اقىلدى قالا ۇلتتىق ستاندارتتارى بەكىتىلدى

قازاقستاندا Smart City سالاسىندا ۇلتتىق ستاندارتتار بەكىتىلدى, دەپ حابارلادى قر ينۆەستيتسيالار جانە دامۋ مينيسترلىگىنىڭ ءباسپاسوز قىزمەتى. جاڭا ستاندارتتار قالانى ورتالىقتان باسقارۋدىڭ جاڭا مۇمكىندىكتەرىنە بىردەي تالاپتار قويادى. ونىڭ ىشىندە قاۋىپسىزدىك پەن قىزمەتتىڭ جوعارى دەڭگەيى, ەنەرگيا ۇنەمدەۋدەگى يننوۆاتسيالىق شەشىمدەر, تۇرعىن ءۇي كوممۋنالدىق شارۋاشىلىعى, كولىك, ءبىلىم بەرۋ, دەنساۋلىق ساقتاۋ, ەكولوگيا, اقپاراتتىق تەحنولوگيالار بار. بۇل ستاندارتتاردى اتقارۋشى بيلىك باسشىلارى قالانى باسقارۋ ساياساتىن انىقتاۋدا ەسكەرۋلەرى قاجەت. "Smart City جوباسىن دامىتۋ ءۇشىن قاجەتتى يننوۆاتسيالىق تەحنولوگيالاردى ەنگىزىپ, ولاردى دامىتۋدا ستاندارتتاۋ ماڭىزدى ورىنعا يە. ول "اقىلدى قالانىڭ" بارلىق پروتسەسىن قامتيدى. ياعني, عيمارات قۇرىلىسىنان, ينفراقۇرىلىمنان, كولىك باسقارماسىنان باستاپ قالانىڭ باسقا دا باسقارۋ ەلەمەنتتەرىنە دەيىن وسى ستاندارتتار ەسكەرىلۋى كەرەك", - دەپ حابارلادى قر ينۆەستيتسيالار جانە دامۋ مينيسترلىگىنىڭ تەحنيكالىق باقىلاۋ جانە مەترولوگيا كوميتەتىنىڭ توراعاسى ءبىرجان قاناشەۆ. ونىڭ ايتۋىنشا, ستاندارتتار حالىقارالىق تاجىريبەنى ەسكەرە وتىرىپ انىقتالعان.