ا.پۋشكين اتىنداعى شىعىس قازاقستان وبلىستىق كىتاپحاناسىندا تۇڭعىش پرەزيدەنت كىتاپحاناسىنىڭ وقۋ زالى اشىلدى. اتالعان شاراعا وبلىس اكىمىنىڭ ورىنباسارى اسەم ءنۇسىپوۆا, وبلىستىق ىشكى ساياسات باسقارماسىنىڭ باسشىسى ەرجان سەمبينوۆ, «قازتسينك» جشس تۇراقتى دامۋ جونىندەگى باسقارۋشى ديرەكتورى اندرەي لازارەۆ, وبلىستىق ارداگەرلەر كەڭەسىنىڭ توراعاسى ايتقازى شەرۋباەۆ, قمدب وسكەمەن ءوڭىرى بويىنشا وكىل يمامى ەرمەك مۇقاتاي, قازاق-امەريكا ەركىن ۋنيۆەرسيتەتىنىڭ پرەزيدەنتى ەرەجەپ مامبەتقازيەۆ جانە ءوڭىردىڭ زيالى قاۋىم وكىلدەرى قاتىستى.
ەلباسىنىڭ جاسامپاز يدەيالارى مەن باستامالارىن ناسيحاتتاۋدى, وسكەلەڭ ۇرپاقتى مەملەكەتشىلدىككە باۋلىپ, پاتريوتتىق تاربيە بەرۋدى كوزدەيتىن وقۋ زالىنا كەلۋشىلەر استاناداعى ەلباسى كىتاپحاناسىنداعى قور ماتەريالدارىنا ونلاين رەجىمىندە قول جەتكىزە الادى. سونىمەن بىرگە, تۇڭعىش پرەزيدەنت كىتاپحاناسى ارقىلى عىلىمي ءارى ءبىلىم بەرۋ ماقساتىندا وقۋ زالى الەمدىك باسپالاردىڭ ليتسەنزيالىق دەرەكقورلارىنا قولجەتىمدىلىكتى دە قامتاماسىز ەتەدى. تۇڭعىش پرەزيدەنت كىتاپحاناسى اتالعان وقۋ زالىنىڭ اشىلۋ سالتاناتىنا وراي ەلباسى كىتاپتارىنىڭ ارنايى توپتاماسىن سىيعا تارتتى.
ا.پۋشكين اتىنداعى شىعىس قازاقستان وبلىستىق كىتاپحاناسىنىڭ ديرەكتورى قابيبا اقجىگىتوۆانىڭ ايتۋىنشا, اتالعان وقۋ زالى وقىرمانداردىڭ تۇڭعىش پرەزيدەنت كىتاپحاناسىمەن بايلانىس جاسايتىن وڭىرلىك كەڭىستىگى بولماق. مۇندا اقپاراتتىق جانە ادىستەمەلىك سەمينارلار, عالىمدارمەن, زەرتتەۋشىلەرمەن كەزدەسۋلەر, ونلاين ديالوگتىق الاڭدار, پىكىرتالاستار سياقتى كوپتەگەن شارالار ۇيىمداستىرىلاتىن بولادى. ياعني, وقۋ زالى تۇڭعىش پرەزيدەنت كىتاپحاناسىمەن بىرلەسە وتىرىپ, جاستاردىڭ ساياسي مادەنيەتىن, الەۋمەتتىك داعدىسىن قالىپتاستىرۋعا, جاس كادرلار رەزەرۆىن دايىنداۋعا ىقپال ەتەدى, دەدى قابيبا مىرزاقانقىزى.
جوباعا دەمەۋشىلىك كورسەتكەن «قازتسينك» جشس زاماناۋي تەحنيكالىق قۇرالدارمەن جابدىقتاپ, ينتەرنەت قىزمەتىمەن قامتاماسىز ەتۋ جانە قاشىقتىق قىزمەتىن پايدالانۋدى قارجىلاندىرسا, «ورەول لتد» فيرماسى وقۋ زالىنا مەملەكەتتىك رامىزدەر الۋعا كومەك بەردى.
دۋمان اناش,
«ەگەمەن قازاقستان»