«نۇر وتان» پارتياسىنىڭ مۇشەلىگىنە ءوتتى
تاۋەلسىز قازاقستاننىڭ 25 قۇرداسى «نۇر وتان» پارتياسىنىڭ مۇشەسى اتاندى. ولاردىڭ قاتارىندا عالىمدار, سپورتشىلار, دارىگەرلەر, ۆەتەرينارلار, ارتىستەر, كاسىپكەرلەر, مۇعالىمدەر, جۋرناليستەر, فەرمەرلەر جانە مەملەكەتتىك قىزمەتكەرلەر بار. جاس پاتريوتتارعا پارتيالىق بيلەتتەردى «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەد تاپسىردى.
پارتيا ورتالىق اپپاراتىنىڭ عيماراتىندا وتكەن سالتاناتتى شارادا مۇحتار قۇل-مۇحاممەد: «قازاقستان حالقى – تۇڭعىش پرەزيدەنتى كۇنى مەن الدىمىزداعى ەڭ ۇلىق مەرەكەمىز – قازاقستان تاۋەلسىزدىگىنىڭ 25 جىلدىق تورقالى تويى – بۇل ەكى مەرەكە ەلباسىمىز, پارتيا كوشباسشىسى ەسىمىمەن تىعىز بايلانىستى. ەلباسىمىزدىڭ كەمەڭگەرلىك باسشىلىعىمەن ءتاۋەلسىز قازاقستان بۇكىل الەمگە تانىلدى. نۇرسۇلتان ءابىش ۇلى اسەم استانامىزدى سالىپ, ونى ءدۇنيە ءجۇزىنە جارقىراتا كورسەتتى. الەم حالقى ءبىزدىڭ استانامىزدى «بولاشاقتىڭ قالاسى» دەپ اتايدى. ال بولاشاق – سىزدەردىكى. بۇگىن ءسىزدەر ەلباسى پارتياسىنىڭ قاتارىنا قابىلداندىڭىزدار. بۇل ءسىزدەرگە ۇلكەن سەنىم عانا ەمەس, زور جاۋاپكەرشىلىك تە جۇكتەيدى. ءسىزدەردىڭ ەلباسى سەنىمىن اقتايتىندارىڭىزعا كامىل سەنەمىن», دەدى.
«بۇگىندە استانادا 300 مىڭنان استام جاس بۋىن وكىلدەرى تۇرادى. اقمولا ەلىمىزدىڭ ەلورداسى اتانعان تۇستا قالا حالقى بۇدان دا از بولاتىن, – دەدى ءارى قاراي «نۇر وتان» پارتياسى ءتوراعاسىنىڭ ءبىرىنشى ورىنباسارى. – سوندىقتان استانانى جاستار قالاسى دەپ تولىق سەنىممەن ايتۋعا بولادى. وكىنىشكە قاراي, استانالىق جاستاردىڭ تەك 5 پايىزى عانا «نۇر وتان» پارتياسىنىڭ ءمۇشەسى. بۇل ايتارلىقتاي از. سول سەبەپتى, پارتيامىز جاستاردىڭ مۇشەلىككە ءوتۋ بەلسەندىلىگىن قولدايدى. بۇگىندە ەلىمىزدەگى مينيستر, اكىم, دەپۋتات, ۇلتتىق كومپانيا باسشىلارىنىڭ اراسىندا جاستار جەتىپ ارتىلادى. تاباندىلىقپەن جۇمىس ىستەسەڭىزدەر سىزدەر دە سولاردىڭ قاتارىنان كورىنەسىزدەر. بۇل جولدا مەن ءسىزدەرگە شىن جۇرەگىممەن ساتتىلىك ءتىلەيمىن».
پارتيالىق بيلەتتەردى تاپسىرۋ كەزىندە وزدەرىنىڭ پارتيا ىسىنە ادال قىزمەت ەتەتىندەرى جونىندە ءپىكىر قوسقاندار دا بولدى. «Bugin Group» جشس-ءنىڭ كوممەرتسيالىق ديرەكتورى قۋانىش سەيسەمباەۆ: «ەڭبەگىمدى ەسكەرىپ, پارتيا ءمۇشەلىگىنە قابىلداعاندارىڭىز ءۇشىن العىسىمدى بىلدىرەمىن. مەملەكەت باسشىسى شاعىن جانە ورتا بيزنەستىڭ كەز كەلگەن ەلدىڭ ەكونوميكالىق جاعىنان ءوسۋى مەن وركەندەۋىنىڭ نەگىزى ەكەنىن وتە جاقسى ءبىلەدى. ەلىمىزدە كاسىپكەرلىكپەن اينالىسامىن دەگەن ازاماتقا مەملەكەتىمىز ەركىن مۇمكىندىكتەر الاڭىن قالىپتاستىردى. سىزدەردىڭ قاتارلارىڭىزدا ەلىمىزدىڭ ودان ءارى ءوركەندەپ دامۋى ءۇشىن بارىنشا ات سالىسۋعا, ءوز ۇلەسىمدى قوسۋعا بار كۇشىمدى سالامىن. ەل ءۇشىن قىزمەت ەتۋ – جاستىڭ دا, جاسامىستىڭ دا پارىزى. ال بىزدەر, جاستار جاعى ءسوزبەن دە, ىسپەن دە قىزمەت ەتۋگە ءتيىسپىز», دەدى اعىنان جارىلىپ.
