«سىزدەر تاۋەلسىزدىكپەن قۇرداسسىزدار. سىزدەر وتانىمىزدىڭ كەڭەستىك تاريحى, اكە-شەشەلەرىمىز ءومىر سۇرگەن جۇيە, تاۋەلسىز قازاقستاننىڭ العاشقى قيىندىقتارى تۋرالى بىلمەيتىن العاشقى بۋىنسىزدار. سىزدەرگە باسقا ءومىر تانىس ەمەس. الايدا, تاۋەلسىزدىكتىڭ بىزگە عانا ەمەس, بارلىق حالىقتارعا ۇلكەن قيىندىقپەن كەلەتىنىن بىلۋلەرىڭىز قاجەت» دەدى نۇرسۇلتان نازارباەۆ استانادا رەسپۋبليكالىق جاستار فورۋمىندا سويلەگەن سوزىندە.
«ەلىمىزدىڭ ۇلى دا قيىن جولىندا ءبارى بولدى: گيپەرينفلياتسيا, جاپپاي جۇمىسسىزدىق, ونەركاسىپ ورىندارىنىڭ جابىلۋى, جالاقى مەن زەينەتاقىنىڭ جوقتىعى. بىزگە جۇمىس ىستەۋ كەرەك بولدى, قازاقستاننىڭ اياعىنان تۇرىپ كەتە الاتىنىن دالەلدەۋ كەرەك بولدى. ءتۇرلى جورامالدار ايتىلدى. كوپۇلتتى ەل, ىشكى تۇراقسىزدىق, ءالسىز ەكونوميكاسى بولعاندىقتان قازاقستان مەملەكەت بولا المايدى دەدى. ءبىز ءبارى كەرىسىنشە ەكەنىن دالەلدەدىك. تۇرمىس دەڭگەيى وتە تومەن, ەشكىم بىلمەيتىن ەل – 90-جىلداردىڭ باسىنداعى جاعداي وسىنداي بولاتىن» دەدى مەملەكەت باسشىسى.
ەلباسى سونىمەن قاتار پارلامەنتتى نەلىكتەن بىرنەشە رەت تاراتۋعا تۋرا كەلگەنى جونىندە ايتتى. «ەسكى جۇيە بويىنشا سايلانعان پارلامەنت جاڭا رەفورمالاردى جاساۋعا قارسىلىق كورسەتتى. سوندىقتان جاۋاپكەرشىلىكتى كوتەرۋگە تۋرا كەلدى. ولاردى دى كىنالاۋعا بولمايدى. ولار باسقا فورماتسيانىڭ ادامدارى ەدى. جەكەشەلەندىرۋ, نارىق, ەركىن ەكونوميكا, ەركىن ساياسات سياقتى ۇعىمدار ولارعا تۇسىنىكسىز بولاتىن, سوندىقتان ولاردى قولدامادى. وسىلايشا, سول دۇربەلەڭ جىلدارى بيلىكتەگى قاتاڭ كونفرونتاتسيا جاعدايىندا بىرنەشە رەت پارلامەنتتى تاراتىپ, جاۋاپكەرشىلىكتى ءوز موينىما الۋعا تۋرا كەلدى. ءسويتىپ, بەس ايدا زاڭدىق كۇشى بار 147 جارلىق دايىنداپ, جاريالادىق. ءدال وسى شەشىمدەر قازاقستاندى وزگە پوستكەڭەستىك ەلدەرمەن سالىستىرعاندا الدەقايدا العا وزۋعا مۇمكىندىك بەردى» دەدى نۇرسۇلتان نازارباەۆ.