فرانتسۋز ءجۋرناليسى ليز بارسەلليني ءبىزدىڭ بايتاق دالامىز, تاۋەلسىز قازاقستان تۋرالى كىتاپ جازىپ شىقتى. جاڭا كىتاپتىڭ تۇساۋكەسەرى جۋىردا قاراعاندى قالاسىندا ءوتتى. فرانتسۋز تىلىندە جارىق كورگەن قىزىقتى تۋىندى «Kazakhstan. Jeune nation entre Chine, Russie et Europe» («قازاقستان. قىتاي, رەسەي, ەۋروپا توعىسىنداعى قۋاتتى مەملەكەت» دەپ اتالادى. جالپى, ليز بارسەلليني ەكى جىلدان بەرى قازاقستاننىڭ تۇرعىنى. ول وسى ۋاقىت ارالىعىندا قازاق ءتىلىن ءبىرشاما مەڭگەرىپ, كىتاپتى دالا قازاقتارىمەن سۇحبات نەگىزىندە جازعان. قازاق حالقىنىڭ, ونىڭ ىشىندە ءورشىل جاس استانالىقتاردىڭ اسقاق رۋحى, باعزىدان كەلە جاتقان قالىڭدىق ۇرلاۋ ءداستۇرى مەن قىمىز دايىنداۋ تەحنولوگيالارى سياقتى تاقىرىپتار كىتاپ مازمۇنىن بايىتقان. كىتاپ جازۋ بارىسىندا شەتەلدىك جۋرناليست قازاقتان شىققان 50-گە تارتا بەلگىلى تۇلعامەن سۇحبات قۇرعان. ولاردىڭ قاتارىندا اقىن ولجاس سۇلەيمەنوۆ, باتىر, عارىشكەر توقتار اۋباكىروۆ, سۋرەتشى كارىپبەك كۇيىكوۆ, جىرشى ۇلجان بايبوسىنوۆا سىندى تانىمال تۇلعالار بار. سونداي-اق, جۋرناليست شىعارماشىلىق جۇمىسى بارىسىندا قازاقستاندىق قوعام قايراتكەرلەرىنىڭ الەۋمەتتىك جەلىنى ساۋاتتى پايدالانىپ, قاجەتتەرىنە دۇرىس جاراتىپ وتىرعاندىعىن ايتادى. ونىڭ ايتۋىنشا, فرانتسيادا كەيىپكەرىڭمەن سۇحبات قۇرۋ ءۇشىن الەۋمەتتىك جەلىدە كەزدەسۋ ۋاقىتىن, ورنىن بەلگىلەپ, اڭگىمەلەسۋ ءتۇرى كەڭىنەن دامىماعان. قازىرگى تاڭدا ليز بارسەلليني قاراعاندىداعى فرانتسۋز اليانسىنىڭ فيليالىندا فرانتسۋز ءتىلىنىڭ مۇعالىمى بولىپ جۇمىس ىستەپ جاتىر. كىتاپتىڭ استاناداعى تۇساۋكەسەرى 17 ماۋسىم كۇنى وتپەك. ال كۇزگە قاراي پاريج كىتاپحانالارىنا جول تارتادى.
ميراس اسان, «ەگەمەن قازاقستان»
قاراعاندى وبلىسى