استانادا سىرتقى ىستەر ءمينيسترى ەرلان ىدىرىسوۆتىڭ توراعالىعىمەن «نۇرلى جول» باعدارلاماسى مەن جىبەك جولى ەكونوميكالىق بەلدەۋىنىڭ ءتۇيىسۋى» تاقىرىبىندا دوڭگەلەك ۇستەل ءوتتى.
شەتەلدىك ارىپتەستەردى قازاقستاننىڭ كولىك-ترانزيتتىك الەۋەتىمەن, سونداي-اق, «نۇرلى جول» باعدارلاماسى اياسىندا جۇزەگە اسىرىلىپ جاتقان ماڭىزدى جوبالارمەن تانىستىرۋ, اقپاراتتاندىرۋ ماقساتىندا ۇيىمداستىرىلعان شاراعا قازاقستانداعى ەلشىلەر مەن حالىقارالىق ۇيىمداردىڭ وكىلدەرى قاتىستى.
وتىرىستى اشقان ەرلان ىدىرىسوۆ ءوزىنىڭ كىرىسپە سوزىندە مەملەكەت باسشىسى نۇرسۇلتان نازارباەۆتىڭ قازاقستاننىڭ كولىك-ترانزيتتىك الەۋەتىن ارتتىرۋعا ايرىقشا نازار اۋدارىپ وتىرعانىن اتاپ كورسەتتى. ونىڭ سوزىنە قاراعاندا, بۇل باعىتتاعى جۇمىستار ەلىمىزدىڭ سىرتقى ساياساتىنداعى باسىمدىققا يە شارالاردىڭ ءبىرى. ونى سىرتقى ىستەر مينيسترلىگى قاتاڭ باقىلاۋدا.
بۇدان كەيىن ينۆەستيتسيالار جانە دامۋ ءمينيسترى جەڭىس قاسىمبەك, «قازاۆتوجول» ۇك» اق باسقارما ءتوراعاسى ەرمەك قيزاتوۆ, «ەير استانا» اۆياكومپانياسىنىڭ پرەزيدەنتى پيتەر فوستەر جانە «قازاقستان تەمىر جولى» ۇك» اق ۆيتسە-پرەزيدەنتى ەركىن جۋسانباەۆ ءسوز سويلەدى. ولار ءوز سالالارى بويىنشا اتقارىلىپ جاتقان جۇمىستار تۇرعىسىندا اڭگىمەلەي كەلىپ, قازاقستاننىڭ كولىك-ترانزيتتىك الەۋەتىن سيپاتتايتىن كورسەتكىشتەردى ءسوز ەتتى. ماسەلەن, ج.قاسىمبەك 2010-2015 جىلدار ارالىعىندا اتالعان سالاعا 23 ملرد دوللار كولەمىندە ينۆەستيتسيا سالىنعانىن اتاپ كورسەتتى. سونىمەن قاتار, ول «باتىس قىتاي – باتىس ەۋروپا» كولىك ءدالىزىنىڭ تيىمدىلىگىن ءسوز ەتە وتىرىپ, ۇستىمىزدەگى جىلى بۇل جولدىڭ قازاقستاندىق بولىگى تولىق اياقتالاتىنىن ءمالىم ەتتى.
دوڭگەلەك ۇستەلگە قاتىسقان شەتەلدىك وكىلدەر اتالعان تاقىرىپقا قاتىستى ءوز ويلارىن ورتاعا سالىپ, ۇسىنىس-پىكىرلەرىن ايتتى. سونداي-اق, ولار كولىك-ترانزيتتىك جوبالاردى جۇزەگە اسىرۋدا وزدەرىنە قاتىستى جۇمىستاردى اتقارۋعا دايىن ەكەندەرىن, الدا تۇرعان مىندەتتەردى ورىنداۋعا بارىنشا ات سالىساتىندارىن جەتكىزدى.
جولدىباي بازار,
«ەگەمەن قازاقستان»