياسى ارقىلى تۇسىندىرەدى. ەكىنشى ءبولىم – مادەني كورسەتىلىم. ساحنادا بارلىق جاستاعى ادامداردىڭ نازارىن ەرىكسىز اۋداراتىن – جارىق ديودتى LED ەكران. مۇندا تاي مادەنيەتىنىڭ ءتۇرلى تۇستارىن تاماشالايسىز. ء«بىز «تايلاند كەرەمەتى» دەپ اتالاتىن تۇجىرىمداما جاسادىق. سونىڭ اياسىندا, قازاق حالقى ساۋىق-سايراندى جاقسى كورەتىندىكتەن, تاماشا مادەني ءىس-شارالار مەن ويىن-ساۋىقتار ۇسىنامىز», دەيدى جوبا اۆتورلارى.
پاۆيلوندا بولاشاقتا پايداعا جارايتىن قۋاتتىڭ جاڭارتىلاتىن كوزدەرى جانە ەنەرگيا قۋاتى تۋرالى اقپاراتتار لەگى توپتاستىرىلعان. تاي حالقىنىڭ ءبىر سيمۆولى جانە بويتۇمارى – پالانگ. بۇل – كادىمگى جۇگەرى. ول, كورول ينستيتۋتىنىڭ دەرەكتەرى بويىنشا, بولاشاق قۋاتىن العا جىلجىتۋعا ارنالعان كۇشتى كورسەتەتىن «بيلىك», «كۇش» جانە «بيلىك ءۇشىن الەۋەت» دەگەندى بىلدىرەدى.
«جۇگەرى – قازاقستان حالقى ءۇشىن دە ازىق-ت ۇلىك ءونىمى. سوندىقتان جۇگەرىنى پايدالانا وتىرىپ, جەرگىلىكتى تۇرعىندارمەن بايلانىستى ءتيىمدى ورناتۋعا بولاتىنى ءسوزسىز. ەكسپو- 2017 كورمەسى ءۇشىن بويتۇمار رەتىندە جۇگەرىنى تاڭداعان سەبەبىمىز وسى», دەيدى ولار.
كورمە بارىسىندا پالانگ بولاشاق زەرتحانالاردى ءوز «اۋزىمەن» تانىستىرادى. ول بولاشاقتىڭ قۋاتىن قالاي پايدالانۋ كەرەكتىگىن ەرەكشە حيكايامەن باياندايدى. مۇندا قانت قۇراعى, ەۆكاليپت, رەزەڭكە, كۇرىش, جۇگەرى جانە اۋىل شارۋاشىلىعى ونىمدەرىنىڭ قالدىقتارى, مانيوكا مەن پالما سياقتى بيوماسسا جانە بيووتىن تۋرالى اقپاراتتار بەرىلەدى. بيووتىن جاساۋ اگرونومداردىڭ تابىسىن ۇلعايتسا, ەكىنشى جاعىنان قوقىس كولەمىن ازايتادى ەكەن. تايلىقتار تۇراقتى ەنەرگيانىڭ دامۋىن گۇلدەپ تۇرعان اعاش ارقىلى بىلدىرمەك. ال ولاردىڭ لوگوتيپى تايلاند كارتاسىنا ۇقسايدى.
ارينە, كورمە كەزىندە بۇل ۇلتتىڭ ەرەكشەلىكتەرىن دە كورەسىز. ءدال سول جەردە تاي تاعامىن ۇسىناتىن مەيرامحانا مەن تاي ماسساجى سالونى جۇمىس ىستەپ تۇر. الداعى ۋاقىتتا تانىمال «مۋاي تاي» شەبەرلەرى تاي بوكسىنان شوۋ كورسەتەدى دەسەدى. ال ۇلتتىق كۇندەرىن تويلاۋ قازاقستان مەن تايلاند اراسىنداعى ديپلوماتيالىق قاتىناستاردىڭ 25 جىلدىعىنا سايكەس كەلىپ وتىر. سوندىقتان اتاۋلى وقيعا اياسىندا بىرقاتار مەرەكەلىك شارالار وتكىزۋ جوسپارلانعان.
اسحات رايقۇل, «ەگەمەن قازاقستان»
سۋرەتتى تۇسىرگەن ەرلان وماروۆ,
"ەگەمەن قازاقستان"