تاۋەلسىزدىكتىڭ 25 جىلدىعىنا وراي «25 جۇلدىزدى كۇن» اياسىندا الماتى وبلىسىندا ءبىر كۇندە 25 زاماناۋي بالاباقشا اشىلدى. اتالعان نىساندار ىلە, قاراتال, جامبىل, پانفيلوۆ, ەڭبەكشىقازاق, تالعار اۋداندارى مەن تالدىقورعان قالاسىندا ىسكە قوسىلدى, دەپ حابارلايدى قازاقپارات.
قاراتال اۋدانى ۇشتوبە قالاسىندا اشىلعان 320 ورىندى «بالبوبەك» بالاباقشاسى «نۇرلى جول» باعدارلاماسىمەن سالىنعان. ءبىلىم بەرۋ مەكەمەسىنىڭ اشىلۋ سالتاناتىنا وبلىس اكىمى اماندىق باتالوۆ قاتىسىپ, قۇتتىقتادى.
«بۇگىن تۇڭعىش پرەزيدەنت كۇنىنىڭ قارساڭىندا قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي «25 جۇلدىزدى كۇن» اياسىندا ءبىز وبلىس بويىنشا زاماناۋي 25 بالاباقشا اشىپ وتىرمىز. بۇل – وبلىس تۇرعىندارى ءۇشىن اسا ماڭىزدى ءارى ۇلكەن شارا. شىن جۇرەكتەن بارشاڭىزدى تۇڭعىش پرەزيدەنت كۇنىمەن جانە قازاقستان تاۋەلسىزدىگىنىڭ 25 جىلدىعىمەن قۇتتىقتايمىن! زور دەنساۋلىق, تولايىم تابىس, وتباسىلارىڭىزعا بەرەكە تىلەيمىن», – دەدى ا.باتالوۆ.
مۇنان سوڭ وبلىس اكىمى مەملەكەت باسشىسىنىڭ بالالاردى مەكتەپكە دەيىنگى تاربيەمەن قامتۋ تۋرالى تاپسىرماسىن ورىنداۋ باعىتىندا وڭىردە اۋقىمدى جۇمىستار اتقارىلىپ جاتقانىن اتاپ ءوتتى. ماسەلەن, بيىلعى جىلدىڭ وزىندە عانا وبلىستا 97 بالاباقشا پايدالانۋعا بەرىلگەن, ونىڭ 88-ءى – جەكەمەنشىك. سونداي-اق, ايماق باسشىسى مەملەكەتتىك-جەكەمەنشىك ارىپتەستىك ارقىلى مەكتەپكە دەيىنگى مەكەمەلەر اشۋ ءىسى جاقسى جولعا قويىلعانىن, بۇگىنگى كۇنى بالالاردى بالاباقشامەن قامتۋ كورسەتكىشى 87% قۇراپ وتىرعانىن ايتتى.
جالپى, وسى كۇنى 25 بالاباقشانىڭ باسىم بولىگى الماتى قالاسىنىڭ ماڭىندا ورنالاسقان حالىق تىعىز قونىستانعان اۋدانداردا اشىلعانىن اتاپ ءوتۋ كەرەك. ماسەلەن, تالعار اۋدانىندا (تالعار قالاسى, امانگەلدى, قىزىل تۋ, رىسقۇلوۆ, تالدىبۇلاق, تۇزدىباستاۋ, ەركىن اۋىلدارى) جالپى سانى 800 ورىندى 9 بالاباقشا, ىلە اۋدانىندا (وتەگەن باتىر كەنتى, ءجاڭاداۋىر, بايسەركە, قويانقۇس اۋىلدارى) 520 ورىندى 7 بالاباقشا, جامبىل اۋدانىندا (ۇمبەتالى, ۇزىناعاش اۋىلدارى) 470 ورىندى 4 بالاباقشا, سول سياقتى ەڭبەكشىقازاق اۋدانىندا (جاڭاشار, تۇرگەن اۋىلدارى) ەكى بالاباقشا, تالدىقورعان قالاسىندا جانە پانفيلوۆ (پەنجىم اۋىلى), قاراتال اۋداندارىندا (ۇشتوبە قالاسى) بالاباقشا ءبىر-بىردەن اشىلدى.
اتالعان بالاباقشالار اشىلعاننان كەيىن وبلىستا 3-6 جاس ارالىعىنداعى بالالاردى مەكتەپكە دەيىنگى مەكەمەلەرمەن قامتۋ دەڭگەيى جامبىل اۋدانىندا – 94,2%, تالعار اۋدانىندا – 89,0%, پانفيلوۆ – 85,1%, ىلە – 84,1%, ەڭبەكشىقازاق – 82%, تالدىقورعان قالاسىندا 87% كورسەتكىشكە جەتتى.