كاسىپقوي بوكسشى جانقوش تۇراروۆ: «مەن قازىرگى ۋاقىتتا سپورت سالاسىندا الەمدى ارالاپ, قاي جاققا بارسام دا, قازاقستاندى تانىپ, قۇرمەتتەپ جاتادى. ءتاۋەلسىزدىكتىڭ 25 جىلى ىشىندە الەمدە ءوز ورنىمىزدى ايقىنداي ءبىلدىك. وسى ەرەن ەڭبەكتىڭ بارلىعى ەلباسىمىزدىڭ ساليقالى ساياساتىنىڭ ارقاسى. مەن ەلباسى ساياساتىن قولدايمىن, ەلباسى باسقارىپ وتىرعان «نۇر وتان» پارتياسى ءمۇشەلىگىنە قوسىلعانىما قۋانىش-
تىمىن. ەلىمىزدىڭ تۋىن الەمدىك دەڭگەيدە جەلبىرەتۋگە بار كۇش-ءجىگەرىمدى سالامىن», دەدى.
ال «نازار اۋدار» كتك كومانداسىنىڭ مۇشەسى ءمادي ءابدۋعاليەۆ: «ەگەمەن ەلىمنىڭ ەركىن ويلى ازاماتى رەتىندە «نۇر وتان» پارتياسىنىڭ مۇشەلىگىنە وتكەنىمە قۋانىشتىمىن. مەن تاۋەلسىز ەلدىڭ ءتول پەرزەنتى بولعانىمدى باقىت سانايمىن. ءوز وتانىما ادال قىزمەت ەتۋ – باستى پارىزىم. «نۇر وتان» پارتياسى جاستارعا ۇنەمى قامقورلىق تانىتىپ, قولداۋ كورسەتىپ كەلەدى. وسى ورايدا, پارتيانىڭ «ءساتتى قادام», «جاستاردىڭ كادرلىق رەزەرۆى» سىندى جوبالارى جاستاردىڭ ەڭبەككە ورنالاسۋىنا مۇمكىندىك تۋعىزىپ, ءوز ارماندارىن جۇزەگە اسىرۋىنا كومەك بەرۋدە. رەسپۋبليكا جاستارىنىڭ سۇيىكتى ويىنىنا اينالىپ ءۇلگەرگەن «جايدارمان» ويىندارى «جاستار وتانعا» اتتى كەڭ كولەمدى جوباسىنىڭ اياسىندا ءجۇزەگە اسىرىلۋدا. «جاس وتان» قولداعان «جايدارمان» ويىندارىنىڭ 2013 جىلعى چەمپيونى اتانىپ, بالا كۇنگى ارمانىمنىڭ ءبىرى ورىندالدى. بۇل دا مەنىڭ ءۇلكەن جەتىستىكتەرىمنىڭ ءبىرى دەپ ءبىلەمىن», دەدى.
پارتيالىق بيلەتتەرىن العانداردىڭ قاتارىندا ەلوردالىق تەمىرجول ۆوكزالىنىڭ جەتەكشى ينجەنەرى ەرجان ايتپانبەتوۆ, كوكشەتاۋ ۋنيۆەرسيتەتىنىڭ ۇستازى يۋليا مونتاريدي, تانىمال ءانشى ءالي وقاپوۆ, «قازاقستان-اقتوبە» تەلەارناسىنىڭ ءجۋرناليسى ءىڭكار قاراشاەۆا, الماتى وبلىسىنداعى «ءالىباەۆ» شارۋا قوجالىعىنىڭ جەتەكشىسى قۋانىش قۇدايبەرگەنوۆ, ۆەتەرينار مانات رىسقۇلبەكوۆ, «ASTANA CITY» ۆەلوكومانداسىنىڭ سپورتشىسى پاۆەل گاتسكي ءجانە باسقالار بار.
قاتارىنا جاس پاتريوتتاردى تارتۋ – «نۇر وتاننىڭ» باسىم باعىتتارىنىڭ ءبىرى. تەك بيىل عانا پارتياعا 23 مىڭنان استام جاستار وكىلى مۇشە بولدى. ال قازىرگى تاڭدا «نۇر وتان» ساپىنداعى جاس بۋىننىڭ جالپى سانى 170 مىڭنان اسادى.
ءاليسۇلتان قۇلانباي,
«ەگەمەن قازاقستان»