«بولاشاق» كورپوراتيۆتىك قورى قولداۋىمەن قازاقشا ءتىل قاتقان «ۋولت ديسنەي» ستۋدياسىنىڭ «موانا» انيماتسيالىق ءفيلمىنىڭ كورسەتىلىمى ءوتتى.
«ۋولت ديسنەي» ستۋدياسىنىڭ ۇزدىك 56 انيماتسيالىق ءونىمىنىڭ تىزىمىنە ەنەتىن «موانا» كينوكارتيناسىنىڭ ەرەكشەلىگى – دۋبلياجدا قازاقستاندىق تانىمال ارتىستەر مەن قازۇوۋ-ءنىڭ ستۋدەنتتەرىنىڭ قاتىسۋىمەن 11 ءان ورىندالادى.
موانانىڭ داۋىسىن دىبىستاعان تەاتردىڭ تالانتتى اكتريساسى نازەركە سەرىكبولوۆا تانىستىرىلىم ساتىندە بەرگەن سۇحباتىندا: «ماعان بۇل جوبا وتە ۇنادى. ويتكەنى, كارتينانىڭ باستى كەيىپكەرىن دىبىستادىم, اندەرىن ورىندادىم, مۇنداي تاماشا اسەرگە قۋانباۋ مۇمكىن ەمەس. ارينە, ءجاي كورگەن ادامعا ونىڭ قيىندىقتارى, جاۋاپكەرشىلىگى ايتارلىقتاي اۋىر بولماعانمەن, مەن ءۇشىن تۋي كوسەمنىڭ قىزى, 14 جاسار ارمانشىل موانانىڭ داۋىسىن بالعىنداردىڭ جۇرەگىنە جۇعىمدى ەتىپ جەتكىزە الۋ وپ-وڭاي كەلگەن جەڭىل ولجا دەپ ايتا المايمىن. داۋىس ارقىلى ءوز كەيىپكەرىڭنىڭ بارلىق ەموتسيالارىن قالتقىسىز قايتالاۋ, ءبارىن سەزىنۋ, قۋانۋ, مۇڭايۋ ورىنداۋشىدان ۇلكەن شەبەرلىكتى تالاپ ەتەدى. ءبىر كادردا ول ەكپىندەپ كەلىپ, جارتاستان سۋعا سەكىرىپ, قايتا ايقالايدى. سوندا ماعان دا وسى وقيعاعا جالما-جان ىلەسىپ, سونداعى داۋىس پەن ىرعاقتى ول سۋعا سەكىرگەنشە ۇستاپ تۇرۋ كەرەك بولدى. مۇنى مەن ءدال سولاي ىستەدىم... ءتىپتى, كادر ۇستىندە ىشكى جان تۇيسىگىمىزگە دەيىن ونىمەن سونشالىق جاقىن, ۇقساس ەكەنىن ۇقتىم. مەن وعان از ۋاقىتتا باۋىر باسىپ, جاقسى كورىپ كەتتىم», دەپ اعىنان جارىلدى. قازاق تىلىندەگى دۋبلياجدىڭ رەجيسسەرى ريتا ابىشەۆا مەن جوبانىڭ مۋزىكالىق باسقارۋشىسى كۇنىمگۇل بورانباەۆا «ديسنەي» ونىمدەرى قازاقستاندىق بۇلدىرشىندەردىڭ ءوز انا تىلدەرىندە سويلەپ, وقىپ-ۇيرەنۋلەرىنە كوپ سەپتىگىن تيگىزەتىنىن تىلگە تيەك ەتە كەلىپ, قازاق ءتىلى «Soni Pictures» ستۋدياسىنىڭ ونىمدەرىن دۋبلياجداۋشى – 7-ءشى, ال «Walt Disney» ستۋدياسى بويىنشا 39-شى ءتىلدىڭ قاتارىنا ەنىپ وتىرعانىن مالىمدەدى. جالپى, وتاندىق جوبا جۇزەگە اسىرىلعالى بەرى گولليۆۋدتىق 16 كينوكارتينا قازاق تىلىندە دىبىستالعان ەكەن.
انيماتسيالىق ءفيلمنىڭ دۋبلياجىنا باس-اياعى 35-تەن استام اكتەر قاتىسقان. اتاپ ايتار بولساق, موانانىڭ اجەسى تالانى – ليديا كادەن, موانانىڭ اناسى سينانى – ماقپال يسابەكوۆا, جارتىلاي قۇداي كەيپىندەگى ءماۋيدى – ءانشى بۇركىت, تۋي كوسەمدى – جانىبەك مۇساەۆ, تاماتوانى سىرىم قاشقاباەۆ دىبىستايدى. سونىمەن قاتار, شىعارماشىلىق توپتىڭ قۇرامىندا مۇنان دا باسقا ەلىمىزدىڭ تانىمال اكتەرلەرى مەن ەسترادا ورىنداۋشىلارى بار. العاشقى كورسەتىلىم قالىپتاسقان ءداستۇر بويىنشا استانا مەن الماتى, سونداي-اق, شىمكەنت قالالارىنىڭ كينوتەاترلارىندا سالتاناتتى جاعدايدا ءوتتى. بۇعان جوبانىڭ يدەيالىق قولداۋشىسى, «بولاشاق» قاۋىمداستىعى كەڭەسىنىڭ قۇرمەتتى مۇشەسى, الماتى قالاسىنىڭ اكىمى ب.بايبەك, شىمكەنت قالاسىنىڭ اكىمى ع.ءابدىراحىموۆ, دۋبلياجدىڭ اكتەرلەرى, مادەنيەت پەن ونەر قايراتكەرلەرى, بالالار ءۇيىنىڭ تاربيەلەنۋشىلەرى, جاستار ۇيىمدارىنىڭ بەلسەندىلەرى, ت.ب. قاتىستى.
جوبا شەتەلدىك كينونىڭ قازاق تىلىندەگى قورىن جيناقتاۋدا ايتارلىقتاي تابىستارعا قول جەتكىزگەن. فيلمدەردى دۋبلياجداۋ جانە پروكاتتاۋ, تاسپالاردى ىسكە اسىرۋ بويىنشا گولليۆۋدتىڭ «Disney», «ناۋvel», «Metro-Goldwyn-مامer» ستۋديالارىمەن الدىن الا قۇقىقتىق كەلىسىمدەر جۇرگىزىلگەن. سونداي-اق, بۇل باستاما ەلباسى تاراپىنان جوعارى باعالانىپ, «ماڭگىلىك ەل» جالپىۇلتتىق يدەياسىنا قوسىلعان ۇلكەن ۇلەس جانە كەڭ اۋقىمدى قوعامدىق, مەديا قولداۋ بولىپ ەسەپتەلەدى. سول سەبەپتى دە قوردىڭ كوشباسشى ستۋديالارمەن مۇنداي ءوزارا شىعارماشىلىق ىنتىماقتاستىعى قازاق ءتىلىن دامىتۋ مەن حالىقارالىق دەڭگەيدە ناسيحاتتاۋدىڭ مۇمكىندىگى رەتىندە باعالانادى. ال كورسەتىلىم اياسىندا «موانا» ءفيلمىنىڭ سارىنى بويىنشا قازاقشا ەڭ جاقسى شىعارما مەن كوركەمدىك يلليۋستراتسياعا وقۋشىلار اراسىندا بايقاۋدىڭ جاريالانۋىن وسى يدەيانىڭ جۇزەگە اسىرىلا باستاۋىنىڭ جارقىن مىسالىنا جاتقىزۋعا بولادى.
قاراشاش توقسانباي,
«ەگەمەن قازاقستان»